खोदकामामुळे दूरसंचार नेटवर्क क्षतीग्रस्त झाल्यास होणार दंडात्मक कारवाई

 

खोदकामामुळे दूरसंचार नेटवर्क क्षतीग्रस्त झाल्यास होणार दंडात्मक कारवाई

Ø ‘कॉल बीफोर यु डिगींग’ वर नोंदणी करण्याचे आवाहन

Ø तक्रारींचे निवारण करण्याकरीता जिल्हास्तरीय समिती गठीत

चंद्रपूर, दि. 30 : जिल्ह्यात विविध विकासकामे करतांना शासकीय तसेच खाजगी यंत्रणेच्या खोदकामामुळे दूरसंचार नेटवर्क क्षतीग्रस्त होते. त्यामुळे मोबाईल नेटवर्कसोबतच ऑनलाईन पध्दतीने अर्ज भरणे, शासकीय योजनांचा लाभ देणे, यासारख्या अनेक अडचणी निर्माण होतात. यावर मात करण्यासाठी दूरसंचार विभागाच्या वतीने ‘कॉल बीफोर यु डिगींग’ हे ॲप विकसीत करण्यात आले आहे. यंत्रणांच्या जेसीबीधारकांनी किंवा खोदकाम करणारे खाजगी यंत्रणांनी सदर ॲपवर नोंदणी करावी, असे आवाहन प्रशासनाच्यावतीने करण्यात आले आहे. 

दूरसंचारचे जाळे अखंडीतरित्या संपूर्ण जिल्हाभर पोहचविण्यासाठी तसेच जिल्ह्यात दूरसंचारच्या पायाभूत सुविधा उभारणीच्या अनुषंगाने निर्माण होणा-या तक्रारींचे निवारण होण्यासाठी जिल्हास्तरीय समितीचे गठण करण्यात आले आहे. या समितीची बैठक आज (दि.30) जिल्हाधिकारी विनय गौडा जी.सी. यांच्या मार्गदर्शनात निवासी उपजिल्हाधिकारी दगडू कुंभार यांच्या उपस्थितीत पार पडली.

बैठकीला अतिरिक्त मुख्य कार्यकारी अधिकारी कल्पना क्षीरसागर, नगर पालिका प्रशासन अधिकारी डॉ. विद्या गायकवाड, महावितरणचे कार्यकारी अभियंता विकास शहाडे, सार्वजनिक बांधकाम विभागाचे उपकार्यकारी अभियंता एन.डी. वैद्य, दूरसंचार विभाग नागपूरचे संचालक आशिषकुमार सांघी, योगेंद्रसिंह बघेल, प्रदीपकुमार रामटेके, बीएसएनएलचे उपमहाप्रबंधक नितीन टेंगशे, सहायक महाप्रबंधक देविदास कोवा, आयडीया नेटवर्कचे प्रतिनिधी अमोल खोंड, शैलेश गिरडकर (जिओ), निमीश कपूर (व्होडाफोन), कुणाल रंजन आणि गिरीश कोट्टावार (एअरटेल) आदी उपस्थित होते.

न्यू टेलिकॉम ॲक्ट 2023 च्या प्रकरण 9 मधील कलम 42 (1) नुसार खोदकाम करतांना दूरसंचार पायाभुत सुविधा क्षतीग्रस्त झाल्यास 3 वर्षापर्यंत शिक्षा आणि नुकसानाची तीव्रता बघता 2 कोटी पर्यंत दंड किंवा दोन्ही शिक्षेची तरतूद आहे. त्यामुळे यंत्रणांनी खोदकाम करून घेणारे कंत्राटदार/ जेसीबीचालक आदींनी ‘कॉल बीफोर यू डिगींग’ वर नोंदणी केल्यास संबंधित सर्व्हीस प्रोव्हायडरला त्याची माहिती मिळेल व खोदकामामुळे होणारे नुकसान टाळता येईल.

यावेळी निवासी उपजिल्हाधिकारी दगडू कुंभार म्हणाले, दूरसंचार संबंधित जिल्ह्यातील तांत्रिक विषय, टॉवर उभारणीमध्ये येणा-या अडचणी, पायाभूत सुविधांची उभारणी व इतर अडचणी सोडविण्यासाठी सदर बैठकीचे आयोजन करण्यात आले आहे. शासकीय येाजनांचा लाभ ऑनलाईन पध्दतीने देण्यासाठी जिल्ह्याच्या शेवटच्या टोकापर्यंत मोबाईल नेटवर्क असणे गरजेचे आहे. त्यामुळे अखंडीत सेवा पुरविण्याकरीता प्रशासनासोबतच सर्व्हीस प्रोव्हायडरचे सुध्दा सहकार्य आवश्यक आहे. याबाबत काही अडचणी असल्यास तात्काळ जिल्हा प्रशासनाला कळवाव्यात, असे आवाहनही त्यांनी केले.

०००००००

जिल्हा क्रीडा पुरस्कारासाठी अर्ज आमंत्रित

 

जिल्हा क्रीडा पुरस्कारासाठी अर्ज आमंत्रित

Ø अंतिम मुदत 12 जानेवारी 2026 पर्यंत

चंद्रपूर, दि. 29 :  क्रीडा क्षेत्रात उल्लेखनीय कामगिरी करणारे खेळाडू व क्रीडा मार्गदर्शक यांच्या कार्याचा गौरव व्हावा व त्यांना प्रोत्साहन मिळावे, या उद्देशाने दरवर्षी महाराष्ट्र शासनाच्या क्रीडा व युवक सेवा संचालनालय, पुणेच्या वतीने जिल्ह्यातील तीन सर्वोत्कृष्ट गुणंवत खेळाडू (महिला, पुरुष व दिव्यांग) व एक गुणंवत क्रीडा मार्गदर्शकाला पुरस्कार दिले जातात.

