आदिवासी आश्रमशाळांच्या प्रकल्पस्तरीय क्रीडा स्पर्धांचा बोर्डा येथे शुभारंभ

 

आदिवासी आश्रमशाळांच्या प्रकल्पस्तरीय क्रीडा स्पर्धांचा बोर्डा येथे शुभारंभ

Ø पारंपरिक स्वागत, आदिवासी नृत्याने रंगला उद्घाटन सोहळा

चंद्रपूर, दि. 02 : एकात्मिक आदिवासी विकास प्रकल्प, चंद्रपूर अंतर्गत आश्रमशाळांमध्ये शिक्षण घेणाऱ्या विद्यार्थ्यांच्या क्रीडा कौशल्यांना प्रोत्साहन देण्यासाठी तसेच त्यांच्या शारीरिक, मानसिक, सामाजिक व सर्वांगीण व्यक्तिमत्त्व विकासाला चालना देण्याच्या उद्देशाने आयोजित प्रकल्पस्तरीय क्रीडा स्पर्धेचा शुभारंभ आज (दि.2) शासकीय माध्यमिक तथा उच्च माध्यमिक आश्रमशाळा, बोर्डा येथे उत्साहपूर्ण व दिमाखदार वातावरणात झाला.

स्पर्धेचे उद्घाटन अतिरिक्त मुख्य कार्यकारी अधिकारी कल्पना क्षीरसागर यांच्या हस्ते करण्यात आले. अध्यक्षस्थानी एकात्मिक आदिवासी विकास प्रकल्पाचे प्रकल्प अधिकारी विकास राचेलवार तर प्रमुख अतिथी म्हणून अधिष्ठाता डॉ. मिलिंद कांबळे, दंत व मुखरोग तज्ज्ञ डॉ. संदीप पिपरे, उमेश कडू आदी उपस्थित होते.

कार्यक्रमाची सुरुवात ढोल-ताशांच्या गजरात आणि महाराष्ट्रीयन पारंपरिक पद्धतीने झाली. त्यानंतर दीपप्रज्वलन व महापुरुषांच्या प्रतिमांना माल्यार्पण करून तसेच क्रीडाज्योत प्रज्वलित करून क्रीडा स्पर्धांच्या औपचारिक प्रारंभाची घोषणा करण्यात आली. विविध बीटनिहाय सहभागी खेळाडू विद्यार्थ्यांचे शिस्तबद्ध पथसंचलन पार पडले. सेवा संकल्प अभियानांतर्गत 62 आश्रमशाळा व वसतिगृहांमधील जवळपास 8 हजार विद्यार्थ्यांची दंत तपासणी केल्याबद्दल दंतरोग व मुखरोग तज्ञ डॉ. संदीप पिपरे यांचा गौरव करण्यात आला.

शासकीय आश्रमशाळा, बोर्डा येथील विद्यार्थ्यांनी सादर केलेल्या आकर्षक आदिवासी पारंपरिक नृत्याने उपस्थित मान्यवर व प्रेक्षकांची मने जिंकली. या सादरीकरणातून आदिवासी समाजाची समृद्ध लोककला, सांस्कृतिक परंपरा आणि लोकजीवनाचे सुंदर दर्शन घडले.

प्रकल्प अधिकारी मा. विकास राचेलवार, यांनी कार्यक्रमाचे प्रास्ताविक करताना क्रीडा स्पर्धांचे महत्त्व विशद केले. विद्यार्थ्यांच्या शैक्षणिक प्रगतीसोबतच शारीरिक तंदुरुस्ती, मानसिक स्वास्थ्य, शिस्त आणि आत्मविश्वास यांनाही तितकेच महत्त्व असल्याचे त्यांनी नमूद केले. विद्यार्थ्यांनी नियमित व्यायाम, योग्य आहार आणि आरोग्यदायी जीवनशैलीचा अंगीकार करावा, असे आवाहनही त्यांनी केले.

डॉ. मिलिंद कांबळे, यांनी, क्रीडा स्पर्धा आणि आंतरप्रकल्पीय उपक्रमांच्या माध्यमातून संस्कृती, अनुभव व ज्ञानाचे आदानप्रदान होऊन विद्यार्थ्यांचे व्यक्तिमत्त्व कशा प्रकारे विकसित होते, याबाबत मार्गदर्शन केले. अध्यक्षीय भाषणात कल्पना क्षीरसागर यांनी विद्यार्थ्यांच्या सर्वांगीण विकासासाठी अशा प्रकारचे उपक्रम व स्पर्धांचे सातत्याने आयोजन होणे आवश्यक असल्याचे प्रतिपादन केले. विद्यार्थ्यांनी स्पर्धांमध्ये केवळ विजय मिळविण्याच्या दृष्टीने नव्हे, तर नवीन कौशल्ये शिकण्याच्या, स्वतःची क्षमता ओळखण्याच्या आणि खिलाडूवृत्ती जोपासण्याच्या दृष्टीने सहभागी व्हावे, असे आवाहन त्यांनी केले.

