‘ पायाभूत सुविधांच्या निर्मितीमुळे प्रशासनातील बदल नागरिकांना जाणवतो ’

‘सिध्दी 2017 संकल्प 2018’ अभियानात

जिल्हाधिकारी आशुतोष सलिल यांचे प्रतिपादन

       चंद्रपूर, दि.2 जानेवारी – राज्याचे वित्त, नियोजन व वनेमंत्री तथा चंद्रपूरचे पालकमंत्री ना.सुधीर मुनगंटीवार यांच्या मार्गदर्शनात गेल्यावर्षभरात चंद्रपूर जिल्हयाने प्रशासनातील पायाभूत सुविधांच्या निर्मितीमध्ये आघाडी घेतली आहे. सामान्य नागरिकाला प्रशासनाच्या योजना, उपक्रमाचा लाभ मिळत असून   दृष्टीक्षेपात येणारा बदल यावर्षभरात त्यांनी अनुभवला. हॅलो चांदा, संगणक प्रशिक्षण, ट्रकींग डॅशबोर्ड, कुक्कुटपालन क्लस्टर, 99 टक्क्यांवरील शौचालय निर्मिती, विविध आवास योजनेतून घरांची निर्मिती आणि शेतक-यांना महाकर्जमाफीतून मिळालेला दिलासा प्रमुख उपलब्धी ठरल्या आहेत. याशिवाय दारुबंदीची अंमलबजावणी आणि चंद्रपूर शहरातील नागरिकांना उत्तम नागरी सुविधा ही गेल्यावर्षीची सिध्दी असून येणा-या वर्षात महाराष्ट्रातील  सर्वोत्तम जिल्हयाचा संकल्प आम्ही करीत असल्याचे प्रतिपादन जिल्हाधिकारी आशुतोष सलिल यांनी आज पत्रकार परिषदेत  केला.

            महाराष्ट्र शासनाच्या माहिती व जनसंपर्क महासंचालनालयामार्फत आयोजित “ सिध्दी 2017, संकल्प 2018 ” या उपक्रमाअंतर्गत चंद्रपूर जिल्हाधिकारी कार्यालयात जिल्हा माहिती कार्यालयामार्फत आयोजित पत्रकार परिषदेत आशुतोष सलिल यांनी गेल्यावर्षभरातील उपलब्धी व 2018 मधील संकल्पाची माहिती दिली. यावेळी जिल्हा परिषदेचे मुख्य कार्यकारी अधिकारी जितेंद्र पापळकर, जिल्हा पोलीस अधिक्षक नियति ठाकर, महानगरपालिकेचे आयुक्त संजय काकडे उपस्थित होते. जिल्हा प्रशासनातील या वरिष्ठ अधिका-यांनी यावेळी गेल्यावर्षभरात राज्य शासनांच्या विविध योजनांच्या अंमलबजावणीची माहिती दिली. यावेळी पत्रकारांना जिल्हा प्रशासनाने तयार केलेल्या कॉपीटेबल बुक व जिल्हा माहिती कार्यालयाने तयार केलेल्या तीन वर्षातील उपलब्धीची घडीपुस्तिका संदर्भासाठी देण्यात आली.

यावेळी जिल्हाधिकारी आशुतोष सलिल यांनी प्रशासनाने राबविलेल्या अभिनव उपक्रमाचे आणि जिल्हयाने विविध योजनांमध्ये केलेल्या उल्लेखनिय कार्याचे सादरीकरण केले. चंद्रपूर जिल्हयामध्ये विविध योजनांची अंमलबजावणी करण्यासाठी टाटा ट्रस्टच्या मदतीने जिल्हयातील तीन तालुक्यामध्ये ट्रकींग डॅशबोर्ड ग्रामविकास योजनेला सुरुवात करण्यात आली आहे. या योजनेअंतर्गत गाव पातळीवरील प्रत्येक घटकाची नोंद घेतली जाते. त्यामुळे कोणती योजना कोणत्या गावामध्ये राबविणे आवश्यक आहे. त्या ठिकाणची नेमकी परिस्थिती काय आहे. याबाबतची संपूर्ण माहिती जिल्हा यंत्रणेकडे येत आहे. त्यामुळे दूर्गम भागातील सोयी सुविधा उपलब्ध करण्याबाबतचा रोडमॅप आखण्यामध्ये सुविधा होत असून जिल्हयाच्या नियोजनाच्या दृष्टीने हे महत्वाचे पाऊल असल्याचे त्यांनी सांगितले. हॅलो चांदा या यशस्वी योजनेच्या कार्य पध्दतीची माहिती त्यांनी यावेळी पत्रकारांना दिली. तर एक हजार आदिवासींच्या जिवनामध्ये परिवर्तनाला सुरुवात करणा-या पोंभूर्णा तालुक्यातील कुक्कुटपालन क्लस्टरची यशकथा त्यांनी पत्रकारांना सांगितली. यावेळी जिल्हा प्रशासनातील विविध बदल व अभिनव संकल्पनांचा झालेला लाभ त्यांनी पत्रकारांपुढे मांडला.