त्या अनुषंगाने सन 2024-25 करिता चंद्रपूर जिल्ह्यातील खेळाडू, व क्रीडा मार्गदर्शक यांच्याकडून जिल्हा क्रीडा पुरस्काराकरिता अर्ज मागविण्यात येत आहे. सदर अर्ज 12 जानेवारी 2026 पर्यंत जिल्हा क्रीडा अधिकारी कार्यालय, चंद्रपूर येथे क्रीडा अधिकारी मोरेश्वर गायकवाड (मो. क्र. 9423673232) यांच्याकडे उपलब्ध आहे. तसेच हे अर्ज 12 जानेवारी 2026 रोजी पर्यत कार्यालयीन वेळेत सादर करावे. उशीरा येणारे अर्ज स्वीकारले जाणार नाही.

अर्ज सादर करताना अर्जदाराचे महाराष्ट्रात सलग 15 वर्ष वास्तव्य असणे आवश्यक आहे. तसेच क्रीडा मार्गदर्शक म्हणून सतत 10 वर्ष महाराष्ट्रात क्रीडा मार्गदर्शनाचे कार्य केले असले पाहिजे व त्यांनी वयाची 35 वर्ष पुर्ण केलेली असणे आवश्यक आहे. खेळाडूने पुरस्कार वर्षासह लगतपूर्व 5 वर्षापैकी 2 वर्ष त्या जिल्ह्याच्या मान्यता प्राप्त खेळाच्या अधिकृत खेळामध्ये प्रतिनिधीत्व केले असले पाहिजे. तसेच अर्ज करीत असतांना शालेय शिक्षण व क्रीडा विभाग शासननिर्णय दि. 14 डिसेंबर 2022 च्या जिल्हा क्रीडा पुरस्कार नियमातील अटी व शर्तीची पुर्तता करणे आवश्यक आहे.

वरील सर्व पुरस्कारामध्ये प्रत्येकी प्रमाणपत्र, सन्मानचिन्ह व रोख 10 हजार रुपये या बाबींचा समावेश आहे. पुरस्काराकरिता निवड झालेल्या पुरस्कार्थींना 26 जानेवारी भारतीय प्रजासत्ताक दिनाच्या वर्धापनदिनी मुख्य शासकीय कार्यक्रमात पालकमंत्री यांच्या हस्ते पुरस्कार प्रदान करण्यात येणार आहे, असे जिल्हा क्रीडा अधिकारी अविनाश पूंड यांनी कळविले आहे.

००००००

नायलॉन मांजाविरोधात कठोर कारवाईचा इशारा

 

नायलॉन मांजाविरोधात कठोर कारवाईचा इशारा

Ø उच्च न्यायालयाच्या निर्देशानुसार 27 डिसेंबरला सार्वजनिक सूचना प्रसिद्ध

चंद्रपूर, दि. 26 : नायलॉन मांजामुळे होणाऱ्या अपघातांना आळा घालण्यासाठी मा. उच्च न्यायालय, खंडपीठ नागपूर यांनी कठोर भूमिका घेतली असून, नायलॉन मांजाचा वापर व विक्री करणाऱ्यांविरोधात मोठ्या दंडात्मक कारवाईचा इशारा दिला आहे. SMPIL क्रमांक १/२०२१ प्रकरणात मा. न्यायालयाने दिनांक २४ डिसेंबर २०२५ रोजी दिलेल्या आदेशानुसार ही सार्वजनिक सूचना जारी करण्यात आली आहे.

सन २०२१ पासून नायलॉन मांजाच्या वापरावर बंदी घालण्यासाठी वेळोवेळी विविध आदेश पारित करण्यात आले असले तरी प्रत्यक्षात या आदेशांची अंमलबजावणी होत नसल्याचे न्यायालयाच्या निदर्शनास आले आहे. नायलॉन मांजाच्या सर्रास वापरामुळे दरवर्षी अनेक नागरिक गंभीर जखमी होत असून काहींना जीवही गमवावा लागत आहे. यासाठी नायलॉन मांजा वापरणारे तसेच त्याची विक्री करणारे विक्रेते जबाबदार असल्याचे न्यायालयाने नमूद केले आहे.

या पार्श्वभूमीवर मा. उच्च न्यायालयाने संबंधित वापरकर्ते व विक्रेत्यांना अंतिम संधी देण्याचा निर्णय घेतला असून, संभाव्य कठोर कारवाईपूर्वी त्यांचे म्हणणे मांडण्याची संधी देण्यात येत आहे.

सार्वजनिक सूचनेनुसार—

            •अल्पवयीन मुलगा नायलॉन मांजाने पतंग उडवताना आढळल्यास, संबंधित पालकांकडून ५०,००० रुपये दंड वसूल करण्याचे आदेश का देऊ नयेत,

            •प्रौढ व्यक्ती नायलॉन मांजाचा वापर करताना आढळल्यास, त्या व्यक्तीकडून ५०,००० रुपये दंड आकारण्याचे आदेश का देऊ नयेत,

            •नायलॉन मांजाचा साठा विक्रीसाठी आढळलेल्या विक्रेत्याकडून, प्रत्येक उल्लंघनासाठी २,५०,००० रुपये दंड आकारण्याचे आदेश का देऊ नयेत, याबाबत न्यायालयाने विचारणा केली आहे.

या प्रकरणाची पुढील सुनावणी दि. ०५ जानेवारी २०२६ रोजी मा. उच्च न्यायालय, खंडपीठ नागपूर येथे होणार आहे. प्रस्तावित कारवाईविरुद्ध कोणाला निवेदन करावयाचे असल्यास, त्यांनी संबंधित दिवशी न्यायालयात प्रत्यक्ष हजर राहून आपले म्हणणे सादर करावे, असे स्पष्ट करण्यात आले आहे.

