सावकारांकडून होणा-या छळाबद्दल करा तक्रार

 सावकारांकडून होणा-या छळाबद्दल करा तक्रार

Ø जिल्हा प्रशासनाचे आवाहन

चंद्रपूर, दि. 18 : महाराष्ट्र सावकारी (नियमन) अधिनियम, 2014 नुसार सावकारी करण्यासाठी शासनाकडून वैध परवाना आवश्यक आहे. परवाना नसलेले सावकारांकडून जास्त व्याज आकारणे, कर्जदारास धमकी, मानसिक किंवा शारीरिक छळ, मालमता जप्ती, बळजबरीने कागदांवर सही करून घेणे हे सर्व प्रकार बेकायदेशीर असून असा व्यवसाय करणारे सावकार हे शिक्षेस पात्र आहेत. त्यामुळे आपण अशा छळास बळी पडत असाल तर घाबरू नका, कोणत्याही दबावाला बळी पडू नका, कोरे कागद, धनादेश किंवा दस्तऐवजांवर स्वाक्षरी करू नका, जास्त व्याज व बेकायदेशीर वसुली मान्य करू नका. याबाबत त्वरीत तक्रार करा, असे आवाहन जिल्हा प्रशासनाने केले आहे.

येथे करा तक्रार : जिल्हा हेल्पलाईन क्र. 18002338691 वर तसेच जिल्हाधिकारी कार्यालय चंद्रपूर, सहाय्यक निबंधक, सहकार विभाग, उप निबंधक, सहकार विभाग,  जवळचे पोलिस ठाणे येथे आपण तक्रार दाखल करू शकतो. आपली तक्रार गोपनीय ठेवण्यात येईल. त्यामुळे जिल्ह्यातील शेतकरी, शेतमजुर, आदिवासी बांधव, महिला, ज्येष्ठ नागरिक व आर्थिकदृष्ट्या दुर्बल घटकांनी वरील ठिकाणी तक्रार नोंदवावी, असे आवाहन करण्यात आले आहे.

००००००

महानगरपालिका निवडणुकीच्या पार्श्वभुमीवर 163 लागू

महानगरपालिका निवडणुकीच्या पार्श्वभुमीवर 163 लागू

Ø जिल्हाधिका-यांनी निर्गमित केले आदेश

चंद्रपूर,दि. 18 : राज्य निवडणूक आयोगाने राज्यातील 29 महानगरपालिकेच्या सार्वत्रिक निवडणुकीची घोषणा करून आदर्श आचारसंहिता तात्काळ प्रभावाने लागू केली आहे.  निवडणूक प्रक्रिया शांत, निर्भय, मुक्त व पारदर्शक वातावरणामध्ये पार पाडण्यासाठी चंद्रपूर शहर महानगरपालिका कार्यक्षेत्रात कोणताही भंग होऊ नये व सदर आचार संहितेचे यथायोग्य पालन होण्याचे दृष्टीने उपायोजना करण्यासाठी भारतीय नागरीक सुरक्षा संहिता, 2023 चे कलम 163 लागू करण्यात आले आहे.

चंद्रपूर शहर महानगरपालिका कार्यक्षेत्रात लागु असलेली आदर्श आचारसंहिता अंमलात असेपर्यंतचे कलम 163 मधील तरतुदीनुसार जिल्हादंडाधिकारी तथा जिल्हाधिकारी चंद्रपूर यांनी खालील बाबींवर निर्बंध लागु केले आहे. यात 1. शासकीय कार्यालये/विश्रामगृहे इत्यादी परिसरात मिरवणुका काढण्यास, घोषणा देणे/सभा घेणे इत्यादीवर निर्बंध, 2. शासकीय/निमशासकीय सार्वजनिक मालमत्तेची प्रत्यक्ष किंवा अप्रत्यक्ष स्वरुपात विद्रुपीकरण करण्यास निर्बंध, 3. उमेदवारांचे नामनिर्देशन दाखल करतेवेळी ताफ्यामध्ये 3 पेक्षा जास्त मोटारगाडया/वाहने तसेच निवडणुक निर्णय अधिकारी यांच्या कार्यालयाच्या 100 मिटर परिसरात व दालनात 5 व्यक्ती व्यतिरिक्त कोणालाही प्रवेश करण्यास निर्बंध, 4. निवडणुक प्रक्रिया पूर्ण होईपर्यंत इतर उमेदवाराचे नाव व चिन्ह वापरणे, आयोगाने निश्चित केल्याप्रमाणे कागद वापरणे तसेच निश्चित केलेल्या कागदाच्या आकारामध्ये नमुना मतपत्रिका छपाईस निर्बंध, 5.निवडणूक प्रक्रिया पूर्ण होईपर्यंत निवडणुक निर्णय अधिकारी यांच्या कार्यालयाचे 200 मी. परिसरात धरणे आंदोलन, मोर्चा, निदर्शने, उपोषणे करण्यावर निर्बंध, 6. धार्मिक स्थळे, रुग्णालये किंवा शैक्षणिक संस्था व सार्वजनिक ठिकाणाचा प्रचार कार्यालयासाठी वापर करता येणार नाही तसेच सदर ठिकाणापासून जवळपास तात्पुरते पक्ष कार्यालय स्थापन करण्यास निर्बंध, 7. निवडणुक प्रक्रिया पूर्ण होईपर्यंत जात/धर्म/भाषावार शिबिरांचे आयोजन करण्यावर निर्बंध, 