उद्घाटन सोहळ्यानंतर मान्यवरांच्या उपस्थितीत 17 वर्षांखालील मुलींच्या कबड्डी स्पर्धेतील बोर्डा केंद्र विरुद्ध देवाडा केंद्र हा उद्घाटन सामना खेळविण्यात आला. या तीन दिवसीय क्रीडा महोत्सवात एकूण 1058 खेळाडू विद्यार्थी सहभागी झाले असून, त्यांच्या व्यवस्थेसाठी जवळपास 200 अधिकारी-कर्मचारी व सहाय्यक मनुष्यबळ कार्यरत आहे.

कार्यक्रमाचे आयोजन सहाय्यक प्रकल्प अधिकारी राजीव बोंगीरवार (शिक्षण), यांच्या मार्गदर्शनाखाली करण्यात आले. प्रकल्प क्रीडा समन्वयक सुरेश श्रीरामे यांनी क्रीडा स्पर्धांच्या नियोजन व समन्वयाची जबाबदारी पार पाडली. कार्यक्रमाचे संचालन अनुराधा लाड यांनी तर रामदास खवशी यांनी आभार मानले.

000000

जिल्हाधिका-यांच्या हस्ते तंबाखुमुक्त युवा अभियानाचा शुभारंभ

 

जिल्हाधिका-यांच्या हस्ते तंबाखुमुक्त युवा अभियानाचा शुभारंभ

चंद्रपूर, दि. 02 : युवकांमध्ये तंबाखू सेवनाचे प्रमाण कमी करणे, मुखाचा कर्करोग व इतर तंबाखूजन्य आजारांना प्रतिबंध करणे तसेच निरोगी आणि व्यसनमुक्त समाज निर्माण करण्यासाठी, राष्ट्रीय तंबाखू नियंत्रण कार्यक्रमांतर्गत तंबाखूमुक्त युवा अभियान राबविण्यात येत आहे. या अभियानाचा शुभारंभ जिल्हाधिकारी वसुमना पंत यांच्या हस्ते आज (दि. 2) करण्यात आला.

भारत सरकारच्या आरोग्य व कुटुंब कल्याण मंत्रालयाच्या मार्गदर्शनाखाली, तंबाखुमुक्त युवा अभियान 4.0 अंतर्गत शाळा, महाविद्यालये व सार्वजनिक ठिकाणी तंबाखूच्या दुष्परिणामांबाबत प्रबोधन, शाळा व महाविद्यालयांमध्ये तंबाखूमुक्त परिसर निर्माण करणे, कोटपा कायदा, 2003 अंतर्गत सार्वजनिक ठिकाणी धूम्रपानास प्रतिबंध आणि अल्पवयीनांना तंबाखू विक्रीवरील बंदीबाबत जनजागृती, रॅली, प्रभातफेरी, चित्रकला, निबंध स्पर्धा आणि तंबाखूमुक्तीची शपथ, तसेच तंबाखू सोडण्यासाठी समुपदेशन व आरोग्यविषयक मदत हे उपक्रम राबविण्यात येणार आहे.

यावेळी जिल्हाधिकारी पंत म्हणाल्या, तरुण पिढीमध्ये तंबाखुजन्य पदार्थांच्या दुष्परिणामाबाबत मोठ्या प्रमाणात जनजागृती करावी. आपली युवा पिढी व्यसनांच्या आहारी जाणार नाही, याची दक्षता घ्यावी. शाळा, महाविद्यालयांच्या 100 मीटर परिसरात तंबाखुजन्य पदार्थ विक्रीस बंदी असून, याबाबत नियमांचे उल्लंघन झाले तर संबंधितांवर कडक कारवाई करावी. वसतीगृह तसेच आश्रमशाळेसुध्दा नियमितपणे तपासणी करणे गरजेचे आहे. जनजागृतीपर संदेश देण्यासाठी मॅरेथॉनचे आयोजन करावे, अशा सुचना जिल्हाधिका-यांनी दिल्या.

