नियोजन भवनातील पालकमंत्र्यांच्या कार्यालयाच्या कामकाजाला प्रारंभ

Ø ना.वडेट्टीवार यांच्या उपस्थितीत विभागप्रमुखांची परिचय बैठक

Ø 20 जानेवारीला पाहिली आढावा बैठक

चंद्रपूर दि. 17 जानेवारी : राज्याचे मदत व पुनर्वसन, इतर मागासवर्ग, सामाजिक व शैक्षणिक मागास प्रवर्ग, विमुक्त जाती, भटक्या जमाती आणी विशेष मागास प्रवर्ग कल्याण, खार जमिन विकास, तथा राज्याचे चंद्रपूर जिल्ह्याचे पालकमंत्री विजय वडेट्टीवार यांनी चंद्रपूर मुख्यालय येथील पालक मंत्री कार्यालयाचा आज शुभारंभ केला. विभाग प्रमुखांची बैठक घेऊन कामकाजाचा आढावा घेतला.

पालकमंत्री विजय वडेट्टीवार यांचे काल या ठिकाणी आगमन झाले. त्यानंतर त्यांनी पत्रकार परिषद घेऊन जिल्ह्यातील प्रलंबित प्रश्नांना मार्गी लावण्याचे स्पष्ट केले. आज आपल्या पालकमंत्री कार्यालयाचा नियोजन भवनात शुभारंभ केला.

यावेळी प्रभारी जिल्हाधिकारी राहुल कर्डिले, अतिरिक्त जिल्हा पोलीस अधीक्षक प्रशांत खैरे, जिल्हा प्रशासनातील विविध अधिकारी उपस्थित होते. याशिवाय विविध स्थानिक स्वराज्य संस्थांचे पदाधिकारी देखील यावेळी उपस्थित होते.

पालकमंत्री दालनाचे उद्घाटन केल्यानंतर त्यांनी याठिकाणी उपलब्ध असणाऱ्या पालकमंत्र्यांच्या विशेष कार्य अधिकाऱ्यांच्या दालनाची देखील पाहणी केली. या ठिकाणी जिल्हा स्तरीय कार्यालय सुरू होणार आहे.

त्यानंतर त्यांनी नियोजन भवनात सर्व विभाग प्रमुखांची बैठक घेतली. या बैठकीचे संचलन जिल्हा नियोजन अधिकारी ग.रु. वायाळ यांनी केले. जिल्हा प्रशासनात काम करणाऱ्या प्रत्येक विभाग प्रमुखाच्या कामकाजाची यावेळी पालकमंत्री वडेट्टीवार यांनी माहिती घेतली. यावेळी त्यांनी काही प्रमुख कामांबद्दल विचारपूस केली 20 जानेवारी रोजी विभाग निहाय आढावा घेणार आहेत तर 25 जानेवारी रोजी जिल्हा नियोजन विभागाची बैठक होणार आहे.

आजच्या बैठकीमध्ये महात्मा ज्योतिराव फुले शेतकरी कर्ज मुक्ती योजना 2019 चे सादरीकरण करण्यात आले. जिल्हा उपनिबंधक सहकारी संस्था ज्ञानेश्वर खाडे यांनी या वेळी सादरीकरण केले. या योजनेअंतर्गत जिल्ह्यात 90 टक्के आधार कार्ड शेतकऱ्यांनी बँक खात्याशी संलग्न केले असल्याची माहिती त्यांनी दिली. जिल्ह्यांमध्ये 60 हजार 800 पात्र खाते असून त्यापैकी 59 हजार खात्यांचे आधार कार्ड बँक खात्याची संलग्न करण्यात आले आहे. यासंदर्भात फेब्रुवारी महिन्यापर्यंत जिल्ह्यातील सर्व शेतकऱ्यांची नोंदणी व खात्याची तपासणी पूर्ण होईल. यासंदर्भातील अहवाल देखील या वेळी ज्ञानेश्वर खाडे यांनी सादर केला.