निर्धारित तारखेला कोणीही हजर न राहिल्यास किंवा कोणतेही निवेदन सादर न केल्यास, नायलॉन मांजाचा वापर करणाऱ्यांकडून व विक्रेत्यांकडून वरीलप्रमाणे दंड वसूल करण्यास सर्वसामान्य जनतेचा कोणताही आक्षेप नाही, असे गृहीत धरण्यात येईल, असेही न्यायालयाने स्पष्ट केले आहे.

मा. उच्च न्यायालयाच्या निर्देशानुसार ही सार्वजनिक सूचना दि. २७ डिसेंबर २०२५ रोजी चंद्रपूर जिल्ह्यातील सर्व प्रमुख वृत्तपत्रांच्या पहिल्या पानावर प्रसिद्ध करण्यात येत असून, त्याचा अनुपालन अहवाल सादर करण्यात येणार आहे.

००००००

नियोजन भवन येथे अल्पसंख्याक हक्क दिन

 नियोजन भवन येथे अल्पसंख्याक हक्क दिन

चंद्रपूर, दि. 23 : राज्य शासनाने दिलेल्या निर्देशानुसार जिल्हा नियोजन भवन येथे अल्पसंख्याक हक्क दिनाचे आयोजन नुकतेच करण्यात आले. कार्यक्रमाला प्र. जिल्हा नियोजन अधिकारी तथा जिल्हा अल्पसंख्यांक अधिकारी सुभाष कुमरे, सहायक संशोधन अधिकारी सोमेश्वर पी. राऊत, शिक्षणाधिकारी(माध्यमिक) राजेश पाताळे,  सहायक संचालक अनिसा तडवी, औद्योगिक संस्थेचे प्राचार्य (मुलींची) कल्पना खोब्रागडे, मौलाना आझाद महामंडळाचे जिल्हा व्यवस्थापक ओवेस अंसारी तसेच सर्व अल्पसंख्यांक समुदायातील प्रतिनिधी उपस्थित होते. 

अल्पसंख्याक हक्क दिवसानिमित्त श्री कुमरे यांनी अल्पसंख्यांक समुदायांकरीता शासनाकडून राबविण्यात येत असलेल्या योजनांची माहिती दिली. अनिसा तडवी यांनी रोजगार व स्वयंरोजगारांबाबत अल्पसंख्यांक समुदायांकरीता असलेल्या योजनांबाबत माहिती सांगितली. तसेच शिक्षणाधिकारी राजेश पाताळे यांनी सुध्दा शिक्षणविषयक असलेल्या सर्व योजनांची माहिती, प्राचार्य कल्पना खोब्रागडे यांनी अल्पसंख्यांक असलेल्या मुलींना उच्च शिक्षण घेण्याकरीता वसतीगृहात असलेल्या नि:शुल्क सोयी व सुविधांची माहिती सांगितली. यावेळी जिल्हा व्यवास्थापक ओवेस अंसारी यांनी अल्पसंख्यांक समुदायांकरीता असलेल्या बॅंकेतील कर्ज योजना व इतर योजनांबाबत मार्गदर्शन केले.

कार्यक्रमाला कार्यालयातील अधिकारी व कर्मचारी उपस्थित होते.

००००००

एकलव्य मॉडेल रेसिडेंशियल स्कुल देवाडा करिता प्रवेश अर्ज सुरू

एकलव्य मॉडेल रेसिडेंशियल स्कुल देवाडा करिता प्रवेश अर्ज सुरू

चंद्रपूर,दि. 23 :   राष्ट्रीय आदिवासी छात्र शिक्षा समितीच्या मार्गदर्शक सूचनांनुसार सन 2026-27 या शैक्षणिक वर्षासाठी महाराष्ट्रातील एकलव्य मॉडेल रेसिडेंशियल स्कुलची प्रवेश प्रक्रिया राबविण्यात येत आहे. त्या अंतर्गत येत्या 1 मार्च 2026 रोजी प्रवेश पूर्व परिक्षा एकलव्य मॉडेल रेसिडेंशियल स्कुल, देवाडा, ता.राजुरा, येथे घेण्यात येणार आहे. या परीक्षाद्वारे इयत्ता 6 वी करिता 2220 नविन विद्यार्थ्यांची प्रवेश भर्ती तसेच इयत्ता 7 वी ते 9 करिता रिक्त असलेल्या जागांचा अनुशेष भरण्यात येणार आहे.

एकलव्य मॉडेल रेसिडेंशियल स्कुल, देवाडा मध्ये इयता 6 वी करिता 30 मुले व 30 मुली अशी 60 प्रवेश क्षमता राहणार आहे व इयत्ता 6 वी ते 9 वी ची भरती ही पुर्व परिक्षाद्वारे भरण्यात येणार आहे. विद्यार्थ्यांची निवड गुणानुक्रमाने प्राधान्य क्रमानुसार होणार आहे. एकलव्य मॉडेल रेसिडेंशियल स्कुल मधील प्रवेशाकरिता अर्ज प्रकल्प अधिकारी, एकात्मिक आदिवासी विकास प्रकल्प, चंद्रपुर व प्रकल्पांतर्गत येत असलेल्या शासकीय / अनुदानित आश्रमशाळा व शासकीय वसतीगृह,  एकलव्य स्कुल मध्ये उपलब्ध आहेत.

