2 डिसेंबर रोजी लोकशाही दिनाचे आयोजन

 

2 डिसेंबर रोजी लोकशाही दिनाचे आयोजन

चंद्रपूर दि. 29 : सर्वसामान्य जनतेच्या तक्रारी आणि अडचणी यांची न्याय व तत्परतेने शासकीय यंत्रणेकडून सोडवणूक करण्यासाठी एक प्रभावी उपाययोजना म्हणून जिल्हाधिकारी यांच्या अध्यक्षतेखाली  लोकशाही  दिनाचे  आयोजन  दर महिन्याच्या पहिल्या सोमवारी करण्यात येते. या लोकशाही  दिनानिमित्त  नागरीक व शेतकरी  जिल्हाधिकारी यांच्याकडे तक्रार अर्ज दाखल करतात.

सोमवार, दि. 2 डिसेंबर 2024 रोजी दुपारी 1 वाजता जिल्हाधिकारी कार्यालय, चंद्रपूर येथे लोकशाही   दिनाचे  आयोजन  करण्यात आले आहे.  जिल्हास्तरीय  लोकशाही  दिनात तक्रार सादर करतांना विहित नमुन्यातील तक्रार अर्जासोबत तालुका लोकशाही दिनातील टोकन क्रमांकाची प्रत तसेच अर्ज 15 दिवसाआधी 2 प्रतीत सादर करावा. तक्रार व निवेदन वैयक्तिक स्वरुपाची असावी. तद्नंतरच तक्रार अर्ज स्वीकारण्यात येईल, असे जिल्हा प्रशासनाने कळविले आहे.

००००००

परीक्षा केंद्र परिसरात कलम 163 अंतर्गत निर्बंध लागू

 

परीक्षा केंद्र परिसरात कलम 163 अंतर्गत निर्बंध लागू

चंद्रपूर, दि.  29 :   महाराष्ट्र राजपत्रित नागरी सेवा संयुक्त पुर्व परिक्षा-2024 जिल्ह्यातील विविध केंद्रावर 1 डिसेंबर 2024 रोजी आयोजित करण्यात आली आहे. परीक्षा सुरळीत पार पाडण्याच्या दृष्टीने परीक्षा केंद्राच्या 100 मीटर परिसरात सकाळी 8  ते सायं 6 वाजेपर्यंत भारतीय नागरीक सुरक्षा संहिता 2023 चे कलम 163 अन्वये निर्बंध लागू करण्यात येत आहे. सदर आदेश जिल्हादंडाधिकारी विनय गौडा जी.सी. यांच्या सही व शिक्क्यानिशी निर्गमीत करण्यात आले.

1 डिसेंबर 2024 रोजी परीक्षा केंद्राच्या ठिकाणी 100 मीटर परिसरांतर्गत सकाळी 8 ते सायं 6 वाजेपर्यंत परीक्षार्थी व्यतिरीक्त 2 किंवा त्यापेक्षा अधिक व्यक्ती एकत्रित जमा होणार नाहीत. तसेच सदर वेळेत व परिसरात नियमित व रोजचे वाहतुकीव्यतिरिक्त  इतर कोणत्याही हालचालींना  प्रतिबंध राहील. परीक्षा केंद्राच्या 100 मीटर क्षेत्रांतर्गत परीक्षेदरम्यान झेरॉक्स, फॅक्स, एस.टी.डी.बुथ, पेजर, मोबाईल फोन, ईमेल, इंटरनेट सवलती किंवा इतर कोणत्याही कॉम्युनिकेशन सवलतींना प्रतिबंध राहील.

या परिक्षा केंद्राना लागू राहतील आदेश : 1) विद्याविहार हायस्कूल तथा कनिष्ठ महाविद्यालय, तुकूम, चंद्रपूर 2) सरदार पटेल महाविद्यालय, गंजवॉर्ड,चंद्रपूर, 3) बी.जे.एम. कार्मेल अकादमी, तुकूम चंद्रपूर, 4) रफी अहमद किदवाई मेमो हायस्कूल, घुटकाळा वॉर्ड, चंद्रपूर, 5) सेंट मायकल इंग्लिश स्कूल, नगीनाबाग, चंद्रपूर, 6) बजाज पॉलिटेक्निक, बालाजी वॉर्ड, चंद्रपूर, 7) माऊंट कार्मेल कॉन्व्हेंट हायस्कूल, चंद्रपूर, 8) मातोश्री विद्यालय, ताडोबा रोड, चंद्रपूर, 9) चांदा पब्लिक स्कूल, रामनगर चंद्रपूर आणि 10) भवानजीभाई चव्हाण हायस्कूल तथा कनिष्ठ महाविद्यालय, मुल रोड, चंद्रपूर.

सदर आदेश परीक्षा दिनी अंमलात राहतील. आदेशाचे उल्लंघन केल्यास संबंधित व्यक्तिविरुध्द प्रचलित कायद्यातील तरतुदीनुसार कारवाई करण्यात येईल, असे जिल्हादंडाधिका-यांच्या आदेशात नमूद आहे.