8. निवडणुकीचे प्रचाराकरीता निवडणूक निर्णय अधिकारी यांच्याकडून अधिकृत परवानगी घेतलेल्या वाहना व्यतिरिक्त इतर कोणत्याही वाहनावर पक्ष प्रचाराचे कापडी फलक, झेंडे लावणे इत्यादी बार्बीवर निर्बंध. 9. निवडणुक प्रक्रिया पूर्ण होईपर्यंत खाजगी व्यक्तींच्या जागेवर/सार्वजनिक जागेवर झेंडे, भित्तीपत्रके जागा मालकाच्या व संबंधित प्राधिकरणाच्या परवानगी शिवाय लावण्यास निर्बंध, 10. निवडणुक प्रक्रिया पूर्ण होईपर्यंत प्रचार/रॅली/रोड-शो याकरीता वाहनाच्या ताफ्यात 10 पेक्षा अधिक ( यामध्ये जास्तीत जास्त 3 वाहने चारचाकी अथवा तीनचाकी व इतर वाहने दुचाकी असू शकतात) मोटार गाडया/वाहने वापरण्यास निर्बंध, 11. मतदान सुरु होण्याच्या दिनांकापूर्वी 24 तास अगोदर कुठल्याही माध्यमाव्दारे प्रत्यक्षरित्या अथवा सोशल मिडीयाव्दारे प्रचार करण्यास बंदी राहील. 12. कोणताही पक्ष अथवा उमेदवार, वेगवेगळ्या जाती, धर्म, भाषा अथवा सामाजिक गट यांच्यामध्ये मतभेद होणारी किंवा ज्यामुळे, त्यांच्यात परस्परांमध्ये द्वेश किंवा तणाव निर्माण होईल अशी कोणतीही कृती करण्यावर बंदी राहील. 13. जात, धर्म, जमात किंवा भाषा यांच्या आधारे आचारसंहिता कालावधीमध्ये अधिवेशन घेता येणार नाही, 14. निवडणूक प्रचार कालावधीमध्ये प्राण्यांचा तसेच 14 वर्षांखालील मुलांचा प्रचारासाठी वापर करण्यास बंदी राहील.

सदर आदेश जिल्हादंडाधिकारी विनय गौडा जी.सी. यांच्या स्वाक्षरीने निर्गमित करण्यात आले आहे.

०००००००

बीआरटीसी येथे राज्यस्तरीय संशोधन परिसंवादाचे आयोजन

 

बीआरटीसी येथे राज्यस्तरीय संशोधन परिसंवादाचे आयोजन

Ø अनेक नामवंत संशोधकांचा सहभाग

चंद्रपूर, दि. 18 : बांबू संशोधन व प्रशिक्षण केंद्र (बीआरटीसी) चिचपल्ली या संस्थेच्या स्थापना दिनाचे औचित्य साधून दोन दिवसीय सांस्कृतिक महोत्सव तसेच राज्यस्तरीय संशोधन परिसंवादाचे आयोजन करण्यात आले. संशोधन परिसंवादाच्या उद्घाटन कार्यक्रमाला प्रमुख पाहुणे म्हणून प्रधान मुख्य वनसंरक्षक (वन्यजीव) एम. एस. रेड्डी, अतिरिक्त विभागीय आयुक्त डॉ. माधवी खोडे, अतिरिक्त जिल्हाधिकारी डॉ. नितीन व्यवहारे उपस्थित होते.

अध्यक्षीय भाषणात एम. एस. रेड्डी यांनी बांबूला ‘ग्रीन गोल्ड’ असे संबोधून हवामान बदल, हरित विकास, रोजगारनिर्मिती तसेच शाश्वत अर्थव्यवस्था उभारणीमध्ये बांबूची भूमिका अत्यंत महत्त्वाची असल्याचे अधोरेखित केले. बांबू आधारित उद्योगांच्या वाढीसाठी शासन विभाग, संशोधन संस्था व उद्योग यांच्यातील समन्वय आणि सहकार्य आवश्यक असल्याचे त्यांनी नमूद केले.

यावेळी मार्गदर्शन करताना डॉ. माधवी खोडे यांनी नुकत्याच जाहीर झालेल्या महाराष्ट्र बांबू औद्योगिक धोरण 2025 चा संदर्भ देत बांबू हा उपजीविका निर्मिती, ग्रामीण विकास व हरित उद्योगांसाठी एक महत्त्वाचा स्रोत असल्याचे स्पष्ट केले. धोरणाच्या प्रभावी अंमलबजावणीसाठी बीआरटीसीने संशोधन, नवोन्मेष, प्रोटोटायपिंग, कौशल्य विकास व व्यावसायिक प्रशिक्षण या क्षेत्रांत महत्त्वपूर्ण भूमिका बजावावी, असे त्यांनी सांगितले. याच अनुषंगाने डॉ. खोडे यांनी नागपूर विद्यापीठ व बीआरटीसी यांच्यात झालेल्या सामंजस्य कराराचा उल्लेख करून शैक्षणिक सहकार्य, संयुक्त संशोधन, इंटर्नशिप तसेच प्रमाणपत्र अभ्यासक्रमांमुळे बांबू तंत्रज्ञान व उद्योजकतेला चालना मिळेल, असे प्रतिपादन केले.

तांत्रिक सत्रांमध्ये महाराष्ट्रातील विविध भागांतील संशोधक व तज्ज्ञांनी बांबू हस्तकलेतील मूल्यवर्धन, आवश्यक तेलांपासून बांबू संरक्षकांची निर्मिती, कृत्रिम बुद्धिमत्ता (AI) व इंटरनेट ऑफ थिंग्स (IoT) आधारित स्मार्ट बांबू लागवड, बांबू कोळशावर आधारित ऊर्जा निर्मिती, बांबू व इतर बांधकाम साहित्यांचे जीवनचक्र मूल्यांकन, बांबू प्रजातींचे औषधी गुणधर्म तसेच पर्यावरणपूरक बांबू संरक्षण तंत्रे अशा विविध विषयांवर संशोधन सादरीकरणे केली.

या परिसंवादास लालसिंग (वरिष्ठ शास्त्रज्ञ, नीरी–नागपूर), डॉ. प्रकाश इटनकर (नागपूर विद्यापीठ), डॉ. के. टी. व्ही. रेड्डी (डीन, दत्ता मेघे वैद्यकीय संस्था), डॉ. ए. एन. गुप्ता (जेडी कॉलेज ऑफ इंजिनिअरिंग अँड मॅनेजमेंट, नागपूर), दिनेश लाकडे (स्ट्रक्चरल तज्ज्ञ, वर्धा), प्रा. प्रमोद महाले (डीएमआयएचईआर विद्यापीठ), एमगिरी वर्धा चे दीप वर्मा, डॉ. प्रशांत तायडे, डॉ. संदीप जोशी, डॉ. विजय इलोरकर, आर्किटेक्ट आशिष नागपूरकर (व्हीएनआयटी, नागपूर), निधी गांधी (फॅशन डिझायनर), डॉ. मोनिकुंतला दास (आयआयटी, गुवाहाटी) तसेच डॉ. तारिका दगडकर (एसएमएमसीए, नागपूर) यांच्यासह अनेक मान्यवर तज्ज्ञ व संशोधक उपस्थित होते. 