अर्जाकरीता पात्रता : लाभार्थी अनुसुचित जमातीचा असावा तसेच वडीलांचे वार्षिक उत्पन्न 6 लक्ष रुपयांपेक्षा कमी असावे. अशा पात्र व इच्छुक विद्यार्थ्यांनी 10 फेब्रुवारी 2026 पर्यंत प्रकल्प कार्यालय, चंद्रपुर येथे अर्ज सादर करण्याचे आवाहन प्रकल्प अधिकारी विकास राचेलवार यांनी केले आहे.

००००००

19 ते 25 डिसेंबर दरम्यान ‘प्रशासन गाँव की और’ अभियान

19 ते 25 डिसेंबर दरम्यान ‘प्रशासन गाँव की और’ अभियान

चंद्रपूर, दि. 23 :  प्रशासनिक सुधार आणि लोक तक्रार विभाग कार्मिक, लोक तक्रार आणि पेंशन मंत्रालय भारत सरकारद्वारे गुडगर्व्हनस विक -2025 अंतर्गत ‘प्रशासन गाव की और’ मोहीम 19 ते 25 डिसेंबर या कालावधीत राबविण्यात येत आहे.

त्या अनुषंगाने सदर मोहिमेंतर्गत विविध कार्यक्रम व शिबीर सर्व तालुका स्तरावर तहसील मुख्यालय / पंचायत समित्या इत्यादी ठिकाणी  राबविण्यात येणार आहे. सुशासनाला चालना देणे, तसेच सार्वजनिक तक्रारीचे निवारण आणि सार्वजनिक सुधारणा व सेवा वितरण हा या मोहिमेचा प्रमुख उद्देश आहे.

सदर कार्यक्रमाची रुपरेषा खालीलप्रमाणे आहे : 1. विशेष शिबिर आयोजीत करून शिबिरामध्ये सोडवलेल्या सार्वजनिक तक्रारींची  संख्या, 2. CPGRAMS मध्ये सोडवलेल्या सार्वजनिक तक्रारीची संख्या, 3. राज्य पोर्टलवर सोडवलेल्या सार्वजनिक तक्रारीची संख्या, 4. ऑनलाईन सेवा वितरणासाठी जोडलेल्या सेवांची संख्या, 5. निकाली काढलेल्या सेवा वितरण अर्जाची संख्या, 6. सुशासन पद्धतीचे संकलन आणि प्रसार आणि पोर्टलवर आवश्यक चित्रासह ते सामायिक करणे, 7. सार्वजनिक तक्रारींचे निराकरण करण्यासाठी यशोगाथा, 8.   प्रसार कार्यशाळेचे तपशील.

तरी सर्व नागरिकांनी सदर गुड गर्व्हनस विक 2025 अंतर्गत ‘प्रशासन गाव की और’  मोहिमेत शिबिराचा लाभ घ्यावा, असे निवासी उपजिल्हाधिकारी डी. एस. कुंभार यांनी कळविले आहे.

०००००००

धान/भरडधान्य खरेदीकरीता शेतकरी नोंदणीला मुदतवाढ

 धान/भरडधान्य खरेदीकरीता शेतकरी नोंदणीला मुदतवाढ

चंद्रपूर,दि. 23 :  पणन हंगाम 2025-26 खरीप मधील शासकीय आधारभुत किमत खरेदी योजनेअंतर्गत धान/भरडधान्य खरेदी करीता शेतकरी नोंदणीला या पुर्वी 15 डिसेंबर पर्यंत मुदत देण्यात आली होती. परंतु मागील हंगामाच्या तुलनेत चालू हंगामामध्ये अत्यंत अल्प प्रमाणात शेतकरी नोंदणी झालेली असून, कोणताही शेतकरी नोंदणीपासून वंचित राहू नये याकरीता खरीप पणन हंगाम 2025-26 मधील धान व भरडधान्य उत्पादक शेतकरी नोंदणी करीता 31 डिसेंबर 2025 पर्यंत मुदत वाढ देण्यात आली आहे.

तरी धान/ भरडधान्य उत्पादक शेतकऱ्यांनी आपल्या नजीकच्या खरेदी केंद्रावर जावून मुदतीत ऑनलाईन नोंदणी करावी, असे जिल्हा मार्केटिंग अधिकारी व्ही. एस. तिवाडे यांनी कळविले आहे.

००००००

मतमोजणीच्या दिवशी घुग्गुस, बल्लारपूर व वरोरा येथील आठवडी बाजार बंद— जिल्हाधिकारी विनय गौडा यांचे आदेश

मतमोजणीच्या दिवशी घुग्गुस, बल्लारपूर व वरोरा येथील आठवडी बाजार बंद— जिल्हाधिकारी विनय गौडा यांचे आदेश

चंद्रपूर, दि. १९ : नगरपालिका/नगरपंचायत सार्वत्रिक निवडणूक–२०२५ चा कार्यक्रम जाहीर झाल्यानंतर दिनांक ४ नोव्हेंबर २०२५ पासून आदर्श आचारसंहिता लागू करण्यात आली आहे. राज्य निवडणूक आयोगाने जाहीर केलेल्या कार्यक्रमानुसार चंद्रपूर जिल्ह्यातील बल्लारपूर, राजुरा, गडचांदुर, भद्रावती, वरोरा, चिमूर, ब्रम्हपूरी, नागभिड, मुल, घुग्गुस या नगरपालिकांसह भिसी नगरपंचायतीसाठी दिनांक २१ डिसेंबर २०२५ रोजी सकाळी १० वाजल्यापासून मतमोजणी प्रक्रिया पार पडणार आहे.

मतमोजणीच्या दिवशी आठवडी बाजार भरविल्यास मोठ्या प्रमाणात गर्दी होऊन आदर्श आचारसंहितेचे पालन व कायदा-सुव्यवस्था राखण्यास अडचणी निर्माण होण्याची शक्यता लक्षात घेता जिल्हा प्रशासनाने महत्त्वाचा निर्णय घेतला आहे.

