90 टक्के शासनाचे अनुदान तर उर्वरित 10% टक्के हिस्सा पालकमंत्री भरणार
चंद्रपूर, दि. 11 जुलै: महिलांसाठी विकासाच्या वाटा मोकळ्या व्हाव्यात, त्यांनी प्रगती करावी या दृष्टिकोनातून जिल्ह्यातील पाच महिला स्वयंसहाय्यता बचत गटांना मिनी ट्रॅक्टर वितरणाचा सोहळा आज 11 जुलै रोजी राज्याचे वित्त, नियोजन,वनेमंत्री तथा जिल्ह्याचे पालकमंत्री ना.सुधीर मुनगंटीवार यांचे हस्ते नियोजन भवन येथे पार पडला. 90% शासनाचे अनुदान व उर्वरित 10% बचत गटांचा वाटा पालकमंत्री यांनीच भरला.
यावेळी चंद्रपूर विधानसभा क्षेत्राचे आमदार नानाभाऊ शामकुळे जिल्हाधिकारी डॉ. कुणाल खेमनार, समाज कल्याण विभागाचे सहाय्यक आयुक्त प्रसाद कुलकर्णी, महिला आर्थिक विकास महामंडळाचे जिल्हा समन्वयक नरेश उगेमुगे,अधिकारी-कर्मचारी तसेच बचत गटाच्या महिला उपस्थित होत्या.
महाराष्ट्र शासन सामाजिक न्याय व विशेष सहाय्य विभागाच्या अनुसूचित जाती उपयोजना अंतर्गत 90% अर्थसहाय्य देऊन ही योजना जिल्ह्यात राबवण्यात आली. विशेष म्हणजे उर्वरित 10% असलेला बचत गटांनी भरायचा वाटा स्वतः जिल्ह्याचे पालकमंत्री सुधीर मुनगंटीवार यांनी भरला. याद्वारे जिल्ह्यातील पाच स्वयंसहायता महिला बचत गटांना मिनी ट्रॅक्टरचे वाटप करण्यात आले. त्यामध्ये करुणा स्वयंसहायता समूह चेक कोसंबी, संघटित महिला बचत गट पोंभूर्णा, रमाबाई महिला बचत गट फुटाणा, धम्मदीप महिला बचत गट पोंभूर्णा व रमाई महिला बचत गट जुनगाव या गटांचा समावेश आहे. या योजनेमुळे महिला बचत गटांना मिनी ट्रॅक्टरच्या माध्यमातून स्वतःची शेती ट्रॅक्टरच्या माध्यमातून करता येणार असून किरायाने ट्रॅक्टर देऊन स्वतःचा स्वतंत्र व्यवसाय उभा करता येणार आहे. या माध्यमातून महिलांची आर्थिक प्रगती साधली जाणार आहे व महिलांची स्वतंत्र ओळख निर्माण होणार आहे.
No comments:
Post a Comment