पदवीधर मतदार संघासाठी चंद्रपूर जिल्ह्यात 72.59 टक्के मतदान

 

पदवीधर मतदार संघासाठी चंद्रपूर जिल्ह्यात 72.59 टक्के मतदान

Ø नागपूर विभाग पदवीधर मतदारसंघ द्विवार्षिक निवडणूक

चंद्रपूर, दि.23 : नागपूर विभाग विधान परिषद पदवीधर मतदार संघाच्या द्विवार्षिक निवडणुकीत चंद्रपूर जिल्ह्यात 72.59 टक्के मतदान झाले.

शुक्रवारी (दि. 23) सकाळी 8 ते सायंकाळी 4 वाजेपर्यंत जिल्ह्यातील 23419 मतदारांनी आपला मतदानाचा हक्क बजावला. चंद्रपूर जिल्ह्यात एकूण 32262 मतदार असून पुरुष मतदारांची संख्या 20905 तर स्त्री मतदार 11357 आहे.

जिल्ह्यातील 58 मतदान केंद्रावर झालेल्या या निवडणुकीत 15842 पुरुष मतदारांनी (75.78 टक्के), 7577 स्त्री मतदारांनी (66.72 टक्के) मतदान केले. ही टक्केवारी 72.59 आहे.

000000000

डाक जीवन विमा योजना एजंटकरीता अर्ज आमंत्रित

 

डाक जीवन विमा योजना एजंटकरीता अर्ज आमंत्रित

चंद्रपूर, दि. 23 : भारतीय डाक विभागाकडून डाक जीवन विमा योजनेअंतर्गत अभिकर्ता (एजंट) यांची नेमणूक करण्याकरिता इच्छुक उमेदवाराकडून अर्ज मागविण्यात येत आहेत. अर्जाचा नमुना डाक अधीक्षक चंद्रपुर यांच्या कार्यालयात उपलब्ध आहे

एजंटकरीता पात्रता : 1) उमेदवाराचे किमान वय 18 वर्ष असावे. 2) शैक्षणिक पात्रता किमान १० वी पास. 3) बेरोजगारीत किंवा स्वयम रोजगारीत शिक्षित युवा, माजी जीवन सल्लागार, इन्शुरन्स कंपनीचे माजी एजेंट, माजी सैनिक, अंगणवाडी सेविका, महिला मंडळ सेविका, सेवा निवृत शिक्षक इत्यादी. 4) उमेदवार दुसऱ्या इन्शुरन्स कंपनीचा सद्यस्थितीत एजेंट नसावा. 5) उमेदवाराची निवड थेट मुलाखती द्वारे व्यावसायिक कौशल्य, व्यक्तिमत्व, परस्पर संबंधाचे कौशल्य, जीवन विम्याबाबत चे ज्ञानाच्या आधारावर केली जाईल. 6) निवड झालेल्या उमेदवारास 5 हजार रुपयांची अनामत रक्कम सुरक्षा ठेव म्हणून ठेवावी लागेल. 7) प्रशिक्षण पूर्तता नंतर डाक विभागाकडून तात्पुरता परवाना देण्यात येईल जो आयआरडीए ची परवाना परीक्षा पास केल्यानंतर कायमच्या परवान्यामध्ये रुपांतरीत केल्या जाईल. 8 ) निवड झालेल्या उमेदवारास टपाल विभागाने वेळोवेळी ठरविलेले कमिशन दिले जाईल.

इच्छुक उमेदवारांनी वरिष्ठ अधीक्षक डाकघर कार्यालय, चंद्रपुर विभाग, चंद्रपुर येथे विहित नमुन्यातील अर्ज आणि सर्व शैक्षणिक प्रमाणपत्र तसेच पॅन कार्ड, आधार कार्ड व अन्य संबंधित दस्तावेज 10 वी किंवा 12 वी बोर्डाचे प्रमाणपत्र, जन्मतारखेचे प्रमाणपत्र, संगणक ज्ञानाचे प्रमाणपत्रासह (असल्यास) 27 ऑक्टोबर 2026 ला सकाळी 11 ते दुपारी 4 वाजेपर्यंत उपस्थित राहावे. अधिक माहितीसाठी जवळच्या डाक कार्यालयास संपर्क साधावा किंवा आमच्या www.maharashtrapost.gov.in वेब साईटला भेट द्यावी, असे वरिष्ठ अधीक्षक एस. रामकृष्णा यांनी कळविले आहे.