बीआरटीसीचे संचालक मनोजकुमार खैरनार यांनी प्रास्ताविकातून, बीआरटीसी केंद्रामार्फत राबविण्यात येत असलेल्या संशोधन उपक्रमांची, प्रशिक्षण कार्यक्रमांची, औद्योगिक सहकार्याची तसेच बांबू क्षेत्राच्या सर्वांगीण विकासासाठी असलेल्या दृष्टिकोनाची सविस्तर माहिती सादर केली. संचालन स्नेहा मांडकेर यांनी केले तर आभार वनपरिक्षेत्र अधिकारी ए. डी. मल्लेलवार यांनी मानले.

००००००

‘मुख्यमंत्री माझी लाडकी बहीण योजना’

 ‘मुख्यमंत्री माझी लाडकी बहीण योजना’

‘त्या’ पात्र लाभार्थी महिलांनी 31 डिसेंबरपर्यंत ई-केवायसी करावी

चंद्रपूर, दि. 16 : ‘मुख्यमंत्री-माझी लाडकी बहीण’ योजनेंतर्गत ज्या पात्र लाभार्थी महिलांचे वडील / पती हयात नाहीत किंवा घटस्फोट झालेला आहे, त्या लाभार्थी महिलांनी स्वतःचे ई-केवायसी करावी व त्यानंतरच पती अथवा वडील यांचे अधिकृत मृत्यू प्रमाणपत्र व घटस्फोट प्रमाणपत्र किंवा न्यायालयाच्या आदेशाची सत्यप्रत संबंधित अंगणवाडी सेविका यांच्याकडे 31 डिसेंबर 2025 पर्यंत जमा करावी. सदरची प्रक्रिया ही ऑफलाईन पध्दतीने करावयाची आहे.

या योजनेच्या https://ladakibahin.maharashtra.gov.in या Web Portal वरील e-KYC प्रक्रिया ऑनलाईन पध्दतीने अंतिम करणे आवश्यक असल्याने त्या Web Portal वर आवश्यक त्या सुधारणा करण्यात आलेल्या आहेत. त्यानुषंगाने या पात्र लाभार्थी महिलांनी योजनेच्या Web Portal वर भेट देवून e-KYC प्रक्रिया ऑनलाईन पध्दतीने अंतिम (पूर्ण) करण्यात यावी.

सदर योजनेतील ज्या पात्र लाभार्थी महिलांनी e-KYC प्रक्रिया पुर्ण केली आहे व त्यांच्याकडून पर्याय निवडताना काही चुका झाल्या असतील, तर अशा लाभार्थ्यांना पुनःश्च योजनेच्या Web Portal वर e-KYC प्रक्रिया पूर्ण करण्याची एक अंतिम संधी (One Time Edit Option) 31 डिसेंबर 2025 पर्यंत उपलब्ध करुन देण्यात येत आहे. तथापि, ही संधी शेवटची असणार आहे. त्यानंतर त्यामध्ये कोणताही बदल करण्याचा पर्याय उपलब्ध होणार नसल्याने काळजीपूर्वक माहिती भरण्यात यावी. जिल्ह्यातील लाभार्थ्यांनी त्वरीत प्रक्रीया पूर्ण करावी, असे आावाहन जिल्हा महिला व बालविकास अधिकारी मिनाक्षी भस्मे यांनी केले आहे.

००००००

राज्यांतर्गत अन्नधान्य कडधान्य व गळीतधान्य पिकांच्या पिकस्पर्धा

राज्यांतर्गत अन्नधान्य कडधान्य व गळीतधान्य पिकांच्या पिकस्पर्धा

चंद्रपूर, दि. 17 :   राज्यामध्ये पिकाची उत्पादकता वाढविण्यासाठी विविध भागांमध्ये शेतक-यांकडून विविध प्रयोग करण्यात येतात व उत्पादकतेत वाढ करण्यात येते. अशा प्रयोगशील शेतकऱ्यांना मिळालेल्या उत्पादकतेबाबत प्रोत्साहन देऊन गौरव केल्यास कृषी उत्पादनामध्ये भर घालण्यासाठी शेतकऱ्यांचे योगदान मिळेल. तसेच त्यांचे मार्गदर्शन परिसरातील इतर शेतकऱ्यांना होऊन राज्याच्या एकूण उत्पादनात मोलाची भर पडेल, हा उद्देश ठेऊन राज्यांतर्गत पीकस्पर्धा योजना राबविण्यात येत आहे.

रब्बी हंगाम 2025 मध्येही पिकस्पर्धा मागील वर्षाप्रमाणे तालुका, जिल्हा व राज्य पातळीवर राबविण्यात येत आहेत. त्यानुसार कृषी विभागामार्फत रब्बी हंगाम सन 2025 मध्ये सर्वसाधारण व आदिवासी गटासाठी ज्वारी, गहू, हरभरा, करडई व जवस या 5 पिकासाठी पिकस्पर्धेचे आयोजन करण्यात येत आहे.

पात्रता : स्पर्धेत भाग घेण्यासाठी शेतकऱ्याकडे स्वतःच्या नावे जमीन असणे व ती जमीन तो स्वतः कसत असणे आवश्यक आहे. स्पर्धेत भाग घेणाऱ्या शेतकऱ्याला एकाच वेळी एकापेक्षा जास्त पिकासाठी स्पर्धेत भाग घेता येईल. पिकस्पर्धेमध्ये सहभागी लाभार्थ्यांच्या स्वतःच्या शेतावर त्या पिकाखाली किमान 40 आर क्षेत्रावर सलग लागवड असणे आवश्यक आहे.

अर्ज करण्यासाठी आवश्यक कागदपत्रे : विहित नमुन्यातील अर्ज (प्रपत्र-अ),ठरवून दिलेले प्रवेश शुल्क भरल्याचे चलन, 7/12, 8-अ चा उतारा, जात प्रमाणपत्र (आदिवासी असल्यास),  पिकस्पर्धेसाठी शेतकऱ्याने संबंधित 7/12 वरील घोषित केलेल्या क्षेत्राचा चिन्हांकित केलेला नकाशा जोडणे आवश्यक, बैंक खाते चेक/ पासबुक च्या पहिल्या पानाची छायांकित प्रत.