000000

चलो कोठारी... ! चांदा ते बांदा मार्गदर्शन मेळावा

चंद्रपूर, दि. 16 जानेवारी : चंद्रपूर जिल्ह्यातील विकासकामांना गती देणाऱ्या चांदा ते बांदा योजनेतून शेतकरी,सुशिक्षित बेकार, महिला,उद्योग-व्यवसायी,जोडधंदा करू इच्छिणाऱ्या युवक-युवतींसाठी ग्रामपंचायत कोठारी तालुका बल्लारपूर येथे 17 जानेवारी रोजी चांदा ते बांदा मार्गदर्शन मेळावा होणार आहे. या मेळाव्याला गावातील सर्व नागरिकांनी उपस्थित राहावे, असे आवाहन जिल्हा प्रशासनाने केले आहे.

जिल्हा प्रशासन अंतर्गत येणाऱ्या चांदा ते बांदा जिल्हा प्रकल्प व्यवस्थापन कक्ष, चंद्रपूर मार्फत या मेळाव्याचे आयोजन करण्यात आले आहे.या योजनेअंतर्गत उपलब्ध असणाऱ्या संधी व त्यातून गाव पातळीवर निर्माण होणारे रोजगार,व्यवसाय प्रकल्पाला मिळणारी चालना व नवीन प्रकल्पासाठी मिळू शकणारी मदत यावर  विविधांगी चर्चा या मेळाव्यामध्ये केली जाणार आहे.

या मेळाव्याचे उद्घाटन  तहसीलदार जे.बी.पोहनकर,मुख्याध्यापक जनता‌ विद्यालय डॉ.विजय मसराम यांच्या उपस्थितीत होणार आहे. प्रमुख पाहुणे म्हणून ग्राम विकास अधिकारी एल. वाय. पोवरे, गट विकास अधिकारी किरणकुमार धनवडे, सरपंच ग्रामपंचायत कोठारी मोरेश्वर लोहे, उपसरपंच ग्रामपंचायत कोठारी  सायत्राताई मोहुर्ले, पराग ट्रेडर्स कृषी केंद्र, कोठारी स्नेहल टिंबडिया हे असणार आहे.

या मेळाव्यामध्ये तालुका कृषी अधिकारी शुभांगी मोहितकर, पशुधन विकास अधिकारी डॉ.दामोदर गुरनुले, कृषी पर्यवेक्षक वरभे, पर्यवेक्षिका बांबू संशोधन व प्रशिक्षण केंद्र चंद्रपूर योगिता साठवणे, तालुका समन्वयक टाटा ट्रस्ट यश दुधे, कृषी तज्ञ खेमराज गेडाम तसेच,प्रगतिशील व्यवसायिक व प्रगतिशील शेतकरी यांच्याकडून मार्गदर्शन लाभणार आहे.

सकाळी 11 वाजता डॉ.आंबेडकर - फुले सभागृह  ग्रामपंचायत कोठारी तालुका बल्लारपूर येथे होणाऱ्या मेळाव्याला मोठ्या संख्येने व्यवसाय उत्सुक व शेतीमध्ये प्रयोग करण्याची आवड असणाऱ्या सर्व शेतकऱ्यांनी उपस्थित राहावे, असे आवाहन आयोजकांतर्फे करण्यात आले आहे.

000000

सूक्ष्म सिंचनातून चंद्रपूर जिल्ह्याच्या अर्थकारणाला कलाटणी मिळू शकते : संजय वैद्य

चांदा ते बांदा योजनेअंतर्गत मुल येथे मेळावा

चंद्रपूर, दि. 16 जानेवारी : सूक्ष्म, सिंचनातून चंद्रपूर जिल्ह्याचा कायापालट शक्य आहे. यासाठी शेतकऱ्यांनी पाणी वापराचे तंत्र मंत्र समजून घेणे गरजेचे असून एका वर्षात चार ते पाच पिकांसाठी सिद्ध होणे आवश्यक असल्याचे प्रतिपादन सुप्रसिद्ध जलतज्ञ, संजय वैद्य यांनी केले.मुल येथे आयोजित चांदा ते बांदा मार्गदर्शन मेळाव्यामध्ये ते बोलत होते.