दिनांक २१ डिसेंबर २०२५ (रविवार) रोजी मतमोजणीच्या दिवशी घुग्गुस, बल्लारपूर व वरोरा या नगरपालिकांचा आठवडी बाजार येत असल्याने सदर बाजार बंद ठेवण्यास मान्यता देण्यात आली आहे. त्यानुसार जिल्हाधिकारी तथा जिल्हादंडाधिकारी  विनय गौडा जी. सी. यांनी मार्केट अँड फेअर अ‍ॅक्ट, १८६२ च्या कलम ५(अ) अंतर्गत प्राप्त अधिकारांचा वापर करून दिनांक २१ डिसेंबर २०२५ रोजी घुग्गुस, बल्लारपूर व वरोरा येथील आठवडी बाजार बंद ठेवण्याचे आदेश जारी केले आहेत.

सदर आदेश आज दिनांक १९ डिसेंबर २०२५ रोजी जिल्हाधिकाऱ्यांच्या सही व  शिक्क्यानिशी निर्गमित करण्यात आला असून नागरिक, व्यापारी व संबंधितांनी आदेशाचे पालन करावे, असे आवाहन जिल्हा प्रशासनाकडून करण्यात आले आहे.

000000

मतमोजणीदरम्यान कायदा व सुव्यवस्था राखण्यासाठी जिल्हाधिकाऱ्यांचे निर्बंधात्मक आदेश

 मतमोजणीदरम्यान कायदा व सुव्यवस्था राखण्यासाठी जिल्हाधिकाऱ्यांचे निर्बंधात्मक आदेश

चंद्रपूर, दि. १९ : राज्य निवडणूक आयोगाने जाहीर केलेल्या नगरपरिषद/नगरपंचायत सार्वत्रिक निवडणूक–२०२५ च्या कार्यक्रमानुसार चंद्रपूर जिल्ह्यातील बल्लारपूर, राजुरा, गडचांदुर, भद्रावती, वरोरा, चिमूर, ब्रम्हपूरी, नागभिड, मुल, घुग्गुस या नगरपालिकांसह भिसी नगरपंचायतीसाठी दिनांक २१ डिसेंबर २०२५ रोजी सकाळी १० वाजतापासून मतमोजणी प्रक्रिया पार पडणार आहे.

मतमोजणीदरम्यान कायदा व सुव्यवस्था अबाधित राखण्याच्या दृष्टीने जिल्हादंडाधिकारी विनय गौडा जी. सी. यांनी भारतीय नागरिक सुरक्षा संहिता, २०२३ चे कलम १६३ अन्वये निर्बंधात्मक आदेश जारी केले आहेत. हे आदेश दिनांक २१ डिसेंबर २०२५ रोजी सकाळी ८ वाजेपासून मतमोजणीची संपूर्ण प्रक्रिया संपेपर्यंत लागू राहतील.

आदेशानुसार, मतमोजणी केंद्राच्या बाहेरील १०० मीटर परिसरात सर्व प्रकारच्या वाहतुकीस प्रतिबंध राहील. तसेच दुकाने, आस्थापना व व्यवसाय केंद्र बंद ठेवण्याचे निर्देश देण्यात आले आहेत. मतमोजणीसाठी नियुक्त अधिकारी, कर्मचारी, पोलीस, विद्युत, अग्निशमन व सुरक्षा व्यवस्थेतील वाहनांनाच केंद्र परिसरात प्रवेश देण्यात येणार असून इतर सर्व वाहनांवर बंदी राहील.

राज्य निवडणूक आयोगाने वितरित केलेल्या अधिकृत ओळखपत्राशिवाय कोणालाही मतमोजणी परिसरात प्रवेश दिला जाणार नाही. तसेच मतमोजणीच्या दिवशी केंद्राच्या बाहेरील १०० मीटर परिसरात दोन किंवा त्यापेक्षा अधिक व्यक्ती एकत्र जमण्यास मनाई करण्यात आली आहे. उमेदवार व पत्रकारांना ठरवून दिलेल्या बैठक व्यवस्थेच्या ठिकाणी आवश्यकतेनुसार मोबाईल फोन वापरण्याची मुभा देण्यात आली असली तरी प्रत्यक्ष मतमोजणी कक्षात मोबाईल फोन किंवा कोणतेही इलेक्ट्रॉनिक उपकरण नेण्यास व वापरण्यास सक्त मनाई करण्यात आली आहे.

याशिवाय, मतमोजणी केंद्राच्या सभोवताल १ किलोमीटर परिसरात दिनांक २१ डिसेंबर २०२५ रोजी सकाळी १० वाजेपासून मतमोजणी प्रक्रिया पूर्ण होईपर्यंत ड्रोन किंवा ड्रोनसदृश उडणाऱ्या वस्तू उडविण्यावर बंदी घालण्यात आली आहे. सदर आदेशाचे उल्लंघन करणाऱ्यांवर कायदेशीर कारवाई करण्यात येईल, असेही जिल्हाधिकाऱ्यांच्या आदेशात स्पष्ट करण्यात आले आहे.