अर्ज दाखल करण्याची अंतिम तारीख :  रब्बी हंगामामध्ये पीक स्पर्धेची अर्ज दाखल करण्याची तारीख खालील प्रमाणे राहील.  ज्वारी, गहू, हरभरा, करडई व जवस पिकासाठी 31 डिसेंबर 2025. तालुकास्तर, जिल्हास्तर व राज्यस्तरावरील पिकस्पर्धा निकाल प्रथम, द्वितीय व तृतीय क्रमांकाचे पीक स्पर्धा विजेते निवडण्यात येतील.

स्पर्धेसाठी प्रवेश शुल्क : पीकनिहाय सर्वसाधारण गटासाठी 300 रुपये व आदिवासी गटासाठी 150 रुपये

बक्षिस स्वरूप :  तालुका पातळीवर प्रथम बक्षीस 5 हजार, द्वितीय 3 हजार आणि तृतीय 2 हजार रुपये. जिल्हा पातळीवर प्रथम बक्षीस 10 हजार, द्वितीय 7 हजार आणि तृतीय 5 हजार रुपये. राज्य पातळीवर प्रथम बक्षीस 50 हजार, द्वितीय 40 हजार आणि तृतीय 30 हजार रुपये.

उपरोक्त नमूद पिकांच्या क्षेत्रात आणि उत्पादनात वाढ व्हावी याकरीता जास्तीतजास्त शेतकऱ्यांनी पिक स्पर्धेत सहभागी व्हावे, असे आवाहन कृषी विभागामार्फत करण्यात येत आहे. पिकस्पर्धेबाबत अधिक माहितीसाठी शेतक-यांनी संबंधित तालुका कृषी अधिकारी कार्यालयाशी संपर्क साधावा. तसेच महाराष्ट्र शासन कृषी विभागाचे संकेतस्थळ http://krishi.maharashtra.gov.in ला भेट द्यावी.

००००००

जिल्ह्यातील सहा पीएचसींना ‘राष्ट्रीय गुणवत्ता प्रमाणपत्र’ जाहीर

जिल्ह्यातील सहा पीएचसींना ‘राष्ट्रीय गुणवत्ता प्रमाणपत्र’ जाहीर

चंद्रपूर, दि. 16 : ग्रामीण भागातील नागरिकांना दर्जेदार आरोग्य सेवा देण्यात चंद्रपूर जिल्ह्याने मोठी झेप घेतली आहे. जिल्ह्यातील पाच तालुक्यातील सहा प्राथमिक आरोग्य केंद्रांनी केंद्र सरकारच्या आरोग्य व कुटुंब कल्याण मंत्रालयाकडून दिला जाणारा 'राष्ट्रीय गुणवत्ता आश्वासन मानक' (NQAS) हा अत्यंत मानाचा बहुमान पटकावला आहे.

बाह्य परीक्षकांनी केलेल्या कडक मूल्यमापनात राजोली (ता. मुल) प्राथमिक आरोग्य केंद्राने 88.55 टक्के गुण, नेरी (ता. चिमूर) प्रा.आ.केंद्राने 88.99 टक्के गुण, वाढोणा (ता. नागभीड) प्रा.आ.केंद्राने 87.38 टक्के गुण,  बाळापुर (ता. नागभीड)  प्रा.आ. केंद्राने 89.84 टक्के गुण, मोहाडी नलेश्वर (ता. सिंदेवाही) प्रा.आ.केंद्राने 92.92 टक्के गुण व कळमना (ता. बल्लारपूर) प्राथमिक आरोग्य केंद्राने 93.51 टक्के गुण मिळवून जिल्ह्याच्या शिरपेचात मानाचा तुरा रोवला आहे.

असे झाले 'क्वालिटी' ऑडिट : नोव्हेंबर 2025 या महिन्यामध्ये या सर्व प्राथमिक आरोग्य केंद्राचे,  केंद्रीय पथकाद्वारे सूक्ष्म निरीक्षण करण्यात आले. यामध्ये दवाखान्याची स्वच्छता, औषधांची उपलब्धता, रुग्णांना मिळणारी वागणूक, गुणवत्ता पूर्ण सेवा, प्रसूती कक्षातील सोयी, प्रयोगशाळेतील अचूकता आणि आपत्कालीन परिस्थिती हाताळण्याचे कर्मचाऱ्यांचे कौशल्य, जंतुसंसर्ग नियंत्रण, मागील वर्षभरात किती रुग्णांनी सेवेचा लाभ घेतला व लाभार्थ्यांचे अभिप्राय अशा सर्व निकषानुसार या संस्थेचे मूल्यमापन करण्यात आले.

गुणवत्ता टिकवून ठेवण्यासाठी पुढील 'ॲक्शन प्लॅन' : केवळ प्रमाणपत्र मिळवणे हे आरोग्य विभागाचे उद्दिष्ट नसून ही गुणवत्ता निरंतर टिकवून ठेवण्यासाठी खालील बाबींवर विशेष भर दिला जाणार आहे. यात 1) मूल्यमापन अहवालात सुचवलेल्या किरकोळ त्रुटी दूर करून 100 टक्के उद्दिष्टाकडे वाटचाल करणे. 2) रुग्णांना अधिक आपुलकीची आणि तांत्रिकदृष्ट्या सक्षम सेवा मिळावी यासाठी कर्मचाऱ्यांचे नियमित प्रशिक्षण घेणे. 3) स्थानिक स्तरावर गुणवत्ता नियंत्रण समिती स्थापन करून दरमहा आरोग्य सेवांचा आढावा, 4) रुग्णांच्या सूचना आणि तक्रारींसाठी विशेष यंत्रणा राबवून त्याद्वारे सेवेचा दर्जा अधिक सुधारण्यावर भर राहणार आहे.