जिल्हा प्रशासनाच्या मार्फत चांदा ते बांदा जिल्हा प्रकल्प व्यवस्थापन कक्ष व जिल्हा माहिती कार्यालय चंद्रपूर यांच्या माध्यमातून चांदा ते बांदा मार्गदर्शन मेळाव्याचे आयोजन करण्यात येत आहे. जिल्ह्यातील या योजनेच्या मेळाव्यातील पहिला मेळावा मुल येथील तहसील कार्यालयामध्ये आज घेण्यात आला होता.

या मेळाव्याला उद्घाटक म्हणून तहसीलदार डी.जी.जाधव उपस्थित होते.या कार्यक्रमाला मार्गदर्शक जल अभ्यासक संजय वैद्य, पाटबंधारे विभागाचे उपअभियंता सोनेकर, पशुधन विकास अधिकारी संतोष गवारे,सहाय्यक मत्स्यव्यवसाय विकास अधिकारी ज.ज बळकटे, टाटा ट्रस्ट्रचे  कृषी तज्ञ तथा तालुका समन्वयक चेतन डाहे, लोकसंचालित साधन केंद्राच्या व्यवस्थापिका देवेंद्रा मेश्राम उपस्थित होते.

चंद्रपूर व सिंधुदुर्ग या दोन जिल्ह्याच्या विकासासाठी तयार करण्यात आलेल्या चांदा ते बांदा या योजनेअंतर्गत शेतकरी सुशिक्षित बेरोजगार उद्योग व्यवसाय अभिरुची ठेवणाऱ्या तरुणांचा व महिलांचा मेळावा चांदा ते बांदा योजनेअंतर्गत मूल येथे तहसिल कार्यालयात 16 जानेवारीला पार पडला.

यावेळी बोलताना जलतज्ञ संजय वैद्य यांनी पाण्याची बचत व त्यातून समृद्धी याबाबतचे मार्गदर्शन केले ते म्हणाले,पाण्याची बचत करण्यासाठी आधुनिक सिंचन पद्धतीचा वापर करणे गरजेचे झाले असून शेतीला सूक्ष्म सिंचन, ठिबक सिंचन व तुषार सिंचनाचा वापर करून कमी पाण्यात अधिकाधिक उत्पन्न   शेतकऱ्यांनी घ्यावे. 

शेतामध्ये पाण्याचा उपयोग करताना योग्य पद्धतीने पाण्याचे नियोजन करणे गरजेचे आहे. शेतीला आवश्यक असेल तेवढेच पाणी देणे गरजेचे असताना शेतकरी अव्याहतपणे पाणी देत असल्यामुळे उत्पादनात आवश्यक तेवढी वाढ होत नाही. त्यामुळेच, शेतीत आधुनिक सिंचन पद्धतीचा वापर केल्याने  शेतीच्या उत्पादनात वाढ होते. तसेच खर्चाची बचत होते. शेतीला आवश्यक तेवढे पाणी मिळते.  

पाटबंधारे विभागाचे उपअभियंता सोनेकर यांनी मार्गदर्शन करताना सांगितले की, चांदा ते बांदा योजनेतून चिचाळा लगतच्या सहा गावातील शेतीला पाइपलाइनद्वारे पाणीपुरवठा करणारी योजना कार्यान्वित झाली आहे. या योजनेसाठी 27 कोटी रुपये मंजूर आहे. पाइपलाइनद्वारे शेतीला सिंचन व्यवस्था करणारी ही विदर्भातील एकमेव आणि पहिली योजना असून या योजनेमुळे पंधरा हजार हेक्‍टरवरील शेती क्षेत्र सिंचनाखाली येणार असल्याची माहिती सोनेकर यांनी यावेळी उपस्थितांना दिली.