जिल्हाधिकारी कार्यालयात आयोजित या बैठकीला जिल्हा शल्य चिकित्सक डॉ. भास्कर सोनारकर, दंत शल्य चिकित्सक डॉ. संदीप पिपरे, राष्ट्रीय तंबाखु नियंत्रण कार्यक्रमाच्या जिल्हा समन्वयक डॉ. श्वेता सावलीकर, अन्न सुरक्षा अधिकारी कुणाल मुळे, प्रणय कांबळे, उपशिक्षणाधिकारी जी.बी. चवरे, पोलिस उपनिरीक्षक सुनील गौरकर आदी उपस्थित होते.

विविध विभागाच्या वतीने करण्यात आलेली कार्यवाही : सिगारेट व इतर तंबाखुजन्य पदार्थ कायदा (कोटपा) अंतर्गत आरोग्य विभागाच्या वतीने एप्रिल 2026 ते सप्टेंबर 2026 या कालावधीत 396 जणांवर दंडात्मक कारवाई करून 39 हजार 600 रुपयांची वसुली करण्यात आली. याच कालावधीत पोलिस विभागाच्या वतीने 2459 जणांवर कारवाई तर 4 लक्ष 85 हजार 677 रुपये दंड आकारण्यात आला. अन्न सुरक्षा मानके कायद्यांतर्गत सदर कालावधीत 27 लक्ष 29 हजार 477 रुपये किमतीचा 1331 किग्रॅ साठा जप्त करण्यात आला. जिल्ह्यात सन 2024-25 मध्ये 314 शाळा तंबाखुमुक्त, सन 2025-26 मध्ये 322 शाळा  तर एप्रिल 2026 ते सप्टेंबर 2026 या कालावधीत आतापर्यंत 65 शाळा तंबाखुमुक्त करण्यात आल्या आहेत.

००००००००

6 नोव्हेंबर रोजी डाक अदालतीचे आयोजन

 

6 नोव्हेंबर रोजी डाक अदालतीचे आयोजन 

चंद्रपूर, दि. 02 : डाक विभागाच्या संदर्भात तक्रारींचे निराकरण करण्यासाठी 6 नोव्हेंबर 2026 रोजी दुपारी 3 वाजता प्रवर अधिक्षक, मुख्य पोस्ट ऑफिस, चंद्रपूर यांच्या दालनात विभागीय डाक अदालतीचे आयोजन करण्यात आले आहे. नागरिकांच्या काही तक्रारी असल्यास त्यांनी या अदालतीला उपस्थित राहावे, असे आवाहन डाक विभागाच्या वतीने करण्यात आले आहे.

००००००

दुष्काळी परिस्थितीत पशुधनाला दर्जेदार आणि सुरक्षित चारा मिळणार - पशुसंवर्धन मंत्री पंकजा मुंडे यांची माहिती

 

दुष्काळी परिस्थितीत पशुधनाला दर्जेदार आणि सुरक्षित चारा मिळणार - पशुसंवर्धन मंत्री पंकजा मुंडे यांची माहिती

 

• मंत्रिमंडळ उपसमितीच्या अभ्यासगटाच्या बैठकीत चाऱ्याचे दर निश्चित ; पशुपालकांना दिलासा
• दुष्काळ जाहीर कालावधीत सुधारित आधारभूत दर लागू ; सुका चारा प्रतिकिलो कमाल १२ रुपये; मुरघासासाठी कमाल ८ रुपये

 

            मुंबई, दि. ३० : दुष्काळजन्य परिस्थितीतील संभाव्य चारा टंचाईवर मात करून पशुपालकांना दिलासा देण्यासाठी राज्य शासनाने चारा खरेदीचे दर निश्चित केले आहेत. पशुधनासाठी खरेदी करण्यात येणाऱ्या सुक्या चाऱ्याची कमाल आधारभूत किंमत वाहतूक खर्च वगळून प्रतिकिलो १२ रुपये, तर मुरघासाची कमाल आधारभूत किंमत वाहतूक खर्च वगळून प्रतिकिलो ८ रुपये निश्चित केली आहे, अशी माहिती पर्यावरण व पशुसंवर्धन मंत्री पंकजा मुंडे यांनी दिली. चाराटंचाईच्या काळात पशुधनासाठी चारा उपलब्ध करून देण्याच्या उपाययोजनांना यामुळे मदत होणार आहे.

            राज्यातील खरीप हंगामातील परिस्थितीचा आढावा घेऊन आतापर्यंत एकूण ३०४ तालुक्यांमध्ये दुष्काळ जाहीर करण्यात आला आहे. या पार्श्वभूमीवर संभाव्य चारा टंचाईवर मात करण्यासाठी महसूलमंत्र्यांच्या अध्यक्षतेखालील मंत्रिमंडळ उपसमितीने अभ्यासगटाची स्थापना केली होती. या अभ्यासगटात पंकजा मुंडे सदस्य असून या अभ्यास गटाने राज्यासह इतर राज्यांमधील चारा व्यवस्थापनाच्या उपाययोजनांचा अभ्यास करून उपलब्ध चारा, संभाव्य उत्पादन आणि आगामी काळातील गरज लक्षात घेऊन अहवाल सादर केला. या अहवालाला २७ ऑक्टोबर रोजी झालेल्या मंत्रिमंडळ उपसमितीच्या बैठकीत मान्यता देण्यात आली.

