चंद्रपूर जिल्ह्यातील 3410 शेतकऱ्यांची कर्जमुक्तीची तिसरी यादी प्राप्त

 चंद्रपूर जिल्ह्यातील 3410 शेतकऱ्यांची कर्जमुक्तीची तिसरी यादी प्राप्त

Ø पुण्यश्लोक अहिल्यादेवी होळकर शेतकरी कर्जमुक्ती योजना 2026

Ø  पात्र शेतकऱ्यांनी आधार प्रमाणीकरण पूर्ण करण्याचे आवाहन

चंद्रपूर, दि. 13 : महाराष्ट्र शासनाच्या ‘पुण्यश्लोक अहिल्यादेवी होळकर शेतकरी कर्जमुक्ती योजना 2026’ अंतर्गत चंद्रपूर जिल्ह्यातील 3 410 पात्र शेतकऱ्यांची कर्जमुक्तीची तिसरी यादी प्राप्त झाली आहे. यात चंद्रपूर जिल्हा मध्यवर्ती सहकारी बँकेचे 312 तर राष्ट्रीयकृत बँकेच्या 3098 शेतक-यांचा समावेश आहे.

राज्य शासनाने राज्यातील 3 लाख 51 हजार शेतकऱ्यांची तिसरी यादी 12 ऑक्टोबर 2026 रोजी प्रसिद्ध केली असून, यामध्ये चंद्रपूर जिल्ह्यातील 3410 शेतकऱ्यांचा समावेश आहे. संबंधित शेतकऱ्यांनी आपल्या कर्ज थकबाकीची खातरजमा करून आधार प्रमाणीकरणाची प्रक्रिया पूर्ण करावी, असे आवाहन करण्यात आले आहे.

महाराष्ट्र शासनाने 2 जून 2026 रोजीच्या शासन निर्णयान्वये ही योजना सुरू केली आहे. या योजनेंतर्गत 1 एप्रिल 2019 ते 31 मार्च 2025 या कालावधीत वितरित झालेली, 30 सप्टेंबर 2025 पर्यंत थकीत असलेली आणि 31 मार्च 2026 पर्यंत परतफेड न झालेली पीक कर्जे तसेच पुनर्गठित व फेरपुनर्गठित कर्जांना दोन लाख रुपयांपर्यंत कर्जमुक्तीचा लाभ देण्यात येणार आहे.

या योजनेची अंमलबजावणी महाआयटीमार्फत ऑनलाइन संगणकीय प्रणालीद्वारे करण्यात येत आहे. राज्यातील विविध बँकांनी एकूण 31 लाख 17 हजार थकीत कर्ज खात्यांची माहिती योजनेच्या पोर्टलवर अपलोड केली आहे. त्यानुसार 24 जुलै 2026 रोजी राज्यातील 16 लाख 96 हजार शेतकऱ्यांची पहिली यादी, 11 सप्टेंबर 2026 रोजी 4 लाख 20 हजार शेतकऱ्यांची दुसरी यादी आणि 12 ऑक्टोबर 2026 रोजी राज्यातील 3 लाख 51 हजार शेतकऱ्यांची तिसरी यादी प्रसिद्ध करण्यात आली आहे.

बँक शाखा व ग्रामपंचायतींमध्ये उपलब्ध होणार यादी : चंद्रपूर जिल्ह्यातील तिसऱ्या यादीमध्ये समाविष्ट असलेल्या 3410 शेतकऱ्यांची नावे संबंधित बँक शाखा, विविध कार्यकारी सेवा सहकारी संस्था आणि ग्रामपंचायतींमध्ये प्रसिद्ध करण्यात येणार आहेत. शेतकऱ्यांनी संबंधित ठिकाणी आपले नाव तपासून 31 मार्च 2026 रोजीच्या कर्ज थकबाकीची खातरजमा करावी. त्यानंतर नजीकच्या आपले सेवा केंद्रावर जाऊन आधार प्रमाणीकरण पूर्ण करावे.