जिल्हा पोलीस अधीक्षक नियति ठाकर यांनी गेल्या वर्षभरात पोलीस प्रशासनाने केलेल्या कामगिरीचा आढावा सादर केला. चंद्रपूर जिल्हयामध्ये खुनासारख्या मोठया गुन्हयातील सर्व प्रकरणांचा तडा लावण्यात पोलीसांना यश आल्याने या घटकातील शंभर टक्के उपलब्धीचा आढावा त्यांनी मांडला. जिल्हयामध्ये दारुबंदी केल्यानंतर 56 कोटीवर मुद्देमाल जप्त करण्यात वर्षभरात यश आल्याचे त्यांनी सांगितले. 9 हजार 560 आरोपींना या प्रकरणात खटला दाखल केल्याचे त्यांनी सांगितले. तर जिल्हयामध्ये पोलीसांसाठी मोठया प्रमाणात पायाभूत सुविधा निर्माण होत असल्याची आकडेवारी त्यांनी दिली.

जिल्हा परिषदेचे मुख्य कार्यकारी अधिकारी जितेंद्र पापळकर यांनी जिल्हयामध्ये स्वच्छ भारत मिशनचे लक्ष 99 टक्क्यांवर पूर्ण झाले असून लवकरच जिल्हा स्वच्छतेमध्ये 100 टक्के यशस्वी झाल्याचे नजीकच्या काळात जाहिर करण्यात येईल, असे सुतोवाच केले. जिल्हयाची मॉडल हेल्थ डिस्ट्रीक्ट म्हणून भारतातून  निवड झाल्याचे त्यांनी सांगितले. जिल्हयातील 1540 शाळा डिजीटल झाल्या असून पालकमंत्री संगणक प्रशिक्षण अभियानामुळे संगणकीय क्षेत्रातील ज्ञानामध्ये ग्रामीण भागातील विद्यार्थी चमकत असल्याचे त्यांनी सांगितले. 2 शाळांना आंतरराष्ट्रीय स्तरावर प्रसिध्दी मिळाल्याची माहिती त्यांनी दिली.

महानगरपालिका आयुक्त संजय काकडे यांनी शहराच्या पाणी पुरवठा योजनेमध्ये क्रांतीकारी ठरलेली अमृत पाणी पुरवठा योजना व स्वच्छता ॲपची उपलब्धी यावेळी मांडली. जिल्हयामध्ये यावर्षी पाणी उपलब्धता कमी असतांना देखील शहर वाशियांना मुबलक पाणी मिळेल असे नियोजन केले असल्याचे त्यांनी सांगितले. उन्हाळा सुरु झाल्यानंतरच एक दिवस आड पाणी पुरवठा सुरु करण्याबाबत विचार केल्या जाईल, असे ते म्हणाले. यावेळी त्यांनी शहरातील नागरिकांच्या मुलभूत सुविधा पुरवितांना अनेक वर्ष प्रलंबित असलेल्या बाबुपेठ उड्डान पुलासारखा प्रश्न लवकरच निकाली लागणार असून शहरातील प्रमुख चौकांच्या सौंदर्यीकरणातून चंद्रपूरचे रुप पालटणार असल्याचे सांगितले.