०००००

रब्बी हंगाम 2024 अंतर्गत अन्नधान्य, कडधान्य पिकांच्या पीकस्पर्धा

 

रब्बी हंगाम 2024 अंतर्गत अन्नधान्य, कडधान्य पिकांच्या पीकस्पर्धा

चंद्रपूर, दि. : पिकाची उत्पादकता वाढविण्यासाठी शेतकऱ्यांकडून विविध प्रयोग करण्यात येतात व उत्पादकतेत वाढ करण्यात येते. अशा प्रयोगशील शेतकऱ्यांना, मिळालेल्या उत्पादकतेबाबत प्रोत्साहन देऊन गौरव केल्यास त्यांची इच्छाशक्ती, मनोबल यामध्ये वाढ होऊन आणखी उमेदीने नवनवीन अद्यावत तंत्रज्ञानाचा वापर करण्यास प्रोत्साहन मिळते. तसेच त्यांचे मार्गदर्शन परिसरातील इतर शेतकऱ्यांना होऊन राज्याच्या एकूण उत्पादनात मोलाची भर पडेल, हा उद्देश ठेवून राज्यांतर्गत पीकस्पर्धा योजना राबविण्यात येत आहे.

            रब्बी हंगाम 2024 मध्येही तालुका, जिल्हा व राज्य पातळीवर पीक स्पर्धा राबविण्यात येत आहेत. त्यानुसार कृषी विभागामार्फत रब्बी हंगाम सन 2024 मध्ये सर्वसाधारण व आदिवासी गटासाठी ज्वारी, गहु, हरभरा, करडई व जवस या पाच पिकासाठी पिकस्पर्धेंचे आयोजन करण्यात येत आहे.

1) पीकस्पर्धेतील पीके :  रब्बी पीके - ज्वारी, गहू, हरभरा, करडई व जवस

2) पात्रता निकष :  स्पर्धेत भाग घेण्यासाठी शेतकऱ्याकडे स्वत:च्या नावेजमीन असणे व ती जमीन तो स्वत: कसत असणे आवश्यक आहे. स्पर्धेत भाग घेणाऱ्या शेतकऱ्याला एकाच  वेळी एकापेक्षा जास्त पिकासाठी स्पर्धेत भाग घेता येईल. पिकस्पर्धेमध्ये सहभागी लाभार्थी स्वत:च्या शेतावर त्या पिकाखाली किमान 40 आर क्षेत्रावर सलग लागवड असणे आवश्यक आहे.

3) अर्ज करण्यासाठी आवश्यक कागदपत्रे :  विहित नमुन्यातील अर्ज (प्रपत्र-अ ) ठरवून दिलेले प्रवेश शुल्क भरल्याचे चलन 7/12, 8- अ चा उतारा, जात प्रमाणपत्र (आदिवासी असल्यास ) पिकस्पर्धेसाठी शेतकऱ्याने संबंधित 7/12  वरील घोषित केलेल्या क्षेत्राचा चिन्हांकित केलेला नकाशा

4) अर्ज दाखल करण्याची अंतिम तारीख : रब्बी हंगामामध्ये पीकस्पर्धेचा अर्ज दाखल करण्याची तारीख 31 डिसेंबर 2024 आहे.

5) स्पर्धेसाठी प्रवेश शुल्क  : पीकनिहाय सर्वसाधारण गटासाठी 300 रुपये राहील व  आदिवासी गटासाठी 150 रुपये राहील.

बक्षिसाचे स्वरुप : तालुका पातळीवर पहिले बक्षीस 5 हजार, दुसरे 3 हजार आणि तिसरे बक्षीस 2 हजार रुपये. जिल्हा पातळीवर पहिले बक्षीस 10 हजार, दुसरे 7 हजार आणि तिसरे 5 हजार रुपये तर राज्य पातळीवर पहिले बक्षीस 50 हजार, दूसरे 40 हजार आणि तिसरे बक्षीस 30 हजार रुपये आाहे.

येथे करा संपर्क : पीक स्पर्धेबाबत अधिक माहितीसाठी संबंधित तालुका कृषी अधिकारी कार्यालयाशी संपर्क साधावा. तसेच महाराष्ट्र शासन कृषी विभागाचे संकेतस्थळ www.krishi.maharashtra.gov.in ला भेट द्यावी.

उपरोक्त नमुद पिकांच्या क्षेत्रात आणि उत्पादनात वाढ व्हावी याकरीता जास्तीत जास्त शेतकऱ्यांनी पीक स्पर्धेत सहभागी व्हावे, असे आवाहन कृषी विभागामार्फत करण्यात येत आहे.