या यादीतील पात्र शेतकऱ्यांना संपूर्ण कर्जमुक्तीचा लाभ देण्यात येणार आहे. तसेच 1 एप्रिल 2026 नंतरचे व्याज व इतर खर्च माफ करण्यात येणार आहेत. राष्ट्रीयीकृत व व्यापारी बँकांमधील काही शेतकऱ्यांची 31 मार्च 2026 रोजीची कर्ज थकबाकी दोन लाख रुपयांपेक्षा अधिक असली, तरी शासनाच्या ‘हेअरकट’ धोरणानुसार संबंधित कर्ज खाती निरंक करण्यात येणार आहेत.

आधार प्रमाणीकरण करण्याचे आवाहन : पात्र शेतक-यांचे आधार प्रमाणीकरण प्रक्रिया पूर्ण झाल्यानंतर पात्र शेतकऱ्यांच्या कर्ज खात्यावर कर्जमुक्तीची रक्कम जमा करण्यात येणार आहे. त्यामुळे चंद्रपूर जिल्ह्यातील तिसऱ्या यादीत समाविष्ट असलेल्या सर्व 3410 शेतकऱ्यांनी आपले नाव तपासून आधार प्रमाणीकरण करून घ्यावे, असे आवाहन जिल्हा प्रशासनामार्फत करण्यात आल्याचे जिल्हा उपनिबंधक (सहकारी संस्था) जयसिंग ठाकूर यांनी कळविले आहे.

०००००००

मकोका अंतर्गत गुन्हा दाखल असलेल्या पाच फरार आरोपींचा शोध सुरू

मकोका अंतर्गत गुन्हा दाखल असलेल्या पाच फरार आरोपींचा शोध सुरू

Ø आरोपींना 27 ऑक्टोबरपर्यंत हजर राहण्याचे विशेष न्यायालयाचे आदेश

चंद्रपूर, दि. 13 : रामनगर पोलिस ठाण्यात दाखल असलेल्या महाराष्ट्र संघटित गुन्हेगारी नियंत्रण अधिनियम (मकोका) अंतर्गत गुन्ह्यातील फरार टोळीप्रमुखासह पाच आरोपींचा शोध सुरू आहे. संबंधित आरोपींनी 27 ऑक्टोबर 2026 रोजी किंवा त्यापूर्वी विशेष न्यायालय (मकोका) तथा अतिरिक्त सत्र न्यायालय, चंद्रपूर येथे हजर राहावे, यासाठी न्यायालयाने भारतीय नागरिक सुरक्षा संहितेच्या कलम 84 अन्वये उद्घोषणापत्र जारी केले आहे.

रामनगर पोलिस ठाण्यात अपराध क्रमांक 441/2026 अन्वये प्राण्यांचा छळ प्रतिबंध अधिनियम, 1960, महाराष्ट्र पशु संरक्षण अधिनियम, 1976, भारतीय न्याय संहिता (बीएनएस) तसेच महाराष्ट्र संघटित गुन्हेगारी नियंत्रण अधिनियम, 1999 मधील संबंधित कलमांनुसार गुन्हा दाखल करण्यात आला आहे.

या गुन्ह्यातील फरार आरोपींमध्ये 1) इमरान बब्बू शेख ऊर्फ इमरान कुरेशी (वय 38 वर्षे, रा. वॉर्ड क्र. 4, नरेश टॉकीज जवळ, गडचांदूर, ता. कोरपना, जि. चंद्रपूर), 2) सादीक खान नवाब खान ऊर्फ सादीक कुरेशी (वय 39 वर्षे, रा. वॉर्ड क्र. 4, अमलनाला रोड, इरिगेशन कॉलनी, गडचांदूर, ता. कोरपना), 3) वसीम रज्जाक कुरेशी (वय 33 वर्षे, रा. बबलू किराणा दुकानाजवळ, रयतवारी कॉलरी, चंद्रपूर), 4) सोहेल शेख अहमद शेख (वय 23 वर्षे, रा. महागाव, वांकडी, पोस्ट बाम्बरा, जि. कोमरामभीम, तेलंगणा) आणि 5) निजाम हमीद शेख ऊर्फ आवेश कुरेशी (वय 22 वर्षे, रा. वॉर्ड क्र. 4, लक्ष्मी टॉकीजच्या मागे, गडचांदूर, ता. कोरपना, जि. चंद्रपूर) यांचा समावेश आहे.