आरोग्य संस्थाचा चेहरामोहरा बदलण्यास मदत : जिल्हा आरोग्य अधिकारी डॉ. अशोक कटारे

प्रमाणपत्र हा केवळ कागदोपत्री सन्मान नसून जिल्ह्यातील सर्वसामान्य जनतेला मिळणाऱ्या उत्तम आरोग्याचा पुरावा आहे. आमच्या सर्व डॉक्टर्स आणि कर्मचाऱ्यांच्या सांघिक परिश्रमाचे हे फळ आहे, जिल्ह्यातील संपूर्ण आरोग्य यंत्रणा जिल्हाधिकारी विनय गौडा जी. सी., मुख्य कार्यकारी अधिकारी पुलकित सिंग यांच्या विशेष नियंत्रणाखाली आणि मार्गदर्शनाखाली कार्यरत असल्यामुळे जिल्ह्याला हा बहुमान मिळाला आहे. जिल्ह्यातील जिल्ह्यातील प्राथमिक आरोग्य केद्रांनी 85 टक्क्यांपेक्षा अधिक गुण मिळवले असून या प्रमाणपत्रामुळे आता केंद्राकडून विशेष प्रोत्साहनपर निधी मिळणार व त्यातून आरोग्य सेवांचा चेहरामोहरा  बदलणार आहे, असे जिल्हा आरोग्य अधिकारी डॉ. अशोक कटारे यांनी सांगितले.

००००००

विभागीय क्रीडा स्पर्धा व विज्ञान प्रदर्शनीचा समारोप

विभागीय क्रीडा स्पर्धा व विज्ञान प्रदर्शनीचा समारोप

Ø मान्यवरांच्या हस्ते बक्षीस वितरण कार्यक्रम

चंद्रपूर, दि. 16 : एकात्मिक आदिवासी विकास प्रकल्प चंद्रपूरच्या वतीने आयोजित विभागीय क्रीडा स्पर्धा व विज्ञान प्रदर्शनीचा समारोप व बक्षीस वितरणाचा कार्यक्रम जिल्हा क्रीडा संकूल येथे सोमवारी पार पडला.   

कार्यक्रमाच्या अध्यक्षस्थानी तथा उदघाटक म्हणून अपर आयुक्त आयुषी  सिंह, तसेच विशेष अतिथी म्हणून सहआयुक्त दिगांबर चव्हाण, श्री. सोनकवडे, गडचिरोलीचे प्रकल्प अधिकारी रणजीत सिंग, अमर राऊत उमेश काशीद (प्रकल्प अधिकारी देवरी), नितीन इसोकर (प्रकल्प अधिकारी नागपूर), आंबेडकर महादियालयाचे  प्राचार्य डॉ. दहेगावकर, चंद्रपूर आणि चिमूरचे प्रकल्प अधिकारी विकास राचेलवार, रोशनी चव्हाण, डॉ. सायली चिखलीकर आादी उपस्थित होते.

या विभागीय क्रीडा स्पर्धांमध्ये नागपूर विभागांतर्गत येणाऱ्या विविध जिल्ह्यांतील आदिवासी विकास विभागातील अधिकारी, कर्मचारी, प्रकल्प कार्यालये, शासकीय आश्रमशाळाचे मुख्याध्यापक, शाळांचे प्रतिनिधी शिक्षक, जवळपास 3500 विदयार्थी मोठ्या संख्येने सहभागी झाले होते. सदर स्पर्धांमध्ये कबड्डी, खो-खो, व्हॉलीबॉल, हॅन्डाबाल, ॲथलेटिक्स (धावणे, चालणे, लांब उडी, उंच उडी, गोळाफेक, थाळीफेक, ) आदी क्रीडा प्रकारांचा समावेश करण्यात आला होता. विभागीय क्रीडा स्पर्धांच्या माध्यमातून विद्यार्थ्यांच्या क्रीडा कौशल्यांना व संघभावनेला चालना मिळाली, तर विज्ञान प्रदर्शनातून विद्यार्थ्यांच्या वैज्ञानिक विचारसरणी, नाविन्यपूर्ण संकल्पना व सर्जनशीलतेचे दर्शन घडले.

यावेळी अपर आयुक्त आयुषी सिंह यांनी  शासकीय आश्रम शाळातील विद्यार्थ्यांच्या शारीरिक व मानसिक सुदृढतेसाठी क्रीडा स्पर्धांचे महत्त्व अधोरेखित केले. आदिवासी विकास विभागातील विद्यार्थ्यांमध्ये  समन्वय, संघभावना व कार्यक्षमता वाढविण्यासाठी अशा क्रीडा स्पर्धा उपयुक्त ठरतात. तसेच विज्ञान प्रदर्शनीच्या माध्यामातून विद्यार्थ्यांमध्ये वैज्ञानिक  दृष्टीकोण जागृत होण्यास मदत होईल, असेही मत त्यांनी व्यक्त केले. तसेच उत्तम, नियोजनबध्द सर्व स्पर्धांचे आयोजन केल्याबददल प्रकल्प अधिकारी चंद्रपूर यांचे विशेष कौतुक व सत्कार केला.

प्रकल्प अधिकारी विकास राचेलवार यांनी विभागीय क्रीडा स्पर्धा व विभागीय विज्ञान प्रदर्शनी यशस्वीपणे पार पाडण्यासाठी मोलाचे योगदान दिल्याबद्दल सहभागी सर्व प्रकल्प कार्यालय चंद्रपूर व चिमूर येथील सर्व अधिकारी कर्मचारी तसेच सर्व समितीतील प्रमुख, उपप्रमुख, सर्व सदस्य, सर्व मुख्याध्यापक, क्रीडा समन्वयक तसेच संघ व्यवस्थापक यांचे मनःपूर्वक आभार व्यक्त करतो. आपल्या सर्वांच्या नियोजनबद्ध कार्यपद्धतीमुळे, समन्वयामुळे व अथक परिश्रमामुळे सदर स्पर्धा अत्यंत शिस्तबद्ध, उत्साही व यशस्वीरीत्या संपन्न झाल्या. खेळाडूंना प्रोत्साहन देणे, स्पर्धांचे सुरळीत आयोजन करणे व आदिवासी विद्यार्थ्यांमध्ये क्रीडा गुणांना चालना देण्यासाठी आपण दिलेले योगदान अत्यंत प्रेरणादायी आहे.

समारोपीय कार्यक्रमाचे प्रास्ताविक प्रकल्प अधिकारी विकास राचेलवार यांनी केले. संचालन सपना पिंपळकर आणि उमेश कडू यांनी तर आभार राजीव बोंगिरवार यांनी  मानले.