2017  मधील जिल्हा प्रशासनातील महत्वाचे निर्णय

·        ‘हॅलो चांदा’, पालकमंत्री तक्रार निवारण यंत्रणेची यशस्वी सुरूवात

·        1800-266-4401 या क्रमांकावर तक्रारीचा ओघ वाढला, प्रशासनाची गती वाढली

·        टाटा ट्रस्टच्या मदतीने जिल्हयातील तीन तालुक्यातील ट्रकींग डॅशबोर्ड ग्राम विकास योजनेला सुरूवात

·        नेमक्या कोणत्या योजना कुठे, किती प्रमाणात आवश्यक आहे याची माहिती मिळायला सुरूवात

·        तीन तालुक्यातील प्रयोगाला लवकरच जिल्हाव्यापी करण्यासाठी सुरूवात करणार

·        जिल्हयात पालकमंत्री संगणक प्रशिक्षण अभियानाला सुरूवात

·        डिजीटल शाळांतील मुलांना/ शिक्षकांना टाटा ट्रस्टच्या मदतीने डिजीटल साक्षरता अभियान

·        38,600 विद्यार्थ्यांना लाभ मिळणार असून 942 शाळांमध्ये संगणक असणारी बस भेट देणार आहे.

·        जिल्हयात छत्रपती शिवाजी महाराज शेतकरी सन्मान योजनेमध्ये मोठया प्रमाणात शेतकऱ्यांना महाकर्जमाफी

·        जिल्हयामध्ये पोंभुर्णा तालुक्यात ‘कुक्कुटपालन क्लस्टर’ तयार करण्यात आले आहे.

·        1 हजार आदिवासी कुटुंबांना पुढील 3 वर्षांसाठी या अभियानामध्ये सहभागी करण्यात आले आहे.

·        आर्थिक सुबत्तेची हमी असून या माध्यमातून नियमित अर्थाजनाची घडी बसवली जाणार आहे.

·        पोक्सो (प्रोटेक्शन ऑफ चिल्ड्रेन फॉर्म सेक्सुअल ओफेन्स ॲक्ट) या मुलांवरील लैगिक अत्याचार प्रतिबंद आयदयाची अंमलबजावणी करणारा पहिला जिल्हा.

·        महिला आर्थिक विकास महामंडळामार्फत महिला बचत गटांच्या सहभागातून जिल्हयात सेतू केंद्राला सुरूवात; महिला सबळीकरणाला चालणा.

·        जिल्हयातील चंद्रपूर व बल्लारपूर रेल्वे स्थानकाचे पर्यटनाला चालणा देणारे सुशोभीकरण

·        जिल्हयामध्ये गरजू, होतकरू व अभ्यासू मुलांसाठी अभ्यासाठी व्यवस्था निर्माण करणाऱ्या अभ्यासिकांचे जाळे सुरू

·        प्रियदर्शनी इंदिरा गांधी प्रेक्षागृहाचे नूतनीकरण आणि या ठिकाणी प्राचीन नाणी संग्रालयाची सुरूवात.

जिल्हा परिषदेमार्फत वर्षभरातील उपलब्धी

·        प्रधानमंत्री आवास योजनेमध्ये 1282 घरांचे काम पूर्ण. 47.33 कोटी रूपयांतून 7851 घरे बांधण्याचे उद्दिष्टय

·        रमाई आवास योजनेतुन 349 घरे पूर्ण. 10.01 कोटी रूपयातून 1252 घरे बांधण्याचे उद्दिष्टय

·        शबरी आवास योजनेतून 191 घरे पूर्ण. 5 कोटी 63 लक्ष रूपयातून 788 घरांचे उद्दिष्टय.

·        स्वच्छ भारत मिशन अंतर्गत 99.94 टक्के वैयक्तिक शौचालय बांधकामाचे उद्दिष्टय पूर्ण.

·        99.64 टक्के गावे उघडयावरील शौच मुक्त झाली आहेत.

·        5 पैकी 14 तालुके उघडयावर शौच मुक्त करण्यात आली आहे.

·        जिल्हयात 53 कोटी 31 लक्ष रूपयाचा निधी सिंचन विहिरीसाठी मिळाला असून यातून 3 हजार 614 विहिरींचे निर्माण करण्यात येणार आहे.

·        जलयुक्त शिवार योजनेतून 136 कामे करण्यात येणार असून याव्दारे 1525 हेक्टर संक्षीत सिंचन क्षमता निर्मितीची हमी

·        मामा तलावासाठी 414 कामे मंजूर असून याव्दारे 7 हजार 780 हेक्टर सिंचन क्षमता वाढवण्याचे प्रयत्न आहेत.

·        राष्ट्रीय ग्रामीण पेयजल कार्यक्रम अंतर्गत मुख्यमंत्री ग्रामीण पेयजल योजनेतंर्गत 12 नळ योजनांची कामे प्रस्तावित करण्यात आली आहे.

