चंद्रपूर जिल्हयात 1 लक्ष गोल्डन ई-कार्डचे वाटप
चंद्रपूर, दि. 14 फेब्रुवारी : सामान्यातल्या सामान्य माणसाला आरोग्याच्या अडचणी निर्माण झाल्यानंतर आरोग्याच्या काळजी सोबत उपचाराचे ओझे डोक्यावर राहू नये यासाठी आयुष्यमान भारत ही प्रधानमंत्री नरेंद्र मोदी यांनी सुरू केलेली स्वातंत्र्यानंतरची सर्वात महत्त्वाची योजना आहे. या योजनेचा लाभ चंद्रपूर जिल्ह्यातील सर्व पात्र कुटुंबांना मिळावा. त्यासाठी आरोग्य यंत्रणेने गरीब, सामान्य कुटुंबाचे देवदूत बनावे, असे आवाहन राज्याचे वित्त, नियोजन व वने मंत्री तथा चंद्रपूर जिल्ह्याचे पालकमंत्री ना. सुधीर मुनगंटीवार यांनी आज येथे केले.
जिल्हाधिकारी कार्यालयातील नियोजन भवनात आज प्रधानमंत्री जन आरोग्य योजना, अर्थात आयुष्यमान भारत योजना संदर्भात मार्गदर्शन व कार्यशाळा आयोजित करण्यात आली होती. या कार्यशाळेला जिल्ह्यातील आरोग्य यंत्रणेत गावपातळीपासून तर मुख्यालयापर्यंत काम करणाऱ्या सर्व कर्मचाऱ्यांचा सहभाग होता. या कर्मचाऱ्यांना मार्गदर्शन करताना त्यांनी आजारी माणसाच्या आयुष्यात देवदूत बनून जा. प्रधानमंत्री नरेंद्र मोदी यांनी ही योजना सुरू करताना परवडणारी आरोग्यसेवा आणि प्रतिबंधक आरोग्यसेवा या दोन्ही गोष्टीवर लक्ष करण्याचे आवाहन केले होते. हे लक्ष आपण पूर्ण करू या, असे त्यांनी सांगितले.
या कार्यक्रमाच्या व्यासपीठावर आमदार नानाभाऊ शामकुळे, जिल्हा परिषद अध्यक्ष देवराव भोंगळे, महापौर अंजलीताई घोटेकर, उपाध्यक्ष कृष्णा सहारे, उपमहापौर अनिल फुलझेले, जिल्हा परिषदेचे मुख्य कार्यकारी अधिकारी जितेंद्र पापळकर,सीएससीचे राज्य प्रमुख वैभव देशपांडे, डॉ.नायगावकर, वैद्यकीय महाविद्यालयाचे अधिष्ठाता डॉ.एस.एस.मोरे, जिल्हा शल्य चिकित्सक डॉ.निवृत्ती राठोड, सभापती अर्चनाताई जिवतोडे, सभापती संतोष तंगडपल्लीवार आदींची उपस्थिती होती. यावेळी ना.सुधीर मुनगंटीवार यांच्या मार्गदर्शनात तयार करण्यात आलेल्या माहिती पुस्तिकेचे विमोचनही करण्यात आले.
स्वातंत्र्यानंतर महत्त्वाची ही योजना सुरू झाली असून आर्थिक परिस्थिती नसताना आजार घरात येणे हा अतिशय कठीण प्रसंग असतो. रुग्णांची संख्या कमी व्हावी, सर्वांचे आरोग्य उत्तम असावे, रुग्ण सेवा सहज सुलभ मिळावी, सार्वजनिक आरोग्य शिबिरामध्ये एकही रुग्ण उपस्थित राहू नये, अशी आदर्श व्यवस्था निर्माण करण्यासाठी आपणा सर्वांना प्रयत्न करावे लागणार आहेत. जिल्ह्यामध्ये मोठ्या प्रमाणात सार्वजनिक आरोग्यासाठी निधी उपलब्ध करण्यात आला आहे. सर्व प्राथमिक आरोग्य केंद्रांना प्रत्येकी आठ कोटी रुपये विशेष बाब म्हणून मंजूर करण्यात आली आहे. लवकरच टाटा ट्रस्टच्या मदतीने कॅन्सर हॉस्पिटल सुरू होणार आहे. त्यामुळे जिल्ह्यातील रुग्णांना उत्तम सेवा द्यावी, सोबतच आलेल्या रुग्णाला अतिशय उत्तम वागणूक मिळावी. इलाज करणाऱ्यांच्या डोळ्यात देवदूत असावा, अशी अपेक्षाही त्यांनी व्यक्त केली.
आपल्या मार्गदर्शनाचे शेवटी ते म्हणाले की, आपल्याकडे आरोग्य यंत्रणेमध्ये मणुष्यबळासह काही कमतरता आहे. मात्र जे उपलब्ध संसाधने आहेत. जी काही यंत्रणा सध्या कार्यरत आहे. त्यातील उत्तमात उत्तम सामान्य माणसाला मिळावे यासाठी सगळ्या कर्मचाऱ्यांनी प्रयत्न करावेत, असे आवाहनही त्यांनी यावेळी केले.
जिल्ह्यांमध्ये 40 टक्‍क्‍यांपेक्षा अधिक दिव्यांग असणाऱ्या 1 हजार व्यक्तींना इलेक्ट्रिक बॅटरीवर चालणाऱ्या गाड्या देणार असल्याचे त्यांनी यावेळी पुनरुच्चार केला.
यावेळी आमदार नानाभाऊ शामकुळे, महापौर अंजलीताई घोटेकर यांनी देखील मार्गदर्शन केले. कार्यक्रमाचे प्रास्ताविक जिल्हा शल्य चिकित्सक डॉ.निवृत्ती राठोड यांनी केले. त्यांनी आपल्या प्रास्ताविकामध्ये या योजनेसाठी महाराष्ट्रामध्ये नाशिक आणि चंद्रपूर या दोन जिल्ह्याची निवड झाली असून प्रधानमंत्री जन आरोग्य योजनेचे गोल्डन कार्ड लाभार्थ्यांना काढण्याकरता कॉमन सर्विस सेंटर, आपले सरकार केंद्रात सुविधा उपलब्ध करण्यात आली असल्याचे सांगितले. आत्तापर्यंत एकूण एक लाख गोल्डन कार्डचे वाटप करण्यात आल्याचे त्यांनी यावेळी स्पष्ट केले.
या कार्यक्रमात काही व्यक्तींना गोल्डन कार्डचे देखील वाटप करण्यात आले. चंद्रपूर जिल्ह्यात आतापर्यंत एकूण एकशे एक्कावन रुग्णांना या योजनेचा लाभ मिळाला आहे. त्याचप्रमाणे राज्यात पूर्वीपासूनच सुरू असलेल्या महात्मा फुले जन आरोग्य योजनेअंतर्गत आतापर्यंत 18 हजार 458 व्यक्तींना या योजनेचा लाभ मिळाला असल्याचे सांगितले. चंद्रपूर जिल्ह्यात एकूण 2 लाख 74 हजार 838 दुर्बल घटकांना व गरीब कुटुंबांना या योजनेचा लाभ मिळणार असल्याचे त्यांनी सांगितले. कार्यक्रमाचे संचालन सोनाली गायकी यांनी केले. तर आभार प्रदर्शन जिल्हा आरोग्य अधिकारी डॉ.प्रकाश साठे यांनी केले.
No comments:
Post a Comment