सदर आरोपी गुन्हा दाखल झाल्यापासून फरार असून तपास यंत्रणेला उपलब्ध झालेले नाहीत. गुन्ह्याच्या पुढील तपासासाठी त्यांची उपस्थिती आवश्यक असल्याने विशेष न्यायालय (मकोका) तथा अतिरिक्त सत्र न्यायालय, चंद्रपूरचे न्यायाधीश पी. एम. गुप्ता यांनी भारतीय नागरिक सुरक्षा संहिता, 2023 च्या कलम 84 अन्वये उद्घोषणापत्र जारी केले आहे.

त्यानुसार संबंधित पाचही आरोपींनी 27 ऑक्टोबर 2026 रोजी किंवा त्यापूर्वी न्यायालयात हजर राहणे आवश्यक आहे. फरार आरोपींचा ठावठिकाणा किंवा त्यांच्याबाबत कोणतीही विश्वसनीय माहिती असल्यास नागरिकांनी रामनगर पोलिस ठाणे, चंद्रपूर येथे माहिती द्यावी, असे चंद्रपूरचे उपविभागीय पोलिस अधिकारी प्रमोद चौगुले यांनी कळविले आहे.

०००००००

धम्मचक्र अनुप्रवर्तन दिनानिमित्त 15 आणि 16 ऑक्टोबर रोजी शहरातील वाहतूक व्यवस्थेत बदल

 

धम्मचक्र अनुप्रवर्तन दिनानिमित्त 15 आणि 16 ऑक्टोबर रोजी शहरातील वाहतूक व्यवस्थेत बदल

Ø जिल्हा पोलिस अधिक्षकांनी निर्गमित केले आदेश

चंद्रपूर, दि. 13 : शहरातील दीक्षाभूमी येथे 15 आणि 16 ऑक्टोबर रोजी धम्मचक अनुप्रवर्तन सोहळ्याचे आयोजन करण्यात येत असून सदर सोहळ्याकरीता जिल्ह्यातील व जिल्ह्याबाहेरील अनुयायी मोठ्या संख्येने येत असतात. या दरम्यान वाहतुक व रहदारीचा प्रश्न निर्माण होऊ नये तसेच कायदा व सुव्यवस्था अबाधित राहावी, म्हणून दीक्षाभूमी मैदानकडे जाणाऱ्या रहदारीच्या मार्गावरील सर्व प्रकारची वाहतूक बंद ठेवणे आवश्यक आहे. त्यामुळ शहरातील वाहतूक व्यवस्थेत बदल करण्याचे आदेश जिल्हा पोलिस अधिक्षक आयुष नोपानी यांनी निर्गमित केले आहे.

सदर आदेशानुसार 15 ऑक्टोबरच्या सकाळी 8 वाजतापासून 17 ऑक्टोच्या सकाळी 8 वाजेपर्यंत पुढीलप्रमाणे बदल करण्यात आले आहे.

दीक्षाभूमी येथे जाणाऱ्या बौध्द बांधवाची गर्दी पाहता पाण्याची टाकी चौक- जुना वरोरा नाका ते कलेक्टर बंगला रोड, हुतात्मा स्मारक जवळील रोड तसेच वरोरा नाका चौक- मित्रनगर चौक ते सिंधी पंचायत भवन व मित्रनगर चौक ते जिल्हा स्टेडीयमपर्यंत या सर्व परीसरात सर्व प्रकारच्या वाहनांना प्रवेश बंदी राहील. तसेच सदरचा सर्व परीसर ‘नो पार्किंग व नो हॉकर्स झोन’ म्हणून घोषित करण्यात येत आहे. त्यामुळे निर्देशित काळात सदर परिसरात कोणतेही वाहने, हॉकर्स लावण्यात येऊ नये.