शेतीला पूरक व्यवसाय म्हणून मत्स्य व्यवसाय कसा आणि कोणत्या पद्धतींनी करावा याबाबतची सविस्तर माहिती सहाय्यक मत्स्यव्यवसाय विकास अधिकारी ज. ज.बळकटे यांनी आपल्या मार्गदर्शनातून दिली. पशुधन विकास अधिकारी डॉ. संतोष गवारे यांनी शेतकऱ्यांनी जोडधंदा म्हणून पशुपालनाचा व्यवसाय कसा करावा तसेच पशुपालन आतून सातत्यपूर्ण उत्पन्न कसे मिळेल याचेही सविस्तर मार्गदर्शन त्यांनी केले. तसेच टाटा ट्रस्टचे कृषी तज्ञ तालुका समन्वयक उपस्थितांना मार्गदर्शन करताना म्हणाले की चांदा ते बांदा योजनेअंतर्गत शेतकऱ्यांच्या दृष्टीने अनेक महत्त्वपूर्ण योजना राबवल्या जात आहे. यामध्ये सूक्ष्म सिंचन मल्चिंग व आच्छादन, पॉलिहाऊस नर्सरी, कृषी यांत्रिकीकरण, उस्मानाबादी बोकड वाटप, समूह सिंचन विहीर, विहिरीची दुरुस्ती यासारख्या महत्त्वपूर्ण योजना राबविण्यात येत आहे. या योजनेच्या माध्यमातून शेतकऱ्यांच्या उत्पादनात वाढ झाली आहे असे त्यांनी सांगितले.

कार्यक्रमाच्या यशस्वीतेसाठी चांदा-बांदा विभागाचे युवा व्यावसायिक अमोल घुगुल, जिल्हा माहिती कार्यालयाचे विजय जाधव यांनी सहकार्य केले .या कार्यक्रमाचे सूत्रसंचालन अक्षय उराडे तर आभार सुधीर आत्राम यांनी केले.

00000

सर्व शेतकऱ्यांनी आपआपल्या बँकेमध्ये आधार कार्डची माहिती जमा करावी : राहुल कर्डिले

जिल्ह्यात महात्मा जोतिराव फुले शेतकरी कर्जमुक्ती योजनेचा लाभ घेण्याचे आवाहन

चंद्रपूर दि. 13 जानेवारी : राज्य शासनाने महात्मा जोतिराव फुले शेतकरी कर्जमुक्ती योजनेचा लाभ सर्व शेतकऱ्यांना व्हावा यासाठी व्यापक मोहीम राबविली आहे. मात्र अनेक शेतकऱ्यांना आपले बँक खाते आधार कार्ड सोबत जोडले गेले अथवा नाही याबाबत शाश्वती नाही. त्याची चौकशी करावी व ज्यांचे बँक खाते जोडले गेले नसेल त्यांनी आधार कार्डची एक झेरॉक्स प्रत आपआपल्या बँकेला द्यावी, असे आवाहन जिल्हाधिकारी राहुल कर्डिले यांनी केले आहे.

जिल्ह्यातील एकही शेतकरी या योजनेपासून वंचित राहू नये, यासाठी शासन प्रयत्न करत आहे. या योजनेसाठी कोणत्याही अटी व शर्ती नाहीत. मात्र आधार कार्ड बँक खात्याशी जोडलेले असणे अनिवार्य आहे. त्यामुळे आपले खाते आधार कार्डची जोडल्या गेले,अथवा नाही याची खात्री करणे अतिशय आवश्यक असून यासंदर्भात नजीकच्या बँकेला तातडीने भेट देऊन खातरजमा करावी ,अशी विनंती त्यांनी शेतकरी बांधवांना केली आहे.

