7 मार्च पासून छत्रपती शिवाजी महाराज महाराजस्व समाधान शिबीर अभियानाचा पहिला टप्पा

7 मार्च पासून छत्रपती शिवाजी महाराज महाराजस्व समाधान शिबीर अभियानाचा पहिला टप्पा

चंद्रपूर, दि. 02 : महसूल मंत्री चंद्रशेखर बावनकुळे  यांच्या पुढाकारातून तसेच जिल्हाधिकारी विनय गौडा यांच्या मार्गदर्शनाखाली महसूल विभागांतर्गत राबविण्यात येत असलेल्या ‘छत्रपती शिवाजी महाराज महाराजस्व समाधान शिबीर अभियान’ या उपक्रमाचा पहिला टप्पा 7 मार्च पासून सुरू करण्यात येणार आहे.

महाराष्ट्र शासन व महसूल विभागाच्या निर्देशानुसार राबविण्यात येणाऱ्या या अभियानाचा उद्देश ग्रामीण भागातील सर्वसामान्य नागरिक, शेतकरी, विद्यार्थी व महिलांचे महसूल विभागाशी संबंधित दैनंदिन प्रश्न तात्काळ सोडविणे हा आहे. जनतेच्या तक्रारी त्वरीत निकाली काढून महसूल सेवा थेट नागरिकांपर्यंत पोहोचविणे, महसूल प्रशासन अधिक लोकाभिमुख, कार्यक्षम व गतिमान करणे हे या उपक्रमाचे मुख्य ध्येय आहे.

 मार्च ते मे २०२६ या कालावधीत चंद्रपूर तालुक्यातील प्रत्येक महसूल मंडळ तसेच नगर परिषद/नगरपंचायत स्तरावर शिबिरांचे आयोजन करण्यात येणार आहे. त्यानुसार मंडळनिहाय शिबिरांचे वेळापत्रक पुढीलप्रमाणे आहे.

 ७ मार्च रोजी सकाळी १० वा. – ग्रामपंचायत कार्यालय, अजयपूर

१४ मार्च रोजी सकाळी १० वा. – स्नेहप्रभा मंगल कार्यालय, घुग्घुस

१० एप्रिल रोजी सकाळी १० वा. – लोकसेवा मंगल कार्यालय, पडोली

१७ एप्रिल रोजी सकाळी १० वा. – जिल्हा परिषद शाळा, चिंचाळा

८ मे रोजी सकाळी १० वा. – खत्री महाविद्यालय, चंद्रपूर आणि

 १५ मे २०२६ रोजी सकाळी १० वा. – तहसील कार्यालय, चंद्रपूर येथे समारोप होईल.

या अभियानांतर्गत महसूल विभागाच्या १५ पेक्षा अधिक प्रमुख सेवा थेट शिबिरस्थळी उपलब्ध करून देण्यात येणार आहेत. त्यामध्ये प्रलंबित फेरफार निकाली काढणे, ७/१२ मधील त्रुटी दुरुस्ती, डिजिटल स्वाक्षरीयुक्त ७/१२ व ८-अ उतारे वाटप, उत्पन्न, रहिवासी, जात व नॉन-क्रिमिलेअर प्रमाणपत्रे, अकृषक तरतुदीबाबत मार्गदर्शन, सनद प्रक्रियेची माहिती, सामाजिक अर्थसहाय्य योजनांचे लाभ, विद्यार्थ्यांसाठी विविध दाखले, तुकडेबंदी कायद्यावरील प्रकरणांचा निपटारा, पाणंद रस्त्यांच्या प्रशासकीय मान्यता, घरकुल पट्टे वाटप, ई-मोजणी अर्ज निकाली काढणे, अॅग्रीस्टॅक व पी.एम. किसान नोंदणी, भूसंपादन व अकृषक परवानगी प्रकरणे आदी सेवांचा समावेश आहे.

तसेच महाराष्ट्र जमीन महसूल संहितेतील नवीन तरतुदींची जनजागृती व प्रभावी अंमलबजावणी, डिजिटल सेवांचा अधिकाधिक वापर यावर विशेष भर देण्यात येणार आहे.

नागरिकांनी संबंधित शिबिरस्थळी उपस्थित राहून या उपक्रमाचा लाभ घ्यावा, असे आवाहन तहसील कार्यालय व भूमी अभिलेख कार्यालय, चंद्रपूर यांनी केले आहे.

००००००