अवजड वाहनाकरीता पर्यायी रहदारीचा मार्ग : 1) सदर अधिसुचनेच्या कालावधी दरम्यान गरजेनुसार नागपूरकडून चंद्रपुरकडे येणारी सर्व प्रकारची जड वाहने, ही हॉटेल कुंदन प्लाझा येथुन सीटीपीएस मार्गे नेहरू नगर वरून मुल रोडला जातील. 2) मुलकडून नागपुरकडे जाणारी जड वाहने ही बंगाली कॅम्प- सावरकर चौक- वरोरा नाका उड्डाणपुल  मार्गाने जातील किंवा नेहरू नगर वरून सीटीपीएस मार्गे नागपुरकडे जातील. तसेच गरजेनुसार एम.ई.एल. नाका - सावरकर चौक- वरोरा नाका उडाणपुल येथे सदर वाहने थांबवण्यात येतील. 3) बल्लारशाकडून नागपूरकडे जाणारी जड वाहने बंगाली कॅम्प- नेहरू नगर वरून सीटीपीएस मार्गे नागपुरकडे जातील किंवा पलीकडे बंगाली कॅम्प डि.आर.सी. बंकर, बायपास रोड येथे दीक्षाभूमी मार्गावरील अनुयायांची गर्दी पाहुन थांबवण्यात येईल.

शहरातील दुचाकी व चारचाकी (हलकी) वाहनाकरीता रहदारी व्यवस्था : जुना वरोरा नाका चौक ते आंबेडकर महाविद्यालय-मित्र नगर चौक- टि.वी. हॉस्पीटल पर्यंतचा मार्ग सर्व प्रकारचे वाहनाकरिता (सायकल सहीत) बंद करण्यात येत आहे. पाण्याची टाकी- विश्रामगृह- जुना वरोरा नाका हा मार्ग सर्व प्रकारचे वाहनाकरिता (सायकल सहीत) दोन्ही बाजूने बंद करण्यात येत आहे. करिता नागपूरकडून शहराकडे जाणारी वाहने (जड वाहने वगळून) वरोरा नाका- उड्डान पुल- सिध्दार्थ हॉटेल- बस स्टँड- प्रियदर्शनी चौक मार्गे शहराकडे जातील.

रामनगर, मित्र नगर, आकाशवाणी, स्नेहनगर, वडगाव परिसरात राहणाऱ्या नागरिकांनी पाण्याची टाकी -दवा बाजार-संत केवलराम चौक- दाताळा रोड मार्गे पर्यायी रस्त्याने आपली वाहने (जड वाहने वगळून) घेऊन जातील. त्याचप्रमाणे जटपुरा गेटकडून रामनगर मार्गे जुना वरोरा नाकाकडे जाणाऱ्या वाहन चालकांनी आपली वाहने पाण्याची टाकी- प्रियदर्शनी चौक- बस स्टँड- सिध्दार्थ हॉटेल -उडान पुल मार्गे नागपूरकडे जातील. दीक्षाभूमी ते संत केवलराम चौक या दरम्यान राहणा-या रहिवाशांनी आपली वाहने रस्त्याच्या बाजुला उभी न करता घोषित करण्यात आलेल्या पार्किंगमध्ये ठेवावीत.

आय.टी.आय. कॉलेज ते जिल्हा स्टेडीयम र्यंत तसेच वरोरा नाका दर्ग्याच्या उजव्या बाजूने जाणारा रस्ता-पूट्टेवार हॉस्पीटल- बुकावार हॉस्पीटल- वरोरा नाका ते पिंक प्लॅनेट पर्यंत नो पार्किंग झोन व नो हॉकर्स झोन म्हणुन घोषित करण्यात येत आहे.