०००००००

राणी हिराई उमेद मार्ट येथे दिवाळी फराळ महोत्सव व विक्री प्रदर्शनी

राणी हिराई उमेद मार्ट येथे दिवाळी फराळ महोत्सव व विक्री प्रदर्शनी

चंद्रपूर, दि.23 : महाराष्ट्र राज्य ग्रामीण जीवनोन्नती अभियान (उमेद) च्या वतीने 'राणी हिराई उमेद मार्ट, चंद्रपूर येथे 31 ऑक्टोबर ते 04 नोव्हेंबर 2026 या कालावधीत दिवाळी फराळ महोत्सव-2026 चे आयोजन करण्यात आले आहे.

अभियानाच्या माध्यमातुन ग्रामीण भागातील स्वयं सहाय्यता समूहातील महिलांच्या हाताला (बचत गट) रोजगार उपलब्ध करून देणे, त्यांच्या उत्पादनांना हक्काची बाजारपेठ मिळवून देणे आणि त्यांच्या उत्पन्नात वाढ करणे हा या प्रदर्शनाचा मुख्य उद्देश आहे. यात खाद्य पदार्थ, पूजेचे साहित्य, नैसर्गिक व रेशमी हार, सजावटीचे साहित्य आणि विविध गृहोपयोगी वस्तूंचे स्टॉल लावण्यात येणार असल्याचे उमेदचे जिल्हा अभियान सहसंचालक यांनी कळविले आहे.

०००००००

मतदानाच्या दिवशी 23 ऑक्टो. रोजी मद्यविक्री बंद

 मतदानाच्या दिवशी 23 ऑक्टो. रोजी मद्यविक्री बंद

चंद्रपूर, दि.22 :  नागपूर विभाग पदवीधर मतदारसंघाची निवडणूक 23 ऑक्टोबर 2026 रोजी होत असल्याने मतदानाच्या संपूर्ण दिवशी (23 ऑक्टो) चंद्रपूर जिल्ह्यात मद्यविक्री बंद ठेवण्याचे आदेश जिल्हाधिकारी वसुमना पंत यांनी निर्गमित केले आहे.

चंद्रपूर जिल्ह्यातील सर्व नमुना सीएल-2, सीएल-3, एफएल-1, एफएल-2/सीएल/एफएल/टिओडी-3, एफएल-3 (परवाना कक्ष), एफएल-4, एफएल/बीआर-2, टड – 1 या अनुज्ञप्त्या 23 ऑक्टोबर रोजी संपूर्ण दिवस बंद राहील, याची सर्व अनुज्ञप्तीधारकांनी नोंद घ्यावी, असे जिल्हाधिका-यांच्या आदेशात नमुद आहे.

००००००

सुरक्षा रक्षक मंडळाच्यावतीने 23 ऐवजी 26 ऑक्टोबर रोजी कागदपत्रे पडताळणी

 

सुरक्षा रक्षक मंडळाच्यावतीने 23 ऐवजी 26 ऑक्टोबर रोजी कागदपत्रे पडताळणी

चंद्रपूर, दि.22 :  चंद्रपूर जिल्हा सुरक्षा रक्षक मंडळाच्या कार्यक्षेत्रातील चंद्रपूर व गडचिरोली जिल्ह्याकरिता 396 सुरक्षा रक्षकांचा समुच्चय (पूल) तयार करण्यासाठी ऑनलाईन अर्ज केलेल्या उमेदवारांची कागदपत्रे पडताळणी 12 ऑक्टोबर पासून कामगार कल्याण मंडळ, बंगाली कॅम्प, चंद्रपूर येथे सुरूआहे.

तथापि 23 ऑक्टोबर रोजी होणाऱ्या नागपूर पदवीधर मतदारसंघाच्या मतदान प्रक्रियेच्या अनुषंगाने सदर दिवशी कागदपत्रे पडताळणीसाठी उपस्थित राहण्याबाबत संदेश / ई-मेल प्राप्त झालेल्या संबंधित उमेदवारांनी 23 ऑक्टोबर ऐवजी 26 ऑक्टोबर 2026 रोजी नियोजित स्थळी सकाळी 10 वाजता उपस्थित राहावे, असे आवाहन चंद्रपूर सुरक्षा रक्षक मंडळ, चंद्रपूर मार्फत करण्यात येत आहे. 23 ऑक्टोबर रोजी कोणतीही कागदपत्रे पडताळणी करण्यात येणार नाही, याची सर्व संबंधित उमेदवारांनी नोंद घ्यावी.

००००००