हेल्मेट चा वापर करीत युवकांनी वाहतूक नियमांचे पालण करावे : ना.हंसराज अहीर

आरटीओ व राज्य मराठी पत्रकार संघातर्फे हेल्मेट वितरण कार्यक्रम आयोजन

      चंद्रपूर, दि.28 सप्टेंबर - देशाचे शिस्तबध्द युवक म्हणून या शहराला हेल्मेट घालणा-यांचे शहर बनविण्यासाठी युवकांनी वाहतूक नियमांचे पालन करायला हवे. सद्या अपघाताचे प्रमाण वाढत असून दरवर्षी रस्ते अपघात 1 लाखापेक्षा जास्त जीव जात असल्याचे प्रमाण बघता दोन चाकी गडी चालवितांना हेल्मेटचा वापर केल्यास हे प्रमाण कमी करता येते, असे विधान करुन तुम्ही हेल्मेट घालून गाडी चालविण्याची जन जागृती करा, असे आवाहन उपप्रादेशिक परिवहन कार्यालय व महाराष्ट्र राज्य मराठी पत्रकार संघ यांच्या संयुक्त विद्यमाने महाविद्यालयीन विद्यार्थ्यांना हेल्मेट वाटपाच्या कार्यक्रमात केंद्रीय गृहराज्यमंत्री ना.हंसराज अहीर यांनी केले.

            जिल्हा नियोजन सभागृहात आयोजित या कार्यक्रमात केंद्रिय गृहराज्यमंत्री ना.हंसराज अहीर, महापौर अंजली घोटेकर, जिल्हाधिकारी डॉ.कुणाल खेमनार, जिल्हा पोलीस अधीक्षक डॉ.महेश्वर रेड्डी, उपप्रादेशिक परिवहन अधिकारी विश्वंम्भर शिंदे, संघाचे जिल्हाध्यक्ष प्रा.महेश पानसे इत्यादींची प्रमुख उपस्थिती होती. चंद्रपूर शहरातील राजीव गांधी अभियांत्रिकी महाविद्यालय यासह दहा महाविद्यालयाचे 150 विद्यार्थ्यांना हेल्मेट वाटप करण्यात आले. जिल्हा वाहतूक सुरक्षा विभाग, महाराष्ट्र राज्य मराठी पत्रकार संघ व शहर वाहतुक पोलीस विभाग यांच्या संयुक्त विद्यमाने शहरात हेल्मेट वापरासंबंधी जनजागृती करण्याच्या उद्देशाने महाविद्यालयीन विद्यार्थ्यांना हेल्मेट वाटप करण्याचा उपक्रम राबविण्यात आला होता. हा कार्यक्रम रस्ते अपघाताचे प्रमाण कमी करण्यास प्रेरणा देणार आहे. विशेष करुन महाराष्ट्र राज्य मराठी पत्रकार संघानी या उपक्रमात आपले सर्वोच्च योगदान दिल्याने त्यांचे मी आभार मानतो, असे प्रतिपादन केंद्रीय गृहराज्यमंत्री ना.हंसराज अहीर यांनी केले. या कार्यक्रमाचे सुत्र संचालन पोलीस जनसंपर्क अधिकारी मुंडे यांनी केले. तर प्रास्ताविक उपप्रादेशिक परिवहन अधिकारी शिंदे यांनी केले. या कार्यक्रमात मोठया प्रमाणात विद्यार्थी व महाराष्ट्र राज्य मराठी पत्रकार संघाचे पदाधिकारी उपस्थित होते.

            या कार्यक्रमाच्या यशस्वी आयोजनासाठी महाराष्ट्र राज्य मराठी पत्रकार संघाचे जिल्हाध्यक्ष प्रा.महेश पानसे, कार्याध्यक्ष सुनील बोकडे, जिल्हा संघटक राजु कुकुडे, जिल्हा सरचिटणीस जितेंद्र चोरडीया, विनोद दुर्गे, सुनील पाटील, धम्म प्रकाश देवगडे, कवेश कष्टी इत्यादींनी परिश्रम घेतले.

                                                           000