दीक्षाभूमी सोहळयास येणाऱ्या नागरिकांकरिता वाहन पार्कीग स्थळ : 1) नागपूर रोडने दीक्षाभूमीकडे येणाऱ्या वाहनाकरीता शकुंतला लॉन, जनता कॉलेज समोरील पटांगण (ईदगाह मैदान) 2) शहरातून दीक्षाभूमी कडे येणारे वाहनाकरीता सेंट मायकल स्कूल मैदान, सिंधी पंचायत भवन जवळील मैदान 3) वडगांव, आकाशवाणी व लगतच्या परिसरातून दीक्षाभूमीकडे येणारी वाहनाकरीता लोकमान्य टिळक हायस्कुल (जिल्हा स्टेडीयम जवळ) 4) मुल रोड, बंगाली कॅम्प, तुकुम या परिसरातून येणाऱ्या अनुयायांनी आपली वाहने कृषी भवन जवळील ट्रॅव्हल्स स्टँड या ठिकाणी (मोटार सायकल) पार्क करावी व चारचाकी वाहने वरील दिलेल्या इतर पार्किंग स्थळी पार्क करावी.

सदर अधिसूचना 15 ऑक्टो सकाळी 8 वा. पासून 17 ऑक्टो सकाळी 8 वाजेपर्यंत अंमलात राहील. तसेच सदर अधिसूचनेच्या अमंलबजावणीमध्ये आवश्यकतेनुसार बदल करण्यात येईल. तरी धम्मचक अनुप्रवर्तन दिन सोहळयामध्ये सहभागी सर्व बौध्द बांधव/अनुयायी व जनतेने वरील वाहतूक व्यवस्थेचा वापर करून घोषित पार्कींग व्यवस्थेमध्येच आपली वाहने ठेवावी तसेच शांतता व सुव्यवस्था आबाधित राखण्यास पोलिसांना सहकार्य करावे, असे आवाहन पोलिस विभागाने केले आहे.

०००००००

राजुरा विधानसभा मतदारसंघातील मतदारांच्या नोंदीचा हिशोब उपलब्ध

 

राजुरा विधानसभा मतदारसंघातील मतदारांच्या नोंदीचा हिशोब उपलब्ध

Ø पुनरीक्षण प्रक्रिया पारदर्शक व नियमानुसार असल्याचे राजुरा मतदार नोंदणी अधिकाऱ्याचे स्पष्टीकरण

चंद्रपूर, दि. 12 : राजुरा विधानसभा मतदारसंघातील मतदार नोंदणी आणि विशेष सखोल पुनरीक्षण (SIR-2026) प्रक्रिया निवडणूक आयोगाच्या निर्देशानुसार पारदर्शक व नियमानुसार राबविण्यात येत आहे.

ईएफ फॉर्म प्राप्त न झालेल्या मतदारांची स्वतंत्र पडताळणी करून त्यांचे वर्गवारीनिहाय अभिलेख तयार करण्यात आले आहेत. त्यामुळे 14 हजार 694 मतदारांचा हिशोब लागत नसल्याच्या वृत्तात तथ्य नसल्याचे मतदार नोंदणी अधिकारी तथा राजुराचे उपविभागीय अधिकारी रवींद्र माने यांनी स्पष्ट केले आहे.

राजुरा विधानसभा मतदारसंघात 18 जून 2026 रोजी उपलब्ध नोंदीनुसार एकूण 3 लाख 10 हजार 584 मतदार होते. या सर्व मतदारांसाठी ईएफ (Enumeration Form) फॉर्म छापून संबंधित मतदान केंद्रस्तरीय अधिकाऱ्यांमार्फत (BLO) वितरित करण्यात आले. त्यापैकी 2 लाख 72 हजार 846 मतदारांचे भरलेले व स्वाक्षरी केलेले फॉर्म प्राप्त झाले असून, त्यांचे डिजिटायझेशन पूर्ण करण्यात आले आहे. ईएफ फॉर्म प्राप्त न झालेल्या मतदारांची संबंधित बीएलओ यांच्यामार्फत स्वतंत्र पडताळणी करण्यात आली.

उपलब्ध वर्गवारीनुसार एकूण 37 हजार 738 मतदारांपैकी 20 हजार 666 मतदार कायमस्वरूपी स्थलांतरित, 9129 मृत मतदार, 3352 मतदार पत्त्यावर न आढळलेले किंवा अनुपस्थित, 3817 मतदारांची अन्यत्र आधीच नोंदणी झालेली तर 774 मतदार इतर कारणांमुळे संबंधित वर्गवारीत समाविष्ट आहेत.