बक्षिस वितरण : विज्ञान प्रदर्शनी निकाल

प्राथमिक गटात प्रथम क्रमांक अर्चना कांदो (अनु. आश्रम शाळा गुंडापल्ली) हिच्या इंधन वाचवणारी चुल या प्रयोगाला, द्वितीय क्रमांक सोनाक्षी व संध्या यांच्या लेजर लेंस मायक्रोस्कोप. माध्यमिक गटात प्रथम क्रमांक

स्वाती रामू घरात, द्वितीय क्रमांक सुमित प्रमोद आलामच्या अन्न कचरा व्यवस्थापन. उच्च माध्यमिक गटात प्रथम क्रमांक पल्लवी इष्टाम व वेदिका येरकाडे यांच्या ऑटोमॅटीक कार्बन डायऑक्साईड अणि युव्ही वाटर फिल्टर या प्रयोगाला, द्वितीय क्रमांक निकीता प्रसादी काटेंगे यांना मिळाला.

सांस्कृतिक कार्यक्रम निकाल : प्रथम क्रमांक थीम डान्स बेला रुपेला, द्वितीय क्रमांक जंगोम लढाई डान्स

प्लेअर ऑफ टुर्नामेंट : 19 वर्षाखालील मुले – अनिल दुलस्सा वडे, 19 वर्षाखालील मुली – रोशनी राजु पुंगाटी भामरागड, 17 वर्षाखालील मुले – सुरज विजय दुर्वा, भामरागड, 17 वर्षाखालील मुली – अल्का रामदास मरस्कोल्हे, देवरी, 14 वर्षाखालील मूले - गणेश लालसु मटटामी, भामरागड, 14 वर्षाखालील मूली -  दिक्षा वसंत सडमेक, अहेरी.            या सर्व विद्यार्थ्यांना स्पोर्ट रेंजर सायकल भेट देण्यात आली.

अंतिम निकाल : सर्व वैयक्तिक ॲथलेटिक्स (धावणे, चालणे, लांब उडी, उंच उडी, गोळाफेक, थाळीफेक, व सांघिक कबड्डी, खो-खो, व्हॉलीबॉल, हॅन्डाबाल सामने मिळून) सर्वसाधारण विजेता – प्रकल्प भामरागड – प्राप्त गुण 489, सर्वसाधारण उपविजेता – प्रकल्प देवरी – प्राप्त गुण 249, तृतीय विजेता – प्रकल्प गडचिरोली - प्राप्त गुण 223. विजयी  विदयार्थ्यांना शिल्ड, प्रशस्तीपत्र, सायकल तथा सन्माचिन्ह देवून गौरवण्यिात आले.

०००००००

दुर्गापूर प्राथमिक आरोग्य केंद्राला सचिवांची भेट

दुर्गापूर प्राथमिक आरोग्य केंद्राला सचिवांची भेट

चंद्रपूर, दि. 16 : चंद्रपूर जिल्ह्यातील दुर्गापूर येथील प्राथमिक आरोग्य केंद्राला सार्वजनिक आरोग्य विभागाचे सचिव ई.रवेंदिरन यांनी भेट दिली. या भेटीदरम्यान त्यांनी प्राथमिक आरोग्य केंद्रातील स्वच्छता, वैद्यकीय सुविधा, रुग्णसेवा, औषधसाठा, मनुष्यबळ तसेच विविध राष्ट्रीय आरोग्य कार्यक्रमांच्या अंमलबजावणीची पाहणी केली.

यावेळी सचिवांनी आरोग्य केंद्रातील ओपीडी, प्रसूती कक्ष, लसीकरण विभाग, प्रयोगशाळा आयुष्यमान कार्ड, आभा कार्ड तसेच स्वच्छता व पायाभूत सुविधांचा आढावा घेतला. रुग्णांना दिल्या जाणाऱ्या सेवा अधिक गुणवत्तापूर्ण व वेळेत मिळाव्यात, यासाठी आवश्यक सूचना संबंधित अधिकाऱ्यांना दिल्या. तसेच, ग्रामीण भागातील नागरिकांना सुलभ, दर्जेदार व प्रभावी आरोग्य सेवा मिळाव्यात, यावर त्यांनी विशेष भर दिला. आरोग्य कर्मचाऱ्यांशी संवाद साधून त्यांच्या अडचणी जाणून घेतल्या.

या भेटीप्रसंगी जिल्हा आरोग्य अधिकारी डॉ. अशोक कटारे, तालुका आरोग्य अधिकारी डॉ. कोमल मुनेश्वर, वैद्यकीय अधिकारी डॉ. अमित जैस्वाल, डॉ. माधुरी मेश्राम यांच्यासह आरोग्य कर्मचारी, संबंधित अधिकारी व आशा स्वयंसेविका उपस्थित होते.

००००००

निर्लेखित वाहनांच्या विक्रीकरीता 23 डिसेंबर पर्यंत निविदा आमंत्रित

 

निर्लेखित वाहनांच्या विक्रीकरीता 23 डिसेंबर पर्यंत निविदा आमंत्रित

चंद्रपूर, दि. 16 : निर्लेखित शासकीय वाहनांची विक्री ज्या स्थितीत व जेथे आहे त्या स्थितीत करण्यासाठी इच्छुक खरेदी दारांकडून 23 डिसेंबर 2025 च्या दुपारी 2 वाजेपर्यंत मोहरबंद निविदा मागविण्यात येत आहे.

इन्होव्हा डी व्ही वाहन (क्र. MH३४-९९००) ची उपप्रादेशिक परिवहनन अधिकारी यांनी ठरवून दिलेली बाजारमुल्य किंमत रुपये 3 लक्ष 50 हजार रुपये आहे. सदर वाहन जिल्हाधिकारी कार्यालयाच्या प्रांगणात उभे आहे.

निविदा फार्मची 1 हजार रुपये असून ते सहाय्यक जिल्हा नाझर, जिल्हा कार्यालय, चंद्रपूर यांच्याकडे कार्यालयीन वेळेत 23 डिसेंबर 2025 च्या दुपारी 2 वाजेपर्यंत प्राप्त करता येईल. लिलावातील अटी व शर्ती बाबत उल्लेख  निविदा फार्म मध्ये राहील. त्याच्या अधिन राहून निविदा स्विकारल्या जातील. प्राप्त निविदा 23 डिसेंबर रोजी दुपारी 4 वाजता उपस्थितांसमोर उघडण्यात येतील.

वरील शासकीय वाहनांचे बाबतीत पुरेशा निविदा प्राप्त न झाल्यास शासकीय वाहनाची विक्री बाबत खुली बोली बोलून लिलाव त्याच दिवशी करण्यात येईल, असे निवासी उपजिल्हाधिकारी डी. एस. कुंभार यांनी कळविले आहे.