सहकारी बँकेमध्ये ज्यांचे खाते आहे, त्यांनी सोसायटीचे सचिव किंवा संबंधित बँक शाखा यांच्याकडे आधार कार्डची झेरॉक्स प्रत सादर करावी. तर राष्ट्रीयकृत बँकेमध्ये असणाऱ्या खात्यांसाठी संबंधित बँकेच्या व्यवस्थापकाला आधार कार्डची झेरॉक्स प्रत सादर करावी, असे आवाहन करण्यात आले आहे.

जिल्हाधिकारी डॉ. कुणाल खेमनार यांच्या अनुपस्थितीत जिल्हा परिषदेचे मुख्य कार्यकारी अधिकारी राहुल कर्डिले यांच्याकडे सध्या जिल्हाधिकाऱ्यांचा पदभार आहे. आज त्यांनी या योजनेसंदर्भातील प्रमुख अधिकाऱ्यांची बैठक आपल्या दालनात घेतली. जिल्ह्यातील बहुतांश शेतकऱ्यांनी आपल्या नावाची नोंद केलेली आहे. मात्र तरीही अनेक शेतकरी यासंदर्भात अनभिज्ञ असून त्यांनी तातडीने आपल्या आधार कार्डची झेरॉक्स प्रत सादर करावी, असे स्पष्ट केले आहे.

मुख्यमंत्री उद्धव ठाकरे यांनी नुकतीच महात्मा जोतिराव फुले शेतकरी कर्ज मुक्ती योजना 2019 ची घोषणा केली आहे. राज्यातील शेतकऱ्यांनी मार्च 2015 नंतर उचल केलेल्या पीक कर्जाची, 30 सप्टेंबर 2019 पर्यंत मुद्दल व्याजासह असलेली थकबाकी शासनाच्यावतीने भरून त्यांना कर्ज मुक्त करण्यात येणार आहे. याच कालावधीमध्ये उचल केलेले पीक पुनर्गठित कर्जाची मुद्दल व व्याज असलेले थकबाकीची रक्कम सुद्धा या योजनेसाठी पात्र असेल. या योजनेअंतर्गत प्रत्येक शेतकऱ्याला 2 लाख महत्तम मर्यादेपर्यंत लाभ देण्याचा निर्णय घेण्यात आला आहे. मार्च 2020 पासून योजनेचा लाभ सुलभ व पारदर्शक पद्धतीने थेट शेतकऱ्यांच्या कर्ज खात्यात जमा करण्यात येईल.

त्यापूर्वी सदर योजना यशस्वी रीतीने पार पाडण्यासाठी,सर्व बँका जिल्हास्तरीय व राज्यस्तरीय अधिकारी कर्मचारी यांना निर्देश देण्यात आले आहे. 2 लाखापर्यंत कर्ज घेतलेल्या शेतकऱ्यांना चिंतामुक्त करण्यासाठी हा निर्णय घेण्यात आला. गावातील प्रत्येक शेतकऱ्यांनी याचा लाभ घ्यावा, असे आवाहनही यावेळी अधिकाऱ्यांनी केले आहे.

0000000

चंद्रपूर जिल्हा महाराष्ट्रातील अपघात विरहित जिल्हा झाला पाहिजे : खा. सुरेश धानोरकर

31 व्या रस्ता सुरक्षा सप्ताहाला थाटात प्रारंभ

चंद्रपूर दि. 13 जानेवारी : सर्वोच्च न्यायालयाने दिलेल्या निर्देशानुसार रस्ता सुरक्षा संदर्भातील निर्देशांचे काटेकोरपणे पालन करण्यात यावे, यासाठी लागणारा आवश्यक निधी उपलब्ध करून देण्यासाठी व्यवस्था केली जाईल. मात्र चंद्रपूर जिल्हा महाराष्ट्रातील अपघात विरहित जिल्हा झाला पाहिजे, असे आवाहन खासदार सुरेश धानोरकर यांनी आज येथे केले.