000000

अवैध सावकारीला आळा घालण्यासाठी प्रशासन ‘ॲक्शन मोडवर’

अवैध सावकारीला आळा घालण्यासाठी प्रशासन ‘ॲक्शन मोडवर’

Ø शासनाच्या नियमांचे पालन करण्याचे जिल्हाधिका-यांचे सावकारांना आवाहन

चंद्रपूर, दि. 19 : चंद्रपूर जिल्ह्यात अवैध सावकारीतून घडलेल्या घटनेच्या पार्श्वभुमीवर जिल्हाधिकारी विनय गौडा जी.सी. यांनी शुक्रवारी जिल्ह्यातील सर्व सावकारांची आढावा बैठक घेतली. सावकारी कायदा व अधिनियम 2014 मध्ये दिलेल्या नियमांचे पालन करूनच सावकारी करणे बंधनकारक आहे, असेही त्यांनी स्पष्ट केले. नियोजन सभागृह येथे पार पडलेल्या या बैठकीला जिल्हा पोलिस अधिक्षक मुम्मका सुदर्शन, अतिरिक्त्‍ पोलिस अधिक्षक ईश्वर कातकाडे, जिल्हा उपनिबंधक, सहकारी संस्था जयसिंह ठाकूर उपस्थित होते.

यावेळी जिल्हाधिकारी श्री. गौडा म्हणाले, महाराष्ट्रात सावकारी कायदा अधिनियम -2014 लागू आहे. या कायद्याची प्रभावी अंमलबजावणी करून सावकारांनी नियमांचे पालन करावे. सर्व परवानाधारक सावकारांनी नोंदणी करणे आवश्यक आहे. शासनाने व्याजाचा दर निश्चित केला आहे. या दरापेक्षा जास्त दर आकारू नये. जास्त दर लावणे हा गुन्हा असून कायदेशीर कारवाईची तरतुद नियमात आहे. तसेच कर्ज दिल्यानंतर वसुलीकरीता मारहाण, अवैध मार्गाने दमदाटी व बळजबरी करता येणार नाही. व्यवसाय करतांना नियम आणि कायदे पाळणार नाही, त्यांच्यावर कडक कारवाई केली जाईल, असे जिल्हाधिकारी श्री. गौडा यांनी स्पष्ट केले.

पोलिस अधिक्षक श्री. सुदर्शन म्हणाले, परवानाधारक सावकारांनी नियमातच आपला व्यवसाय करावा. अैवधरित्या सुरू असलेल्या सावकारीची माहिती असल्यास पोलिस प्रशासनाला कळवावी. माहिती देणा-याचे नाव गोपनीय ठेवले जाईल.

सादरीकरणात जिल्हा उपनिबंधक श्री. ठाकूर यांनी उपस्थित सावकारांना कायद्याबाबत माहिती दिली. यावेळी ते म्हणाले, सावकारी कायदा व अधिनियम 2014 च्या कलम 5 नुसार व्यवसायासाठी परवाना घेणे आवश्यक आहे. सावकारी रेकॉडची तपासणी करण्याकरीता निबंधकाने मागणी केल्यास कलम 16 नुसार ती उपलब्ध करून देणे प्रत्येकाला बंधनकारक आहे. तसेच अवैध सावकारीतून मालमत्ता खरेदी केली असल्यास कलम 18 नुसार ती रद्द करण्याचे अधिकार निबंधकांना आहे. राज्य शासनाच्य 16 सप्टेंबर 2014 च्या कायद्यामध्ये व्याजाचे दर निश्चित करण्यात आले आहे. यापेक्षा जास्त दर लावले तर कायदेशीर कारवाई होऊ शकते, असेही त्यांनी सांगितले.

येथे करा तक्रार : जिल्हा हेल्पलाईन क्र. 18002338691 वर तसेच जिल्हाधिकारी कार्यालय चंद्रपूर, सहाय्यक निबंधक, सहकार विभाग, उप निबंधक, सहकार विभाग,  जवळचे पोलिस ठाणे येथे तक्रार दाखल करू शकतो. आपली तक्रार गोपनीय ठेवण्यात येईल.

००००००

महानगरपालिका निवडणुकीच्या पार्श्वभुमीवर जिल्हाधिका-यांकडून यंत्रणेचा आढावा

 महानगरपालिका निवडणुकीच्या पार्श्वभुमीवर जिल्हाधिका-यांकडून यंत्रणेचा आढावा

चंद्रपूर, दि. 19 : चंद्रपूर शहर महानगर पालिकेची निवडणूक जाहीर होताच महानगर पालिका क्षेत्रात आदर्श आचारसंहिता लागू झाली आहे. या पार्श्वभुमीवर जिल्हाधिकारी विनय गौडा जी.सी. यांनी गुरुवारी संबंधित यंत्रणेचा आढावा घेऊन सुचना दिल्या.

जिल्हाधिकारी कार्यालयात पार पडलेल्या या बैठकीला जिल्हा पोलिस अधिक्षक मुम्मका सुदर्शन, मनपा आयुक्त अकुनूरी नरेश, उपायुक्त संदीप चिद्रवार, पोलिस उपअधिक्षक प्रमोद चौगुले, महावितरणच्या अधिक्षक अभियंता संध्या चिवंडे, वस्तु व  सेवा कर विभागाचे उपायुक्त संतोष हेमणे, राज्य उत्पादन शुल्क विभागाचे अधिक्षक नितीन धार्मिक, वाहतूक पोलिस निरीक्षक प्रवीण पाटील, पोलिस निरीक्षक आसिफरजा शेख, परिवहन विभागाच्या विभागीय नियंत्रण स्मिता सुतावणे व इतर अधिकारी उपस्थित होते.

यावेळी जिल्हाधिकारी श्री. गौडा म्हणाले, आदर्श आचारसंहितेचे पालन करणे आवश्यक आहे. निवडणुकीच्या काळात सर्व संबंधित यंत्रणांनी अतिशय गांभियाने आणि जबाबदारीने काम करावे. कोणतीही चूक होऊ देऊ नये. निवडणूक संदर्भात कोणतीही तक्रार येणार नाही, याची दक्षता घ्यावी. निवडणुकीच्या कामासाठी वेगवेगळे पथक तयार करून त्यांची प्रभावी अंमलबजावणी करावी. महानगर पालिकेने निवडणूक नियंत्रण कक्ष, विविध परवानग्या देण्यासाठी एक खिडकी योजना त्वरीत सुरू करावी, अशा सुचना जिल्हाधिका-यांनी दिल्या.