·        जिल्हयात 35 ठिकाणी आरओचे शुध्द पाणी पोहचवण्याचे उदिष्ठय असून 9 ठिकाणी पूर्ण क्षमतेने योजना सुरू झाली आहे.

·        जिल्हयामध्ये 2017-18 साठी जिल्हा प्ररिषदमार्फत 70 कीमी रस्ता निर्मिती केली जाणार आहे.

·        मुख्यमंत्री ग्रामसडक योजनेतंर्गत 280 की.मी.काम मंजूर आहेत.

·        जिल्हयात 1540 शाळा डिजीटल करण्यात आल्या आहेत.

·        जिल्हयामध्ये सध्या 2684 अंगणवाडी कार्यरत आहेत.

·        राष्ट्रीय कुटूंब कल्याण कार्यक्रमातंर्गत सर्वत निर्देशांकात चंद्रपूर जिल्हयाला प्रथम पुरस्कार.

·        भारतातून मॉडेल हेल्थ डिस्ट्रीक्ट म्हणून चंद्रपूर जिल्हयाची निवड.

पोलीस प्रशासनाची वर्षभरातील उपलब्धी

·        जिल्हयातील दारुबंदीनंतर 56 कोटीवर मुद्देमाल जप्त

·        24 कोटी रुपयांची दारु जप्त

·        अवैध दारुची विक्री व वहन करणा-यांवर 9 हजार 50 खटले दाखल 

·        खुनासारख्या गंभीर गुन्हयांचे 100 टक्के तटा

·        नकली ऐटीएम तयार करणा-या आंतरराज्यीय गॅगचा पडदाफाश

·        सायबर क्राईम सेलकडून आर्थिक फसवणूकीच्या गुन्हयांचा तपास

·        पोलीसांसाठी घरे व नवीन पोलीस ठाण्यांच्या निर्मितीला गती

महानगरपालिका प्रशासनाची वर्षभरातील उपलब्धी

·        केंद्र शासन पुरस्कृत अमृत अभियानांतर्गत 231 कोटीच्या पाणी पुरवठा योजनेच्या कार्याला सुरुवात.

·        शहरात 8 ठिकाणी उंच पाण्याच्या टाक्या बांधण्याचे काम सुरु

·        अमृत योजनेअंतर्गत मलप्रक्रिया केंद्रातून प्रक्रिया केलेले पाणी महाजनकोला देण्याबाबत प्रकल्प करणार.

·        रामाळा तलावाच्या विकासाच्या महत्वाकांक्षी प्रकल्पाला सुरुवात

·        झरपट नदी विकास कार्यक्रमातंर्गत अंचलेश्वर गेटजवळील सौंदर्यीकरणाला सुरुवात.

·        शहरातील खुल्या जागांचा विकास करणार

·        बाबुपेठ स्टेडीयमचे बांधकाम, कोनेरी स्टेडीयमचे नुतनीकरण करणार.

·        ऊर्जाबचतीसाठी नवे पथदिवे उभारण्याचे काम सुरु

·        नागरी दलित वस्ती सुधार योजनेअंतर्गत मोठया प्रमाणात कामाला सुरुवात.

                                                            0000

चंद्रपूर आकाशवाणीचा रौप्य महोत्सवाला रंगली गाण्याची मैफल विविध उपक्रमातून वर्धापन दिन साजरा

चंद्रपूर दि. 7 डिसेंबर : चंद्रपूर जिल्हयामध्ये मनोरंजनासोबत माहितीची देवाणघेवाण करणाऱ्या चंद्रपूर आकाशवाणीला २५ वर्ष पूर्ण झाले आहेत . मंगळवारी ५ डिसेंबरला एका शानदार सोहळ्यात २५ वर्षाचे सिंहावलकोन करण्यात आले.

        चंद्रपूरमध्ये २५ वर्षापूर्वी दिनांक 6 डीसेंबर 1992 रोजी चंद्रपूर आकाशवाणीच्या प्रसारणाला सुरुवात झाली, आणि बघता बघता हा प्रवास २५ वर्षाचा झाला. वनाच्छादित जिल्हा असणाऱ्या चंदपूरमध्ये एक प्रभावी माध्यमं म्हणून चंद्रपूर आकाशवाणीची ओळख आहे . श्रोत्यांचा भरपूर प्रतिसाद आणि परस्पर संवादाचे माध्यमं म्हणून चंद्रपूर आकाशवाणीने आपले नावलौकिक मिळवले असून आकाशवाणीचे  मनोरंजनात्मक व विकासवार्तावरील अनेक कार्यक्रम लोकप्रिय ठरले आहे . यामध्ये आरोग्य दर्पण, गीत गुंजन, गीत सरिता, आपली आवड, हॅलो सखी, पत्रावर आधारित प्रतिसाद, ओळख कायदयाची, विविध अधिका-याच्या मुलाखती व मान्यवरांच्या आदी कार्यक्रमाचा समावेश आहे.