या प्रकारे मतदारांच्या नोंदींचे वर्गीकरण करून त्याबाबतची माहिती संकलित करण्यात आली आहे. मतदारांच्या नोंदींबाबत प्रशासनाकडे आवश्यक अभिलेख उपलब्ध असून, मतदार यादी पुनरीक्षणाची कार्यवाही निर्धारित प्रक्रियेनुसार सुरू आहे.

बनावट नोंदणीच्या संशयास्पद अर्जांवर कारवाई : राजुरा विधानसभा मतदारसंघात ईआरओ नेट (ERO NET) ऑनलाइन प्रणालीद्वारे बनावट कागदपत्रांच्या आधारे मतदार नोंदणीचे 7 हजार 465 संशयास्पद अर्ज सादर करण्यात आले होते. संबंधित मतदान केंद्रस्तरीय अधिकाऱ्यांमार्फत या अर्जांची चौकशी करण्यात आली. अर्जदार दिलेल्या पत्त्यावर आढळून न येणे, अर्जदाराचे अस्तित्व आढळून न येणे, छायाचित्रे व आवश्यक पुरावे उपलब्ध नसणे आदी कारणांमुळे 6 हजार 853 संशयास्पद अर्ज नियमानुसार नामंजूर करण्यात आले.

या प्रकरणात तहसीलदार ओमप्रकाश गोंड यांच्या तक्रारीवरून 19 ऑक्टोबर 2024 रोजी राजुरा पोलीस ठाण्यात एफआयआर क्रमांक 0629 अन्वये गुन्हा दाखल करण्यात आला असून, पुढील तपास सुरू आहे.

राजकीय पक्षांना वेळोवेळी माहिती उपलब्ध : विशेष सखोल पुनरीक्षण प्रक्रियेबाबत नोंदणीकृत राजकीय पक्षांना वेळोवेळी माहिती देण्यात आली आहे. त्यासाठी 11 मे, 6 जुलै, 11 जुलै, 29 जुलै, 10 ऑगस्ट, 13 ऑगस्ट आणि 21 सप्टेंबर 2026 रोजी उपविभागीय कार्यालयात बैठका आयोजित करण्यात आल्या. या बैठकांमध्ये मतदार पडताळणी, ईएफ फॉर्मचे संकलन आणि पुनरीक्षण प्रक्रियेची माहिती देण्यात आली. तसेच ईएफ फॉर्म प्राप्त न झालेल्या 37 हजार 738 मतदारांची यादी नोंदणीकृत राजकीय पक्षांना पेनड्राइव्हद्वारे उपलब्ध करून देण्यात आली आहे.

दिनांक 31 ऑगस्ट 2026 रोजी प्रसिद्ध करण्यात आलेल्या प्रारूप मतदार यादीत 2 लाख 72 हजार 846 मतदारांचा समावेश आहे. ही यादी संबंधित मतदान केंद्रे, तहसील कार्यालये, पंचायत समिती कार्यालये आणि नगर परिषद कार्यालयांमध्ये नागरिकांच्या अवलोकनासाठी उपलब्ध करून देण्यात आली.

प्रारूप मतदार यादीच्या पडताळणीदरम्यान लॉजिकल डिस्क्रिपन्सी (Logical Discrepancy) आणि नो मॅपिंग (No Mapping) या प्रकारांतील एकूण 9009 नोंदींची पडताळणी आवश्यक असल्याचे निदर्शनास आले. या नोंदींच्या सुनावणीसाठी 25 सहायक मतदार नोंदणी अधिकारी (AERO) यांची नियुक्ती करण्यात आली आहे. संबंधित चारही तालुक्यांमध्ये सुनावणी व पडताळणीची कार्यवाही सुरू असून, अंदाजे 50 टक्के काम पूर्ण झाले आहे. मतदारांकडून प्राप्त आवश्यक कागदपत्रे बीएलओ ॲपवर अपलोड करण्यात येत आहेत.