यावेळी मनपा आयुक्त अकुनुरी नरेश यांनी सादरीकरणातून स्थापन करण्यात आलेल्या सनियंत्रण समितीचे कार्ये, निगराणी पथके, भरारी पथके, तक्रार निवारण आदींविषयी माहिती दिली.

००००००

एकलव्य मॉडेल रेसीडेंशियल स्कूल प्रवेशासाठी अर्ज आमंत्रित

 

एकलव्य मॉडेल रेसीडेंशियल स्कूल प्रवेशासाठी अर्ज आमंत्रित

Ø अंतिम मुदत 31 जानेवारी 2026

Ø प्रवेशपूर्व स्पर्धा परीक्षा 1 मार्च रोजी

चंद्रपूर, दि. 19 : आदिवासी विकास विभाग, चिमूर कार्यालयांतर्गत कार्यान्वित असलेल्या एकलव्य मॉडेल रेसीडेंशियल स्कुल मध्ये सन 2026-27 या शैक्षणिक वर्षात इयत्ता 6 वीच्या वर्गात प्रवेश घेवू इच्छिणाऱ्या व इयत्ता 7 ते 9 वीच्या वर्गातील विद्यार्थी अनुशेष भरून काढण्यासाठी चालू शैक्षणिक वर्षात इयत्ता 5 वी 5तसेच इयत्ता 6 वी ते 8 वी च्या वर्गात शिक्षण घेत असलेल्या अनुसूचित / आदिम जमातीच्या विद्यार्थ्यांसाठी रविवार दि. 1 मार्च 2026 रोजी प्रवेशपूर्व स्पर्धा परिक्षेचे आयोजन करण्यात आले आहे.

इयत्ता ६ वीच्या विद्यार्थ्यांसाठी सकाळी 11 ते दुपारी 1 या वेळेत तसेच इयत्ता 7 वी ते इयत्ता 9 वीच्या विद्यार्थ्यांसाठी सकाळी 11 ते दुपारी 2 या वेळेत शासकीय माध्यमिक आश्रमशाळा, जांभुळघाट ता. चिमूर येथे प्रवेशपूर्व स्पर्धा परीक्षा होणार आहे. ज्या पालकाचे वार्षिक उत्पन्न 6 लक्ष रुपयांपेक्षा कमी आहे, अशा प्रवेशोच्छुक विद्यार्थ्यांचे पालक शिक्षक /मुख्याध्यापक यांनी सविस्तर माहिती व परीक्षा आवेदन पत्रासाठी या प्रकल्पाचे अधिनस्त असलेल्या शासकीय आश्रमशाळा व अनुदानित आश्रमशाळा येथील मुख्याध्यापक किंवा प्रकल्प कार्यालय, चिमूर येथे संपर्क करावा. आवेदनपत्र सादर करण्याचा अंतिम दिनांक 31 जानेवारी 2026 आहे.

तरी चंद्रपूर जिल्ह्यातील सर्व व्यवस्थापनाच्या शाळातील अनुसूचित जमाती व आदिम जमातीच्या जास्तीत जास्त विद्यार्थ्यांनी एकलव्य मॉडेल रेसीडेंशियल स्कुलमध्ये प्रवेश घ्यावा, असे आवाहन एकात्मिक आदिवासी विकास प्रकल्प, चिमूरचे सहाय्यक प्रकल्प अधिकारी एम.व्ही.डुले यांनी केले आहे.

००००००

सावकारांकडून होणा-या छळाबद्दल करा तक्रार

 सावकारांकडून होणा-या छळाबद्दल करा तक्रार

Ø जिल्हा प्रशासनाचे आवाहन

चंद्रपूर, दि. 18 : महाराष्ट्र सावकारी (नियमन) अधिनियम, 2014 नुसार सावकारी करण्यासाठी शासनाकडून वैध परवाना आवश्यक आहे. परवाना नसलेले सावकारांकडून जास्त व्याज आकारणे, कर्जदारास धमकी, मानसिक किंवा शारीरिक छळ, मालमता जप्ती, बळजबरीने कागदांवर सही करून घेणे हे सर्व प्रकार बेकायदेशीर असून असा व्यवसाय करणारे सावकार हे शिक्षेस पात्र आहेत. त्यामुळे आपण अशा छळास बळी पडत असाल तर घाबरू नका, कोणत्याही दबावाला बळी पडू नका, कोरे कागद, धनादेश किंवा दस्तऐवजांवर स्वाक्षरी करू नका, जास्त व्याज व बेकायदेशीर वसुली मान्य करू नका. याबाबत त्वरीत तक्रार करा, असे आवाहन जिल्हा प्रशासनाने केले आहे.

येथे करा तक्रार : जिल्हा हेल्पलाईन क्र. 18002338691 वर तसेच जिल्हाधिकारी कार्यालय चंद्रपूर, सहाय्यक निबंधक, सहकार विभाग, उप निबंधक, सहकार विभाग,  जवळचे पोलिस ठाणे येथे आपण तक्रार दाखल करू शकतो. आपली तक्रार गोपनीय ठेवण्यात येईल. त्यामुळे जिल्ह्यातील शेतकरी, शेतमजुर, आदिवासी बांधव, महिला, ज्येष्ठ नागरिक व आर्थिकदृष्ट्या दुर्बल घटकांनी वरील ठिकाणी तक्रार नोंदवावी, असे आवाहन करण्यात आले आहे.