    चंद्रपूर जिल्हयात लोकप्रिय ठरलेल्या आकाशवाणीची मंगळवारी सायंकाळी संगीत मेजवानीत रौप्य महोत्सवपूर्व सायंकाळ साजरी करण्यात आली  हिंदी -मराठी गाण्यांची ही मैफल साजरी केली हिमांशू रंगारी यांच्या चमूने. यामध्ये  संगीता उमरे, मंगेश देऊळकर, शेखर शर्मा, अमोल दुधकर, निखील जिरकुंटवार, आशिष गायगोले, सुनील इंदू वामन ठाकरे आदी कलाकार सहभागी झाले होते .

     तत्पूर्वी ज्येष्ठ पत्रकार व आकाशवाणीचे जिल्हा वार्ताहर मधुसुदन व्यास , प्रभारी केंद्र प्रमुख मनोहर पवनीकर, जिल्हा माहिती अधिकारी प्रवीण टाके यांनी दिपप्रज्वलन करून कार्यक्रमाला सुरुवात केली . यावेळी आकाशवाणीच्या माध्यमातून एक जागरूक व प्रतिसाद देणारी पिढी आम्ही निर्माण करण्याचे दायित्व या माध्यमाने पार पाडावे. शासकीय योजना आणि धोरण तळागाळातील जनतेपर्यंत पोहचवण्यासाठी हे माध्यम प्रभावी ठरत असून आणखी प्रभावक्षेत्र वाढवण्यासाठी आकाशवाणीच्या माध्यमातून कार्य अपेक्षित असल्याची अपेक्षा व्यक्त करण्यात आली . प्रेक्षपणाची फ्रीकवेन्सी वाढवण्यात यावी, तसेच स्थानिक भाषा, स्थानिक समस्या आणि स्थानिक कलाकारांना अधिक वाव मिळावा , अशी मागणीही मान्यवरांनी केली .

      या कार्यक्रमाला आकाशवाणी ,दूरदर्शन  केंद्रातील कर्मचारी  ,नैमितिक उदघोषक, मान्यवर श्रोते उपस्थित होते.

0000000

रोजगार मेळाव्याला शेकडो तरुणांची उपस्थिती नोकरी देणारी पिढी कौशल्य विकासातून मिळेल :महापौर

चंद्रपूर दि. 7 डिसेंबर : सर्वांना नोकरी मिळणे शक्य नाही. त्यामुळे अगदी छोटया स्तरावर  का  होईना उद्योगधंदा उभारण्यासाठी सुरुवात करा. धडपड कधीच वाया जाणार नाही. कौशल्य विकास देणाऱ्या अभ्यासक्रमाची  निवड करा. असे आवाहन महापौर अंजली घोटेकर यांनी  आज  युवकांशी  संवाद  साधताना  केले.

दिनदयाळ अंत्योदय योजना –राष्ट्रीय नागरी उपजिवीका अभियान,चंद्रपूर,जिल्हा कौशल्य विकास व रोजगार उद्योजिकता केंद्र यांच्या संयुक्त विद्यमाने स्थानिक जैन भवन येथे या रोजगारे मेळाव्याचे आयोजन करण्यात आले होते. याठिकाणी  विविध  कंपन्याकडून उमेदवारांची मुलाखत व माहिती गोळा करण्यात आली. शेकडो  तरुणांनी संबंधित कंपन्यातील रिक्त जागांसाठी आपली उमेदवारी दाखवली. याठिकाणी विविध प्रशिक्षण संस्थाकडून स्टॉल लावण्यात आले होते. याशिवाय मुद्रा बॅक, विविध महामंडळ व लोकराज्यचा  स्टॉल लावण्यात आला होता.  

