ओबीसी प्रवर्गातील युवकाकरिता कर्ज पुरवठा योजना

चंद्रपूर, 19 नोव्हेंबर: महाराष्ट्र शासनाच्या इतर मागासवर्गीय वित्त आणि विकास महामंडळाच्या वतीने लघुउद्योगाकरिता ओबीसी प्रवर्गातील युवक आणि युवतीसाठी स्वयंरोजगाराकरिता अत्यल्प व्याजदराने कर्जपुरवठा योजना सुरू करण्यात आली असून याचा जास्तीत जास्त युवकांनी लाभ घ्यावा, असे आवाहन इतर मागासवर्गीय वित्त आणि विकास महामंडळामार्फत करण्यात आले आहे.

ओबीसी प्रवर्गाकरिता विविध कर्जपुरवठा योजना शासनाच्यावतीने राबविण्यात येत असून त्यामध्ये विना व्याज असलेली 1 लक्ष रुपयेची थेट कर्जयोजना राबवली जात असून कर्ज परतफेडीची मुदत चार वर्षे आहे. तसेच बीज भांडवल योजनेअंतर्गत 5 लाख पर्यंतचे प्रकल्पास मंजुरी देण्यात येत असून कृषी व संलग्न व्यवसाय, वाहतूक क्षेत्राची संबंधित व्यवसाय तसेच पारंपारिक लघुउद्योगासाठी कर्ज देण्यात येणार आहे. मंजूर कर्ज रकमेच्या 5 टक्के लाभार्थी, 20 टक्के महामंडळ व 75 टक्के बँकेचा सहभाग असणार आहे.

वैयक्तिक कर्ज व्याज परतावा योजना राबवली जात असून मागासवर्गीय प्रवर्गातील कुशल व्यावसायिक व्यक्तींना व्यवसायाकरिता 10 लक्ष रुपयांपर्यंतचे कर्ज उपलब्ध करून देण्यात येणार आहे गट कर्ज व्याज परतावा योजना राबविण्यात येत असून बचत गट, भागीदारी संस्था, सहकारी संस्था, कंपनी, फार्मर प्रोड्यूसर कंपनी अशा संस्थांना बँकेमार्फत उद्योग उभारणीकरिता कर्जपुरवठा करण्यात येणार असून या योजनांचा लाभ मिळण्यासाठी ओबीसी प्रवर्गातील युवक-युवतींनी वित्त आणि विकास महामंडळाच्या कार्यालयाशी संपर्क करावा, असे आवाहन करण्यात आले आहे.

00000