००००००

वन अकादमी आणि नागपूर आयआयएम यांच्यात सहकार्यासाठी करार

वन अकादमी आणि नागपूर आयआयएम यांच्यात सहकार्यासाठी करार

चंद्रपूर, दि. 16 :   वन प्रशासन व नैसर्गिक संसाधन व्यवस्थापन क्षेत्रातील प्रशिक्षण क्षमता व संशोधन बळकट करण्याच्या दिशेने चंद्रपूर वन अकादमी आणि इंडियन इन्स्टिट्यूट ऑफ मॅनेजमेंट (आयआयएम) नागपूर यांच्यात सामंजस्य करार नुकताच करण्यात आला. हा करार वन अकादमीचे संचालक एम. एस. रेड्डी आणि नागपूर आयआयएमचे संचालक डॉ. भीमराव मेत्री यांच्या स्वाक्षरीने झाला. या कार्यक्रमाला प्रा. अनूप कुमार, अधिष्ठाता (शिक्षण कार्यक्रम) आलोक कुमार सिंह, वन अकादमीचे अतिरिक्त संचालक उमेश वर्मा आदी उपस्थित होते.

चंद्रपूर वन अकादमी ही महाराष्ट्र शासनाच्या वन विभागांतर्गत स्वायत्त संस्था असून वन अधिकाऱ्यांसाठी तांत्रिक प्रशिक्षण देणारी प्रमुख संस्था आहे. पर्यावरण, नैसर्गिक संसाधन व्यवस्थापन, वन्यजीव, हवामान बदल आणि संबंधित क्षेत्रातील शिक्षण, प्रशिक्षण व संशोधन या महत्त्वाच्या कार्यात ही संस्था सक्रिय आहे. याप्रसंगी बोलताना एम. एस. रेड्डी म्हणाले, या करारामुळे नैसर्गिक संपदा व्यवस्थापन, सरकारी कर्मचाऱ्यांचे कौशल्य नकाशांक,  धोरणात्मक नेतृत्व, प्रभावी संवादकला, टीम बिल्डिंग, शाश्वत विकास, पर्यावरणीय व सामाजिक शासन तसेच वन प्रशासन अधिक सक्षम करण्यासाठी विविध प्रशिक्षण कार्यक्रम व संशोधन उपक्रम विकसित करण्यास मदत होईल. हे उपक्रम वन अधिकाऱ्यांसाठी अत्यंत उपयुक्त ठरणार असल्याचे त्यांनी नमूद केले.

या कराराचा उद्देश आयआयएम नागपूरच्या व्यवस्थापन व नेतृत्वक्षेत्रातील तज्ज्ञता आणि चंद्रपूर वन अकादमीचा क्षेत्राधारित अनुभव यांना एकत्र आणून अभिनव प्रशिक्षण पद्धती आणि प्रभावी धोरण संशोधन पुढे नेण्याचा आहे. या करारामुळे वन क्षेत्रातील भावी नेतृत्व घडविणे आणि नैसर्गिक संसाधनांच्या शाश्वत व्यवस्थापनाला बळकटी मिळण्यास मदत होणार आहे, असे अपर संचालक (प्रशिक्षण) उमेश वर्मा यांनी कळविले आहे.

००००००

अनुसूचित जमाती प्रमाणपत्र तपासणी समितीच्या एका पदासाठी अर्ज आमंत्रित

 अनुसूचित जमाती प्रमाणपत्र तपासणी समितीच्या एका पदासाठी अर्ज आमंत्रित

चंद्रपूर, दि. 16 : सामान्य प्रशासन विभागाच्या 17 डिसेंबर 2016 अन्वये शासकीय निमशासकीय सेवानिवृत्त अधिकाऱ्यांच्या सेवा करार पध्दतीने विवक्षित कामासाठी घेण्याबाबत शासन निर्णयात नमुद आहे. त्याअनुषंगाने अनुसूचित जमाती प्रमाणपत्र तपासणी समितीकडील पोलिस दक्षता पथकाकडे प्रलंबित असलेल्या व उमेदवारांकडून समिती कार्यालयास नव्याने प्राप्त हेणाऱ्या प्रकरणात सखोली चौकशी करणे तसेच महसुली, शासकीय व इतर शैक्षणिक दस्ताऐवजांची पडताळणी झाल्यानंतर विहीत कालमर्यादित अहवाल समितीला सादर करण्यासाठी 11 महिन्याकरिता करार पध्दतीने सेवानिवृत्त पोलिस निरीक्षकाच्या एका पदाची नियुक्ती करावयाची आहे.

तरी इच्छूक उमेदवारांनी 23 डिसेंबर 2025 रोजी दुपारी 12 वाजता अनुसूचित जमाती प्रमाणपत्र तपासणी समिती, विद्या विहार शाळेच्या मागे, डॉ. ए. पी. पिल्लई आय. टी. आय. कॉलेज च्या वर, दुसरा माळा, छत्रपती नगर, तुकूम, चंद्रपूर येथे उपस्थित राहावे, असे सह आयुक्त रामचंद्र सोनकवडे यांनी कळविले आहे.

००००००

सैनिक कल्याण विभागाच्या लिपिक टंकलेखक पदासाठी अर्ज भरण्याकरिता 31 डिसेंबरपर्यंत मुदतवाढ

 सैनिक कल्याण विभागाच्या लिपिक टंकलेखक पदासाठी अर्ज भरण्याकरिता 31 डिसेंबरपर्यंत मुदतवाढ

चंद्रपूर, दि. 16 : सैनिक कल्याण विभागाच्या अधिपत्याखालील जिल्हा सैनिक कल्याण कार्यालयातील लिपिक टंकलेखक (गट-क) एकूण 72 पदाकरीता महाराष्ट्र राज्याचे अधिवास असलेल्या माजी सैनिक व युध्द काळात किंवा युध्द नसताना सैनिकी सेवेत मृत झालेल्या किंवा अपंगत्व येऊन त्यामुळे नोकरीसाठी अयोग्य झालेल्या माजी सैनिकांच्या कुटुंबातील फक्त एका पात्र उमेदवारांकडून ऑनलाईन पध्दतीने अर्ज मागविण्यात येत आहेत. वरील पदापैकी 3 पदे हे अपंग संवर्गातून किमान 40 टक्के अपंगत्व असलेल्या उमेदवारामधून दिव्यांगत्वाच्या प्रकारांनुसार कर्तव्ये व जबाबदारीचा विचार करून गुणवत्ता/उपलब्धतेनुसार भरण्यात येईल.