या कार्यक्रमाला महापौर अंजली घोटेकर, एमआयडीसी  इंड्रस्ट्रीज असोशिशनचे अध्यक्ष  मधुसूदन रुघटा  यांच्या  सह उपमहापौर अनिल फुलझेले, स्थायी  समिती  सभापती  राहुल पावडे, सभापती अनुराधा हजारे, अतिरिक्त आयुक्त भालचंद्र बेहरे, उपआयुक्त विजय देवळीकर, सहायक संचालक जिल्हा कौशल्य विकास सुनंदा बजाज, चेम्बर ऑफ कॉमर्सचे अध्यक्ष हर्षवर्धन सिघवी, गोपाल एकरे आदी उपस्थित होते.

कार्यक्रमाच्या अध्यक्षास्थानावरून बोलतांना एमआयडीसी  इंडस्ट्रीज असोशिएशन अध्यक्ष मधुसूदन रुंघटा  यांनी व्यावसायिक होण्यासाठी सचोटी व  मेहनतीसोबत  एक पाऊल पुढे टाकण्यासाठी  हिम्मतही आवश्यक  असल्याचे सांगीतले. श्रीमती सुनंदा बजाज यांनी यावेळी कौशल्य विकास विभागाबाबत सुरु असलेल्या विविध उपक्रमाची माहिती दिली. या रोजगार मेळाव्याला जिल्हा  भरातील तरुणांनी  उपास्थिती  लावली  होती.

0000000

उदयाच्या उज्ज्वल भविष्यासाठी वाचनाला वेळ दया -- कल्पना निळ

साहित्य, कला, संस्कृतीचा ग्रंथोत्सव थाटात संपन्न

चंद्रपूर, दि.29 नोव्हेंबर – चंद्रपूरमध्ये गेल्या दोन दिवसांपासून साहित्य, कला, संस्कृती आणि वाचन चळवळीला उजागर करणा-या ग्रंथोत्सवाचा आज समारोप झाला. विद्यार्थ्यांच्या उपस्थितीने व सहभागाने गाजलेल्या या संमेलनातून वाचन संस्कृतीला बळकटी आणण्याचा संदेश दिला गेला. ‘उदयाच्या उज्ज्वल भविष्यासाठी वाचन ही गुंतवणूक असल्याचा’, सल्ला उपजिल्हाधिकारी कल्पना निळ यांनी समारोपाच्या कार्यक्रमात गुणवंताना दिला.

राज्याच्या उच्च व तंत्र शिक्षण विभाग ग्रंथालय संचालनालय, महाराष्ट्र राज्य मुंबई, जिल्हा ग्रंथालय अधिकारी कार्यालय, चंद्रपूर, राष्ट्रीय माध्यमिक शिक्षा अभियान जिल्हा परिषद चंद्रपूर, चंद्रपूर माध्यमिक शिक्षण विभाग व जिल्हा ग्रंथोत्सव आयोजन समिती चंद्रपूर यांच्यावतीने या कार्यक्रमाचे आयोजन करण्यात आले होते. 28 व 29 नोव्हेंबर या काळात प्रियदर्शिनी इंदिरा गांधी सांस्कृतिक सभागृहात हा वाचन संस्कृतीला बळकटी देणारा समारंभ पारपडला. वाचनाचे विविध अंग म्हणून पुढे आलेल्या व्याख्यान, परिसंवाद, कवी संमेलन, कथाकथन, वादविवाद, विविध कलागुणांना सादर करण्याची संधी या ग्रंथोत्सवातून देण्यात आली. 28 तारखेला ग्रंथदिंडीने जनजागरण करणा-या या ग्रंथोत्सवाला उत्तोरत्तर चांगल्या कार्यक्रमांनी रंगत भरल्या गेली. ग्रंथोत्सवा दरम्यान झालेल्या परिसंवादामध्ये विविध शाळांच्या विद्यार्थ्यांनी सहभाग घेतला. यामध्ये सिटी कन्या विद्यालयाच्या मानसी विश्वकर्मा प्रथम तर ज्युबली हायस्कुलची जेबा सेल्‍वीम व्दितीय ठरली. या परिसंवादचे अध्यक्ष सुरेश चोपणे होते. 13 विद्यार्थ्यांनी यामध्ये सहभाग घेतला. कवी संमेलनामध्ये लोकमान्य टिळक कन्या विद्यालयाच्या मुलींनी आपले वर्चस्व नोंदविले. यामध्ये स्मृध्दी आगलावे व मेहवीश शेख या मुलींनी प्रथम व व्दितीय क्रमांक घेतला. या कवी संमेलनाचे अध्यक्ष प्रदीप देशमुख होते. 15 विद्यार्थी कवीनी आपल्या रचना सादर केल्या. व्याख्यानाच्या आजच्या पहिल्या सत्रात श्री.प्र.ग.तल्लवार यांच्या अध्यक्षतेत डॉ.पद्मरेखा धनकर, प्रा.अशोक माथनकर यांनी वाचन संस्कृती आणि ग्रंथालय या विषयावर मंथन केले. या सत्राचे सूत्र संचालन अनिता अडबले यांनी केले. कथाकथनामध्ये 13 विद्यार्थ्यांनी सहभाग घेतला. कथाकथनामध्ये भवानजीभाई चव्हाण हायस्कूलच्या प्रणय उपरे यांनी प्रथम तर प्रियदर्शनी लधवे व्दितीय क्रमांकाची मानकरी ठरली. शिक्षकांच्या कवी संमेलनाचे अध्यक्ष जेष्ठ साहित्यिक श्रीपाद जोशी होते. 13 शिक्षकांनी यावेळी कवीता सादर केल्या. या सत्राचे संचालन भागवतकर यांनी केले. शिक्षकांच्या कवी संमेलनात महात्मा कनिष्ठ महाविद्यालयाचे राहूल दहिवले यांची कवीता उल्लेखनिय ठरली. वादविवाद स्पर्धेमध्ये 18 विद्यार्थ्यांनी भाग घेतला. श्रध्दा खनके व पलक खसारे या विद्यार्थींनी सूत्र संचालन केले. वादविवाद स्पर्धेमध्ये लोकमान्य टिळक कनिष्ठ महाविद्यालयाची वैष्णवी चिंचोळकर, सिटी कन्या विद्यालयाची दिक्षा चौधरी प्रथम व व्दितीय ठरली.

