20 जुलैपर्यंत राहणार चना खरेदी व नोंदणी सुरू
चंद्रपूर, दि. 14 : केंद्र शासनाने निश्चित केलेल्या आधारभूत किंमत खरेदी योजनेंतर्गत हंगाम 2023-24 मध्ये एन.सी.सी.एफ. (National Co-oprative Consumer Federation Nashik ) च्या वतीने चना खरेदीस मान्यता दिली आहे. त्यानुसार 8 एप्रिल 2024 पासून चना खरेदीकरीता शेतकरी नोंदणी सुरू झाली असून 20 जुलै 2024 पर्यंत चना खरेदी व नोंदणी सुरू राहणार आहे.
दिनांक 22 एप्रिल 2024 पासून चना खरेदीला सुरुवात झाली असून 25 जूनपर्यंत चना खरेदी करता येणार होता. आता मात्र खरेदी व नोंदणीला मुदतवाढ मिळाली असून 20 जुलै 2024 पर्यंत चना खरेदी करता येणार आहे. चंद्रपूर खरेदी केंद्राला पोंभुर्णा, सावली, मूल तालुका जोडले असून राजूरा केंद्रासोबत बल्लारपूर आणि गोंडपिपरी तालुका, गडचांदूर केंद्रासोबत कोरनपा, जीवती तालुका, चिमूर खरेदी केंद्रासोबत ब्रम्हपुरी, सिंदेवाही, नागभीड तालुका आणि वरोरा खरेदी केंद्रासोबत भद्रावती तालुका जोडण्यात आला आहे. या पाच खरेदी केंद्रावर नॅशलन को-ऑपरेटिव्ह कंझ्युमर फेडरेशन, नाशिक (एन.सी.सी.एफ.) मार्फत चना खरेदी व नोंदणी सुरू करण्यात आली आहे. एनसीसीएफ ने ठरवून दिलेल्या कालावधीत शेतक-यांनी आपल्या नजीकच्या केंद्रावर जावून चना विक्री व नोंदणी करावी, असे जिल्हा मार्केटिंग अधिकारी व्ही.एस.तिवाडे यांनी कळविले आहे.
नोंदणी करण्यासाठी आवश्यक कागदपत्रे : सातबारा, चालू खाते असलेले बँकेचे पासबुक, आधारकार्ड, आठ अ प्रमाणपत्र आवश्यक.
००००००
No comments:
Post a Comment