सदर भरती प्रक्रिया टिसीएस आयओएन यांच्यामार्फत होणार आहे. परीक्षेसाठी अर्ज फक्त ऑनलाईन पध्दतीने स्वीकारण्यात येतील. इतर कोणत्याही प्रकारे अर्ज स्वीकारण्यात येणार नाहीत. पात्र उमेदवारांना वेब बेस्ड (Web-based) ऑन लाईन अर्ज www.mahasainik.maharashtra.gov.in या संकेतस्थळावर (Resources Tab ----- Recruitment Tab येथे दिनांक 31 डिसेंबर 2025 रोजी मध्यरात्री 23.59 वाजेपर्यंत सादर करणे आवश्यक राहील. त्यानंतर सदर वेबलिंक बंद होईल, असे सैनिक कल्याण अधिकारी कार्यालयाने कळविले आहे.

००००००

प्रधान सचिव विजय वाघमारे यांची आदिवासी विभागीय क्रीडा स्पर्धेस भेट

प्रधान सचिव विजय वाघमारे यांची आदिवासी विभागीय क्रीडा स्पर्धेस भेट 

स्पर्धेदरम्यान भव्य सांस्कृतिक कार्यक्रमाचे आयोजन

 

चंद्रपूर, दि. 15 : आदिवासी विकास विभागाचे प्रधान सचिव विजय वाघमारे यांनी दि. 13 ते 15 डिसेंबर 2025 दरम्यान एकात्मिक आदिवासी विकास प्रकल्प, चंद्रपूर यांच्या वतीने आयोजित आदिवासी विभागीय क्रीडा स्पर्धेस सदिच्छा भेट दिली. यावेळी त्यांनी क्रीडा स्पर्धांचा सविस्तर आढावा घेत खेळाडू विद्यार्थ्यांशी संवाद साधला.

 प्रधान सचिवांनी विभागीय विज्ञान प्रदर्शनीस भेट देत विद्यार्थ्यांनी सादर केलेल्या वैज्ञानिक प्रकल्पांची पाहणी केली व त्यांचे कौतुक केले. तसेच क्रीडा स्पर्धेदरम्यान उभारण्यात आलेल्या आरोग्य कक्षास भेट देऊन वैद्यकीय सुविधा व खेळाडू विद्यार्थ्यांच्या आरोग्यविषयक काळजीबाबत माहिती घेतली. यानंतर समर कॅम्पमध्ये विद्यार्थ्यांनी तयार केलेल्या वस्तूंच्या प्रदर्शनीस भेट देत विद्यार्थ्यांच्या कौशल्यांचे व सर्जनशीलतेचे विशेष कौतुक केले.

यावेळी विजय वाघमारे यांनी विद्यार्थ्यांना खेळ, शिक्षण व आरोग्य यांचा समतोल राखण्याचा सल्ला देत त्यांच्या उज्ज्वल भविष्यासाठी शुभेच्छा दिल्या. या भेटीमुळे विद्यार्थ्यांमध्ये उत्साहाचे वातावरण निर्माण झाले असून क्रीडा, विज्ञान व कौशल्य विकासाला चालना मिळेल, असा विश्वास त्यांनी व्यक्त केला.

भव्य सांस्कृतिक कार्यक्रमाने रंगत

14 डिसेंबर 2025 रोजी सायंकाळी विभागीय क्रीडा स्पर्धेच्या निमित्ताने भव्य सांस्कृतिक कार्यक्रमाचे आयोजन करण्यात आले. या कार्यक्रमाचे उद्घाटन पद्मश्री डॉ. परशुरामजी खुणे, ख्यातनाम झाडीपट्टी नाट्यकलावंत यांच्या हस्ते झाले. या प्रसंगी विशेष अतिथी म्हणून नगरपालिका प्रशासन अधिकारी विद्या गायकवाड, कलावंत तथा गायक अनिरुद्ध वनकर, प्रकल्प अधिकारी विकास राचेलवार,  दीपक हेडाऊ (भंडारा),  उमेश काशीद (देवरी) व उषा विकास राचेलवार उपस्थित होते.

आदिवासी विकास विभागातील एकूण 9 प्रकल्पांतील विद्यार्थ्यांनी या सांस्कृतिक कार्यक्रमात सहभाग घेत आदिवासी संस्कृतीवर आधारित पारंपरिक नृत्य, गीत, वेशभूषा व लोककलेचे सादरीकरण केले. विद्यार्थ्यांना आपल्या सांस्कृतिक वारशाचे प्रभावी सादरीकरण करण्याची संधी मिळाली.

पद्मश्री डॉ. परशुरामजी खुणे यांनी आपल्या मनोगतात सांगितले की, “या क्रीडा स्पर्धा केवळ शारीरिक क्षमतेचे नव्हे तर एकात्मता, शिस्त, संघभावना व सांस्कृतिक जाणीवेचे प्रतिबिंब आहेत. खेळ व कला यांच्या माध्यमातून व्यक्तिमत्त्वाचा समतोल विकास होतो.” डॉ. अनिरुद्ध वनकर यांनी आदिवासी संस्कृतीचे जतन व संवर्धन ही सामूहिक जबाबदारी असल्याचे नमूद करत विद्यार्थ्यांनी व्यसनांपासून दूर राहून अभ्यासात प्रगती करावी व उच्च पदांवर पोहोचावे, अशी अपेक्षा व्यक्त केली.

खेळाडूंची दमदार कामगिरी

या स्पर्धेत आदिवासी विद्यार्थी ॲथलेटिक्स (धावणे, चालणे, लांब उडी, उंच उडी, गोळाफेक, थाळीफेक) तसेच कबड्डी, खो-खो, व्हॉलीबॉल, हॅन्डबॉल या सांघिक खेळांत उत्कृष्ट कौशल्य सादर करत आहेत. भविष्यात राष्ट्रीय व आंतरराष्ट्रीय स्तरावर देशाचे प्रतिनिधित्व करणारे खेळाडू घडविण्याचे प्रयत्न आदिवासी विकास विभागामार्फत सुरू आहेत.

०००००००