चंद्रपूर जिल्हाधिकारी कार्यालयातील नियोजन भवनात आयोजित 31 व्या रस्ता सुरक्षा सप्ताह निमित्त आयोजित कार्यक्रमात ते बोलत होते. यावेळी त्यांनी जिल्ह्यातील प्रमुख रस्ते आणि वाहतुकीच्या रस्त्यांवर होणाऱ्या अपघातात मोठ्या प्रमाणात कपात होणे आवश्यक असून केवळ नियमांचे पालन नसल्यामुळे किंवा आवश्यक दुरुस्त्या अभावी कोणाचा जीव जाता कामा नये असे स्पष्ट केले.      

सर्वोच्च न्यायालयाच्या निर्देशाप्रमाणे जिल्ह्यामध्ये अपघातांचे विश्लेषण करून अपघात प्रमाण स्थळांचा शोध घेणे महत्वाचे असून सध्या अपघाताचे प्रमाण जिल्ह्यात कमी झाल्याचे आकडेवारी सांगितली. यामध्ये शून्य टक्क्‍यांपर्यंत कमी होणे गरजेचे असल्याचे त्यांनी सांगितले.

जिल्हा परिषदेचे मुख्य कार्यकारी अधिकारी तथा जिल्हाधिकारी पदाची धुरा सांभाळणारे राहुल कर्डिले यांनी यावेळी संबोधित केले त्यांनी रस्ता सुरक्षा सप्ताह मध्ये मोठ्या प्रमाणात नागरिकांनी स्वतः घ्यायची काळजी याबाबत सुद्धा जनजागरण झाले पाहिजे, असे आवाहन केले. यावेळी उपस्थित शाळेतील मुलांशी देखील त्यांनी संवाद साधतांना रस्त्यांच्या संदर्भातील नियमांना समजून घेण्याची आवाहन केले.

जिल्हा पोलीस अधीक्षक डॉ. महेश्वर रेड्डी यांनी कायद्याचे काटेकोर पालन रस्त्यावरील शिस्त लावण्यासाठी करण्याबाबत ट्रॅफिक पोलिसांना निर्देश दिले. सर्वोच्च न्यायालयाच्या निर्देशानुसार जिल्ह्यामध्ये त्यासंदर्भात काम करण्यात येईल अशी ग्वाही त्यांनी दिली .

कार्यक्रमाचे प्रास्ताविक उपप्रादेशिक परिवहन अधिकारी विश्वंभर शिंदे यांनी केले. यावेळी त्यांनी आपल्या दरवर्षी जवळपास दीड लाख लोक रस्ता अपघातात मृत्युमुखी पडतात. पाच लाख अपघात दरवर्षी होतात. जवळजवळ पाच हजार लोक अपघातात अपंग होतात. दुर्दैवाने अपघातात मृत्यू होणाऱ्यांचा वयोगट हे 18 ते 35 या दरम्यानचा आहे. त्यामुळे घरातील कर्ता पुरुष अपघातात दगावल्यास त्या घरावर आयुष्यभर पश्चातापाची वेळ येते. त्यामुळे याबाबत जनजागृतीची आवश्यकता व्यक्त केली.

यावेळी सहाय्यक उपप्रादेशिक अधिकारी एस.पी फासे यांनी या कार्यक्रमाचे आभार प्रदर्शन करत असताना रहदारीचे नियम न पाळल्याने अपघात घडत असल्याचे सांगितले. यावेळी त्यांनी वाहने अतिवेगाने चालविणे, दोन वाहनात अंतर न ठेवणे, चुकीच्या पद्धतीने ओव्हरटेक करणे. आजारी असताना वाहने चालविणे. दुचाकीस्वारांनी हेल्मेट न वापरणे. आदी चुका टाळण्याचे आवाहन केले. कार्यक्रमाचे संचलन मोंटू सिंग यांनी केले.

00000