ग्रंथदिंडी आयोजनाचा प्रभार सुदर्शन बारापात्रे, किरण पराते, किरण कात्रोजवार, संजय अंडूसकर यांनी घेतला. तर जिल्हा परिषद ज्युबली हायस्कूलच्या स्वर्गीता खंडाळे, कादंबी ठेमस्कर यांनी रांगोळी रेखाटून संमलेनाची रंगत वाढविली.

समारोपाच्या कार्यक्रमामध्ये उपजिल्हाधिकारी कल्पना निळ यांनी सन 2016-17 मध्ये जिल्हा ग्रंथालय अधिकारी कार्यालयात अभ्यास करुन वेगवेगळया शासकीय सेवेमध्ये रुजू झालेल्या 23 स्पर्धा परिक्षेतील यशस्वी विद्यार्थ्यांचा सत्कार केला. यावेळी बोलतांना त्यांनी वाचन ही गुंतवणूक असून विद्यार्थी दशेमध्ये केलेली मेहनत आयुष्य घडविण्यासाठी महत्वपूर्ण ठरते, असे सांगितले. विद्यार्थ्यांनी या ग्रंथोत्सवाच्या माध्यमातून वाचनासाठीच्या वेळेचे नियोजन करावे, असे आवाहनही त्यांनी केले. यावेळी व्यासपीठावर शिक्षणाधिकारी संजय डोर्लीकर, राज्य ग्रंथालय संघाचे अध्यक्ष अनिल बोरगमवार, जिल्हा ग्रंथपाल आर.जी.कोरे, जिल्हा माहिती अधिकारी प्रवीण टाके होते. या समारोपीय समारंभाचे सूत्र संचालन प्रशांत आर्वे यांनी केले. यावेळी ग्रंथोत्सवाला यशस्वी करण्यासाठी कार्य केलेल्या अनेक मान्यवरांचा सत्कार करण्यात आला.

000

भद्रावती तालुक्यातील रखडलेल्या पाणीपुरवठा योजनांचे अंदाजपत्रक खनिज विकास निधी अंतर्गत सादर करावे - ना. हंसराज अहीर

चंद्रपूर, दि.29 नोव्हेंबर- भद्रावती तालुक्यातील उपलब्ध असणा-या सर्व योजना पूर्णक्षमतेने कार्यरत करण्यात याव्या. रखडलेल्या योजनांचे सर्वेक्षण करुन गरज पडल्यास खनिज विकास निधीअंतर्गत यासंदर्भातील अंदाजपत्रक सादर करावे, असे निर्देश केंद्रीय गृहराज्यमंत्री हंसराज अहीर यांनी आज येथे दिले.

