चंद्रपूर, दि. 20 जुलै: सफाई कामगार समन्वय समितीच्या निवेदनानुसार प्रलंबित प्रकरणे तसेच मागण्या तातडीने निकाली काढण्यासाठी जिल्हाधिकारी डॉ. कुणाल खेमनार यांच्या अध्यक्षतेखाली आज 20 जुलै 2019 रोजी वीस कलमी सभागृह येथे बैठक घेण्यात आली. या बैठकीला महानगरपालिकेचे आयुक्त संजय काकडे,उपायुक्त गजानन बोकडे, जिल्हा शल्यचिकित्सक डॉ.निवृत्ती राठोड तसेच इतर विभागाचे अधिकारी प्रामुख्याने उपस्थित होते.
या बैठकीमध्ये सफाई कामगार समन्वय समिती सोबत विविध प्रश्नांवर चर्चा करण्यात आली. यामध्ये डॉ.बाबासाहेब आंबेडकर श्रमसाफल्य आवास योजनेअंतर्गत जागा उपलब्ध करून द्यावी. प्रलंबित असलेली वारसांन हक्काचे प्रकरण निकाली काढण्यात यावे. सातवा वेतन आयोग लागू करण्यात यावा. कामगारांना आवश्यक असलेले सफाई साहित्य व इतर किरकोळ सामान उपलब्ध करून द्यावे. सफाई कर्मचाऱ्यांच्या वस्तीचे सौंदर्यीकरण दलित वस्ती सुधार निधी अंतर्गत करून देण्यात यावे. लाड पागे समिती नुसार वारसा हक्क लागू करण्यात यावे. ग्रामीण रुग्णालयात कार्यरत कामगारांना दुसऱ्या व चौथ्या शनिवारची शासकीय सुट्टी लागू करावी. सेवानिवृत्त कर्मचाऱ्यांची सेवानिवृत्तीनंतरचे लाभ तात्काळ देण्यात यावे. लैंगिक शोषणाचे प्रमाण वाढत असल्याने मुलींच्या आश्रमशाळेत महिला कर्मचा-यांची तात्पूरती अथवा कायम स्वरूपात नियुक्ती करण्यात यावी. या मुख्य मागण्यांवर जिल्हाधिकाऱ्यांसमक्ष सफाई कामगार समन्वय समितीने प्रकाश टाकला.
यानंतर जिल्हाधिकाऱ्यांनी संपूर्ण प्रश्न समजून घेत विविध विभागांच्या अधिकाऱ्यांना सूचना केल्या. यामध्ये सफाई कामगारांसाठी श्रमसाफल्य योजनेअंतर्गत भविष्यातील गरज लक्षात घेऊन येत्या पंधरा दिवसात महानगरपालिकेमार्फत जागा निश्चित करावी किंवा समन्वय समितीने स्वतः जागा सुचवावी. आवास योजनेच्या लाभार्थ्यांची यादी सोमवारला प्रकाशित करावी. तसेच 31 जुलैपर्यंत सुनावणी घेऊन वारसांचा प्रश्न सोडवावा. सफाई कामगारांना प्रधानमंत्री जीवन सुरक्षा योजनेचा लाभ मिळवून देण्याकरिता विशेष शिबिर आयोजित करावे. त्यात महानगरपालिका प्रशासनाने सफाई कामगारांबद्दल असलेल्या संपूर्ण योजनांची माहिती द्यावी. दर दोन महिन्यांनी महानगरपालिकेने सफाई कामगार समन्वय समितीसोबत बैठक घेऊन प्रत्येक मागणीचा पाठपुरावा करावा, अशा सूचना महानगरपालिका प्रशासनाला दिल्या. सफाई कामगारांच्या आरोग्याची विशेष काळजी जिल्ह्याच्या आरोग्य विभागाने घेऊन दर तीन महिन्यांनी कॅन्सर, टीबी व इतर आजारांच्या तपासणीसाठी आरोग्य शिबिरे घ्यावीत, अशा सूचना आरोग्य विभागाला दिल्या. प्रत्येक मागणीचा योग्य पाठपुरावा करावा. तसेच एकात्मिक आदिवासी विकास प्रकल्प कार्यालय, मुख्य कार्यकारी अधिकारी जिल्हा परिषद कार्यालय, पोलीस विभाग, औद्योगिक प्रशिक्षण संस्थेचे प्राचार्य यांनाही जिल्हाधिकारी डॉ. कुणाल खेमनार यांनी सूचना दिल्या.
No comments:
Post a Comment