16 नोव्हेंबर रोजी अंतिम मतदार यादी : मतदार यादी पुनरीक्षण प्रक्रियेतील उर्वरित कामकाज विहित कालमर्यादेत पूर्ण करून 16 नोव्हेंबर 2026 रोजी अंतिम मतदार यादी प्रसिद्ध करण्याचे नियोजन आहे.

राजुरा विधानसभा मतदारसंघातील मतदारांची पडताळणी, ईएफ फॉर्मचे डिजिटायझेशन, संशयास्पद अर्जांवरील कारवाई आणि विसंगत नोंदींच्या सुनावणीची कार्यवाही नियमानुसार सुरू आहे.

मतदारांच्या नोंदींची वर्गवारीनिहाय माहिती उपलब्ध असून, 14 हजार 694 मतदारांचा हिशोब लागत नसल्याच्या वृत्तात तथ्य नाही, असा खुलासा मतदार नोंदणी अधिकारी तथा उपविभागीय अधिकारी, राजुरा यांनी केला आहे,

00000000

‘भूमिपुत्रांचा एल्गार’ नाटिकेतून आदिवासी क्रांतिकारकांच्या शौर्यगाथेला उजाळा

‘भूमिपुत्रांचा एल्गार’ नाटिकेतून आदिवासी क्रांतिकारकांच्या शौर्यगाथेला उजाळा

Ø सेवा संकल्प अभियानांतर्गत आश्रमशाळांमध्ये नाटिकेचे सादरीकरण

चंद्रपूर, दि. 12 : भारतीय स्वातंत्र्यलढ्यात आदिवासी क्रांतिकारकांनी दिलेले अमूल्य योगदान, त्यांचा संघर्ष, शौर्य आणि बलिदानाची प्रेरणादायी गाथा नव्या पिढीपर्यंत पोहोचविण्यासाठी एकात्मिक आदिवासी विकास प्रकल्प, चंद्रपूर यांच्या वतीने ‘भूमिपुत्रांचा एल्गार’ या नाटिकेचे सादरीकरण करण्यात आले. सेवा संकल्प अभियानांतर्गत चंद्रपूर प्रकल्पातील तीन शासकीय आश्रमशाळांमध्ये हा उपक्रम राबविण्यात आला.

आदिवासी समाजाला गौरवशाली इतिहास आणि समृद्ध सांस्कृतिक वारसा लाभला आहे. ब्रिटिश राजवटीविरुद्धच्या स्वातंत्र्यलढ्यात अनेक आदिवासी क्रांतिकारकांनी अन्याय व अत्याचाराविरुद्ध संघर्ष करीत देशाच्या स्वातंत्र्यासाठी बलिदान दिले. मात्र, त्यांच्या शौर्यगाथा आणि स्वातंत्र्यलढ्यातील योगदानाची माहिती नव्या पिढीपर्यंत पोहोचणे आवश्यक आहे. याच उद्देशाने एकात्मिक आदिवासी विकास प्रकल्प, चंद्रपूरचे प्रकल्प अधिकारी विकास राचेलवार यांच्या संकल्पनेतून केंद्रवर्ती योजनेअंतर्गत ‘भूमिपुत्रांचा एल्गार’ या नाटिकेच्या सादरीकरणाचा उपक्रम राबविण्यात आला.

या उपक्रमांतर्गत शासकीय आश्रमशाळा जिवती, शासकीय आश्रमशाळा देवाडा आणि शासकीय आश्रमशाळा बोर्डा येथे नाटिकेचे सादरीकरण करण्यात आले. शालेय विद्यार्थ्यांसह परिसरातील आदिवासी बांधवांनाही क्रांतिकारकांच्या शौर्यगाथेची ओळख व्हावी, या दृष्टीने नाटिकेचे आयोजन करण्यात आले. या आयोजनाबद्दल विद्यार्थ्यांनी समाधान व्यक्त करीत प्रकल्प अधिकारी विकास राचेलवार व एकात्मिक आदिवासी विकास प्रकल्पाचे आभार मानले.

००००००