केंद्रीय गृहराज्यमंत्री हंसराज अहीर यांनी भद्रावती पंचायत समिती सभागृहात आयोजित जनसंपर्क दिवस कार्यक्रमात उपस्थित अधिका-यांना पाणी पुरवठा योजनांमधील अडचणी तातडीने दूर करण्यासाठी प्रयत्न करण्याचे सांगितले. तालुक्यातील चारही जिल्हा परिषद क्षेत्रातील बंद असलेल्या, पाणीस्त्रोत नसलेल्या, स्त्रोत उपलब्ध असूनही पर्याप्त पेयजल नसलेल्या सर्व योजनांचे तातडीने नियोजन करून पाणीपुरवठा योजनांचा नव्याने आराखडा तयार करण्याचे निर्देश यावेळी दिले. 

दि. 29 नोव्हेंबर रोजी आयोजित या जनसंपर्क दिन कार्यक्रमास जिल्हा परिषदेच्या कृषि व पशुसंवर्धन सभापती अर्चना जिवतोडे, पं.स. सभापती विद्या कांबळे, जि.प. सदस्य मारोती गायकवाड, जि.प.सदस्य यशवंत वाघ, जि.प. सदस्य प्रविण सूर, पं.स. सदस्य प्रविण ठेंगणे, नाजूका मंगाम, महेश टोंगे, नरेंद्र जिवतोडे, वरोराचे उपविभागीय अधिकारी भुसारी, तहसिलदार शितोडे, संवर्ग विकास अधिकारी तुपे, डॉ.एम.जे. खान, विजय राऊत, राहुल सराफ,  आदींची प्रामुख्याने उपस्थिती होती. 

या प्रसंगी केंद्रीय गृह राज्यमंत्री ना. अहीर यांनी या तालुक्यातील रखडलेल्या पाणीपुरवठा योजनांचे अंदाजपत्राक खनिज विकास निधी अंतर्गत सादर करावेत असे निर्देश उपस्थित अधिका-यांना दिले. पाणीपुरवठा योजना नागरिकांना सक्षमतेने उपलब्ध व्हाव्यात यासाठी भुजल सर्वेक्षण यंत्रणेमार्फत पाणी स्त्रोतांच्या उपलब्धतेसाठी सर्वेक्षण करवून तसे अहवाल तातडीने उपलब्ध होतील याचीही खबरदारी संबंधित अधिका-यांनी घ्यावी अशी सूचना केली. 

या तालुक्यातील नळ योजनांच्या सक्षमिकरणासाठी निधीची कमतरता भासू दिली जाणार नाही असे सांगत उपविभागीय अधिकारी, तहसिलदार व अन्य यंत्राणांनी तात्काळ आराखडा तयार करवून घेण्यासाठी स्वतः पुढाकार घेत आढावा घ्यावा असेही ना. अहीर यांनी या बैठकीमध्ये निर्देशित केले. 

पाण्याचे स्त्रोत उपलब्ध नसलेल्या पाणीपुरवठा योजनांची तसेच ही कामे पूर्ण झालेल्या योजनांची सविस्तर माहितीही संबंधितांनी त्वरित सादर करावी तसेच ज्या गावामध्ये पाण्याचे स्त्रोत उपलब्ध नाहीत त्या ठिकाणी लोकांना पाणीटंचाईची अडचण निवारणार्थ टॅंकरद्वारा त्वरेने पाणीपुरवठा होईल अशा प्रकारचे नियोजन करण्याच्या सूचना ना. अहीर यांनी यावेळी दिल्या. भद्रावती तालुक्यातील गाव पातळीवरून वाहणा-या नाल्यांद्वारे जलसंधारण व जलसंचय वाढीसाठी या सर्व नाल्यांची इत्यंभुत माहिती गोळा करून तसा अहवाल सादर करावा, या सर्व नाल्यांचे सीएसआर निधीतून खोलीकरण केले जाईल असेही ना. अहीर यांनी या कार्यक्रमात सांगितले. जनसंपर्क दिनास उपस्थित नागरिकांनी आपल्या अनेक समस्या ना. अहीर यांच्यापुढे कथन केल्या. लोकांनी विविधांगी समस्यांचे निवेदनेही सादर केले. उपस्थित अधिका-यांनी लोकांच्या तक्रारींचे तात्काळ निवारण होईल या पध्दतीने कार्यवाही करावी अशा सूचनाही ना. अहीर यांनी यावेळी दिल्या. या कार्यक्रमास भद्रावती तालुक्यातील अनेक गावातील नागरिक उपस्थित होते.

0000