 

            मदत व पुनर्वसन विभागाने जाहीर केलेल्या दुष्काळाच्या कालावधीसाठी हे दर लागू राहतील. जिल्हास्तरीय दुष्काळ व्यवस्थापन कार्यकारी समितीने अभ्यासगटाच्या अहवालातील तरतुदी आणि मदत व पुनर्वसन विभागाच्या निर्देशांनुसार चारा खरेदीची कार्यवाही करण्यात येणार आहे. तसेच वाहतुकीसाठी परिवहन आयुक्तांनी वेळोवेळी निश्चित केलेले दर लागू राहतील. चाऱ्याच्या गुणवत्तेबाबतही शासनाने निकष निश्चित केले आहेत. खरेदी करण्यात येणाऱ्या सुक्या चाऱ्यातील ओलावा कमाल १५ टक्के असावा. चारा चांगला दिसणारा तसेच आंबट किंवा कुबट वास, बुरशी, कीड आणि माती नसलेला असावा. ज्वारी आणि बाजरीच्या चाऱ्याला प्राधान्य देण्यात येणार आहे. मुरघास हवाबंद आणि बुरशीमुक्त असणे आवश्यक आहे. त्यामधील ओलावा ६२ ते ७० टक्के, पीएच ३.५ ते ४.४ आणि क्रूड प्रोटीन किमान ७ टक्के असावे. अन्य घटकांसाठी भारतीय मानक ब्युरोच्या आयएस १९५६२ : २०२६ मधील निकष लागू राहतील.

 

पशुधनाला दर्जेदार आणि सुरक्षित चारा मिळणार

            राज्यातील दुष्काळी परिस्थितीत शेतकऱ्यांसमोर शेतीबरोबरच पशुधनाच्या चाऱ्याचा प्रश्नही निर्माण होतो. पशुधन हे शेतकऱ्यांच्या उपजीविकेचे महत्त्वाचे साधन असल्याने दुष्काळाच्या काळात त्यांना चारा उपलब्ध करून देणे ही शासनाची प्राथमिकता आहे. याच उद्देशाने सुका चारा व मुरघासासाठी आधारभूत दर निश्चित करण्याचा निर्णय घेतला आहे. केवळ चाऱ्याचे दर निश्चित करणे एवढाच या निर्णयाचा उद्देश नसून, पशुधनाला दर्जेदार आणि सुरक्षित चारा मिळावा, यासाठी गुणवत्तेचे निकषही ठरविण्यात आले आहेत. जिल्हास्तरावर योग्य नियोजन आणि काटेकोर अंमलबजावणी करून दुष्काळी परिस्थितीत शेतकऱ्यांना आणि पशुपालकांना दिलासा देण्याचा शासनाचा प्रयत्न असल्याचे पशुसंवर्धन मंत्री पंकजा मुंडे यांनी म्हटले आहे.

000

दुष्काळी परिस्थितीत पशुधनासाठी आतापासून चारा उत्पादनाचे नियोजन करा – जिल्हाधिकारी वसुमना पंत

 

दुष्काळी परिस्थितीत पशुधनासाठी आतापासून चारा उत्पादनाचे नियोजन करा – जिल्हाधिकारी वसुमना पंत

Ø चारा पिकांची लागवड व नियोजनाबाबत एकदिवसीय कार्यशाळा संपन्न

चंद्रपूर, दि. 30 : दुष्काळी परिस्थितीच्या पार्श्वभूमीवर जिल्ह्यातील पशुधनासाठी चाऱ्याची टंचाई निर्माण होऊ नये, यासाठी आतापासूनच प्रभावी नियोजन करणे आवश्यक आहे, असे प्रतिपादन जिल्हाधिकारी वसुमना पंत यांनी केले.

