निंबाळा येथे पारंपारिक बांबू हस्तकला प्रशिक्षण शिबीर संपन्न

 

निंबाळा येथे पारंपारिक बांबू हस्तकला प्रशिक्षण शिबीर संपन्न

चंद्रपूर, दि. 23 : बांबू संशोधन व प्रशिक्षण केंद्र (बीआरटीसी) चिचपल्लीच्या वतीने 'कॅम्पा' प्रकल्पांतर्गत 'पारंपारिक बांबू हस्तकला समुदायांचे सक्षमीकरण' या विषयावर आधारित 15 दिवसीय प्रशिक्षण शिबिराचा पहिला टप्पा निंबाळा येथे पार पडला.

या प्रशिक्षण कालावधीत सहभागी महिला कारागिरांना बांबू बुके, बांबूची फुले, बांबू बॅच आणि बांबू चटई यांसारख्या आकर्षक वस्तू बनविण्याचे प्रगत प्रशिक्षण देण्यात आले. प्रशिक्षणाबाबत आपले मनोगत व्यक्त करताना महिलांनी सांगितले की, बीआरटीसी कडून मिळालेल्या नवीन संकल्पनांमुळे वस्तू तयार करणे आता अधिक सोपे आणि जलद झाले आहे. यामुळे आमच्या उत्पादनाचा दर्जा आणि वेग दोन्ही वाढण्यास मदत झाली आहे.

कार्यक्रमाचे अध्यक्ष निंबाळाचे सरपंच सौरभ दुपारे यांनी बीआरटीसीच्या उपक्रमाचे कौतुक केले. बांबू संशोधन व प्रशिक्षण केंद्र आपल्या गावातील लोकांसाठी रोजगाराच्या नवीन संधी उपलब्ध करून देत आहे. या प्रशिक्षणामुळे गावातील कारागीर आर्थिकदृष्ट्या सक्षम होतील आणि बांबू व्यवसायाला मोठी चालना मिळेल, असे त्यांनी सांगितले.

कार्यक्रमाच्या सुरुवातीला पर्यवेक्षक योगिता साठवणे यांनी प्रास्ताविकातून प्रशिक्षणाचा मुख्य उद्देश स्पष्ट करून स्थानिक कारागिरांच्या कलेला आधुनिक तंत्रज्ञानाची जोड देऊन त्यांना मुख्य प्रवाहातील बाजाराशी जोडणे हे बीआरटीसीचे मुख्य ध्येय असल्याचे सांगितले. कार्यक्रमाचे संचालन दिवाकर सोनटक्के यांनी केले. प्रशिक्षणाच्या शेवटी सर्व प्रशिक्षणार्थींनी तयार केलेल्या विविध वस्तूंचे प्रदर्शन करण्यात आले.

०००००