निंबोळी अर्क पिकांसाठी वरदान

निंबोळी अर्क पिकांसाठी वरदान

शेतकऱ्यांनी वापर करण्याचे आवाहन

चंद्रपूर,दि.9 मे: निंबोळ्यापासून तयार केलेल्या अर्काचा वापर पिकावरील बऱ्याच किडींचा प्रादुर्भाव रोखण्यासाठी होतो. जसे की, मावा, अमेरीकन बोंडअळी, तुडतुडे, पाने पोखरणाऱ्या व देठ कुरतडणाऱ्या अळ्या, फळमाशा, खोडकिडा आदी अनेक किडीवर याचा प्रभाव पडून त्यांचा बंदोबस्त होतो. त्यामुळे शेतकऱ्यांनी पिकांच्या संरक्षणासाठी निंबोळी अर्क वापरावा, असे आवाहन जिल्हा अधीक्षक कृषी अधिकारी डॉ. उदय पाटील यांनी केले आहे.

निबोळी अर्क म्हणजे कडुलिंब या झाडांच्या बियांपासून (निंबोण्या) काढलेला अर्क होय. कडूलिंबाच्या झाडांमध्ये असलेली अॅझाडीरॅक्टीन किटकनाशकाचे काम करते. या घटकाचे प्रमाण बियांमध्ये जास्त प्रमाणात असते.

5 टक्के निंबोळी अर्क तयार करण्याची पध्दत:

उन्हाळयात (पावसाळ्यात सुरूवातीस) निंबोळी उपलब्ध असताना जमा कराव्यात. त्या चांगल्या वाळवून साफ कराव्यात आणि साठवून ठेवाव्यात. फवारणीच्या आदल्या दिवशी आवश्यक तेवढ्या,तितक्या निंबोळया कुटून बारीक कराव्यात.

5 किलो निंबोळी चुरा 9 लिटर पाण्यात (फवारणीच्या आदल्या दिवशी सायंकाळी) भिजत टाकावा.तसेच 1 लिटर पाण्यात 200 ग्रॅम साबणाचा चुरा वेगळा भिजत टाकावा.

दुसऱ्या दिवशी सकाळी निंबोळीचा अर्क फडक्यातून चांगला गाळून घ्यावा. या अर्कात 1 लिटर पाण्यात तयार केलेले साबणाचे द्रावण मिसळावे, हा सर्व अर्क एकूण 10 लिटर होईल एवढे पाणी टाकावे.

वर नमूद केल्याप्रमाणे तयार केलेला एक लिटर अर्क, 9 लिटर पाण्यात मिसळून ढवळावा व फवारणीसाठी वापरावा. अशाप्रकारे निंबोळी अर्क फवारणीच्या दिवशीच तयार करून वापरावा.

फवारणीची वेळ:

निंबोळी अर्काची फवारणी सध्याकाळचे वेळेस म्हणजे दुपारी ४ वाजता नंतर करणे योग्य असते. तयार केलेला फवारा झाडावर कुठेही पडला तरी तो आंतरप्रवाही असल्यामुळे पूर्ण झाडात पोहचतो.

8 महिण्यापेक्षा जुन्या निंबोळया वापरू नका कारण इतक्या जुन्या बियांमध्ये जरूर ती किडनाशक शक्ती राहत नाही. नेहमी निंबोळीचा ताजा अर्क वापरा. निबोळी अर्क वापरल्याने रासायनिक किटकनाशकाचा वापर कमी होऊन पैशाची बचत होते. तसेच किडीचा बंदोबस्त होतो.

00000