नियोजन भवन येथे आज (दि.30) कृषी व पशुसंवर्धन विभागाच्या वतीने दुष्काळी परिस्थितीत चारा पिकांची लागवड व नियोजन या विषयावर आयोजित एकदिवसीय कार्यशाळेत त्या बोलत होत्या. यावेळी मुख्य कार्यकारी अधिकारी पुलकित सिंह, प्रकल्प संचालक मंजिरी टकले, पाटबंधारे विभागाचे अधिक्षक अभियंता जलेश सिंह, जिल्हा अधीक्षक कृषी अधिकारी शंकर तोटावार, पशुसंवर्धन व दुग्धविकास विभागाचे जिल्हा उपायुक्त डॉ. सुरेश कुंभरे, उपमुख्य कार्यकारी अधिकारी गिरीश धायगुडे, विभागीय वन अधिकारी राजन तलमले आदी उपस्थित होते.

चारा लागवडीसाठी योग्य जागांची आतापासूनच निवड करून ठेवा, असे सांगून जिल्हाधिकारी पंत म्हणाल्या, महात्मा गांधी राष्ट्रीय ग्रामीण रोजगार हमी योजना (नरेगा) आणि जिल्हा नियोजन समितीच्या निधीच्या अभिसरणातून मोठ्या प्रमाणावर चारा उत्पादनाला प्राधान्य द्यावे. दुष्काळी परिस्थितीत पशुधनाचे संरक्षण आणि पशुपालकांना दिलासा देण्यासाठी चारा उपलब्धतेचे नियोजन अत्यंत महत्त्वाचे आहे. केवळ यंदाच्या दुष्काळापुरते मर्यादित न राहता नियमित व शाश्वत चारा उत्पादनाची व्यवस्था निर्माण करावी. जेणेकरून चारा उत्पादनातून शेतकरी आणि पशुपालकांना अतिरिक्त उत्पन्न कसे मिळेल, याचाही विचार करता येईल.

चारा उत्पादनाबाबत आधुनिक तंत्रज्ञान, उपलब्ध संसाधने आणि विविध शासकीय योजनांचा प्रभावी वापर करण्याच्या उद्देशाने या कार्यशाळेचे आयोजन करण्यात आले आहे. कार्यशाळेत सहभागी अधिकाऱ्यांनी व कर्मचाऱ्यांनी चारा लागवड, उत्पादन व व्यवस्थापनाबाबत असलेल्या शंकांचे तज्ज्ञांकडून निरसन करून घ्यावे. तसेच प्रत्यक्ष क्षेत्रभेटी देऊन शेतकरी, पशुपालक आणि संबंधित यंत्रणांना मार्गदर्शन करावे. यासाठी सर्व विभागांचे सहकार्य आणि समन्वय आवश्यक असल्याचे जिल्हाधिकाऱ्यांनी स्पष्ट केले.

तज्ज्ञांकडून चारा व्यवस्थापन व मूल्यवर्धनाबाबत मार्गदर्शन : कार्यशाळेत पशुसंवर्धन व दुग्धविकास विभागाचे जिल्हा उपायुक्त डॉ. सुरेश कुंभरे यांनी 'चंद्रपूर जिल्ह्यातील चारा टंचाई व्यवस्थापन व शाश्वत चारा विकास' या विषयावर मार्गदर्शन केले. सहाय्यक आयुक्त, पशुसंवर्धन डॉ. विलास गावखरे यांनी 'चाऱ्याचे भौतिक प्रक्रियेद्वारे मूल्यवर्धन' या विषयावर माहिती दिली. पशुवैद्यकीय अधिकारी डॉ. सतीश अघळते यांनी 'चारा व्यवस्थापन व कृषी वनीकरण' या विषयावर, तसेच विकसित भारत ग्रामीण रोजगार व आजीविका मिशन योजनेच्या माध्यमातून चारा लागवड व अझोला उत्पादनाच्या संधींबाबत उपमुख्य कार्यकारी अधिकारी गिरीश धायगुडे यांनी माहिती दिली. विदर्भ-मराठवाडा दुग्धविकास प्रकल्पाचे डॉ. निशांत नांदेश्वर यांनी दुग्धविकास प्रकल्पांतर्गत उपलब्ध योजनांबाबत मार्गदर्शन केले.

सदर कार्यशाळेमध्ये, कमतरता भासणाऱ्या चारा पिकांची निवड, दुष्काळी व कमी पाण्याच्या परिस्थितीत जलद वाढणारी आणि कमी पाण्यावर येणारी चारा पिके (उदा. ज्वारी, बाजरा, मका, नेपियर गवत, लसूण घास इ.) यांची लागवड पद्धती, चारा संवर्धन व साठवणूक तंत्रज्ञान, अतिरिक्त उपलब्ध चाऱ्याचे मुरघास बनवणे, कडबा कुट्टी करणे आणि योग्य साठवणूक करून चाऱ्याची नासाडी थांबवण्याच्या आधुनिक उपाययोजना या विषयांवरसुध्दा चर्चा करण्यात आली.

०००००००