००००००

महानगरपालिका निवडणुकीच्या पार्श्वभुमीवर 163 लागू

महानगरपालिका निवडणुकीच्या पार्श्वभुमीवर 163 लागू

Ø जिल्हाधिका-यांनी निर्गमित केले आदेश

चंद्रपूर,दि. 18 : राज्य निवडणूक आयोगाने राज्यातील 29 महानगरपालिकेच्या सार्वत्रिक निवडणुकीची घोषणा करून आदर्श आचारसंहिता तात्काळ प्रभावाने लागू केली आहे.  निवडणूक प्रक्रिया शांत, निर्भय, मुक्त व पारदर्शक वातावरणामध्ये पार पाडण्यासाठी चंद्रपूर शहर महानगरपालिका कार्यक्षेत्रात कोणताही भंग होऊ नये व सदर आचार संहितेचे यथायोग्य पालन होण्याचे दृष्टीने उपायोजना करण्यासाठी भारतीय नागरीक सुरक्षा संहिता, 2023 चे कलम 163 लागू करण्यात आले आहे.

चंद्रपूर शहर महानगरपालिका कार्यक्षेत्रात लागु असलेली आदर्श आचारसंहिता अंमलात असेपर्यंतचे कलम 163 मधील तरतुदीनुसार जिल्हादंडाधिकारी तथा जिल्हाधिकारी चंद्रपूर यांनी खालील बाबींवर निर्बंध लागु केले आहे. यात 1. शासकीय कार्यालये/विश्रामगृहे इत्यादी परिसरात मिरवणुका काढण्यास, घोषणा देणे/सभा घेणे इत्यादीवर निर्बंध, 2. शासकीय/निमशासकीय सार्वजनिक मालमत्तेची प्रत्यक्ष किंवा अप्रत्यक्ष स्वरुपात विद्रुपीकरण करण्यास निर्बंध, 3. उमेदवारांचे नामनिर्देशन दाखल करतेवेळी ताफ्यामध्ये 3 पेक्षा जास्त मोटारगाडया/वाहने तसेच निवडणुक निर्णय अधिकारी यांच्या कार्यालयाच्या 100 मिटर परिसरात व दालनात 5 व्यक्ती व्यतिरिक्त कोणालाही प्रवेश करण्यास निर्बंध, 4. निवडणुक प्रक्रिया पूर्ण होईपर्यंत इतर उमेदवाराचे नाव व चिन्ह वापरणे, आयोगाने निश्चित केल्याप्रमाणे कागद वापरणे तसेच निश्चित केलेल्या कागदाच्या आकारामध्ये नमुना मतपत्रिका छपाईस निर्बंध, 5.निवडणूक प्रक्रिया पूर्ण होईपर्यंत निवडणुक निर्णय अधिकारी यांच्या कार्यालयाचे 200 मी. परिसरात धरणे आंदोलन, मोर्चा, निदर्शने, उपोषणे करण्यावर निर्बंध, 6. धार्मिक स्थळे, रुग्णालये किंवा शैक्षणिक संस्था व सार्वजनिक ठिकाणाचा प्रचार कार्यालयासाठी वापर करता येणार नाही तसेच सदर ठिकाणापासून जवळपास तात्पुरते पक्ष कार्यालय स्थापन करण्यास निर्बंध, 7. निवडणुक प्रक्रिया पूर्ण होईपर्यंत जात/धर्म/भाषावार शिबिरांचे आयोजन करण्यावर निर्बंध, 

8. निवडणुकीचे प्रचाराकरीता निवडणूक निर्णय अधिकारी यांच्याकडून अधिकृत परवानगी घेतलेल्या वाहना व्यतिरिक्त इतर कोणत्याही वाहनावर पक्ष प्रचाराचे कापडी फलक, झेंडे लावणे इत्यादी बार्बीवर निर्बंध. 9. निवडणुक प्रक्रिया पूर्ण होईपर्यंत खाजगी व्यक्तींच्या जागेवर/सार्वजनिक जागेवर झेंडे, भित्तीपत्रके जागा मालकाच्या व संबंधित प्राधिकरणाच्या परवानगी शिवाय लावण्यास निर्बंध, 10. निवडणुक प्रक्रिया पूर्ण होईपर्यंत प्रचार/रॅली/रोड-शो याकरीता वाहनाच्या ताफ्यात 10 पेक्षा अधिक ( यामध्ये जास्तीत जास्त 3 वाहने चारचाकी अथवा तीनचाकी व इतर वाहने दुचाकी असू शकतात) मोटार गाडया/वाहने वापरण्यास निर्बंध, 11. मतदान सुरु होण्याच्या दिनांकापूर्वी 24 तास अगोदर कुठल्याही माध्यमाव्दारे प्रत्यक्षरित्या अथवा सोशल मिडीयाव्दारे प्रचार करण्यास बंदी राहील. 12. कोणताही पक्ष अथवा उमेदवार, वेगवेगळ्या जाती, धर्म, भाषा अथवा सामाजिक गट यांच्यामध्ये मतभेद होणारी किंवा ज्यामुळे, त्यांच्यात परस्परांमध्ये द्वेश किंवा तणाव निर्माण होईल अशी कोणतीही कृती करण्यावर बंदी राहील. 13. जात, धर्म, जमात किंवा भाषा यांच्या आधारे आचारसंहिता कालावधीमध्ये अधिवेशन घेता येणार नाही, 14. निवडणूक प्रचार कालावधीमध्ये प्राण्यांचा तसेच 14 वर्षांखालील मुलांचा प्रचारासाठी वापर करण्यास बंदी राहील.

सदर आदेश जिल्हादंडाधिकारी विनय गौडा जी.सी. यांच्या स्वाक्षरीने निर्गमित करण्यात आले आहे.

०००००००