००००००

विद्यार्थ्यांच्या सहकार्यातून 100 टक्के बालविवाह मुक्त जिल्हा करू – सीईओ विवेक जॉन्सन

 

विद्यार्थ्यांच्या सहकार्यातून 100 टक्के बालविवाह मुक्त जिल्हा करू – सीईओ विवेक जॉन्सन

Ø बालविवाह मुक्त भारत अभियानचा शुभारंभ

चंद्रपूर, दि. 27 : आपल्या देशात बालविवाह हा कायद्याने गुन्हा आहे. जिल्ह्यातील बालविवाह प्रतिबंधासाठी जिल्हाधिका-यांच्या अध्यक्षतेखाली जिल्हास्तरीय समिती कार्यरत आहे. भविष्यात आपल्या जिल्ह्यात एकही बालविवाह होणार नाही, असा संकल्प करणे गरजेचे आहे. यात नवीन पिढीचे आणि विद्यार्थ्यांचे योगदान आवश्यक आहे. नवीन पिढीच ही परिस्थिती बदलवू शकते. त्यामुळे विद्यार्थ्यांच्या सहकार्यातून आपला जिल्हा 100 टक्के बालविवाह मुक्त करू, असा विश्वास मुख्य कार्यकारी अधिकारी विवेक जॉन्सन यांनी व्यक्त केला.

भारतीय ग्रामीण शिक्षण प्रसारक मंडळ चंद्रपूरद्वारा संचालित भवानजीभाई चव्हाण हायस्कूल तथा कनिष्ठ महाविद्यालय येथे बालविवाह मुक्त भारत अभियानाचा शुभारंभ करतांना ते बोलत होते. यावेळी प्रमुख अतिथी म्हणून जिल्हा विधी सेवा प्राधिकरणचे सचिव सुमित जोशी, बालकल्याण समितीच्या अध्यक्षा क्षमा बासरकर, बाल न्याय मंडळाच्या सदस्या भावना देशमुख, रुदय संस्थेचे संचालक काशिनाथ देवगडे, जिल्हा महिला व बालविकास अधिकारी दीपक बानाईत, जिल्हा बाल संरक्षण अधिकारी अजय साखरकर आदी उपस्थित होते. जिल्हा महिला व बाल विकास विभाग चंद्रपूर यांच्या मार्गदर्शनात बाल संरक्षण कक्ष व असेस्ट टु जस्टिस फॉर चिल्ड्रन प्रकल्प या संस्थेच्या वतीने या कार्यक्रमाचे आयोजन करण्यात आले होते.

पुढे मुख्य कार्यकारी अधिकारी विवेक जॉन्सन म्हणाले, बालविवाहाचे प्रमाण शहरी भागात कमी असून ग्रामीण भागात जास्त असल्याचे निदर्शनास येते. त्यामुळे जास्तीत जास्त जनजागृती करून बालविवाह प्रतिबंधासाठी सर्वांचे सहकार्य आवश्यक आहे, असेही त्यांनी सांगितले. मुख्य मार्गदर्शक सुमित जोशी यांनी बालविवाहाचे भारतातील वय व त्यासंदर्भात असलेल्या कायद्यांबाबत माहिती दिली..   

यावेळी विद्यार्थ्यांमध्ये जनजागृती निर्माण करण्याच्या हेतूने बालविवाह रोखण्यासाठी विद्यार्थ्यांना प्रतिज्ञा देण्यात आली. यावेळी विद्यार्थ्यांनी बालविवाह मुक्त भारत पथसंचालन करून रॅली काढली. रॅलीची  सांगता शाळेच्या पटांगणात करण्यात आली.

कार्यक्रमाचे संचालन प्रा. राजेश बारसागडे यांनी तर आभार शशिकांत मोकाशे यांनी मानले. कार्यक्रमाला परिविक्षा अधिकारी दिवाकर महाकाळकर, मोरेश्वर झोडे, सहायक पोलिस निरीक्षक अश्विनी वाकडे, गीता चौधरी, शाळेचे प्राचार्य  सी.डी. तन्नीरवार, उपमुख्याध्यापक जे.एम टोंगे, पर्यवेक्षक श्रीमती मुप्पिडवार, डी. एल कुरेकार यांच्यासह शाळेतील सर्व शिक्षक- शिक्षिका, शिक्षकेत्तर कर्मचारी व विद्यार्थी मोठ्या संख्येने उपस्थित होते.

००००००

मतदानाचा सेल्फी अपलोड स्पर्धेचे विजेते घोषित

 मतदानाचा सेल्फी अपलोड स्पर्धेचे विजेते घोषित

Ø लकी ड्रा द्वारे तीन भाग्यवंतांना मिळाले आकर्षक बक्षीसे

चंद्रपूर, दि. 27 : लोकसभा निवडणुकीप्रमाणेच विधानसभा सार्वत्रिक निवडणुकीत जिल्ह्यातील मतदानाचा टक्का वाढावा म्हणून जिल्हा प्रशासनाच्या वतीने स्वीप उपक्रमांतर्गत विविध स्पर्धांचे आयोजन करण्यात आले होते. यात प्रामुख्याने मतदान केल्यानंतर सेल्फी अपलोड करण्याच्या स्पर्धेत 8080 स्पर्धकांनी सहभाग नोंदविला. लकी ड्रॉ द्वारे या स्पर्धेचा निकाल जिल्हाधिकारी कार्यालयात जिल्हाधिकारी विनय गौडा जी.सी., मुख्य कार्यकारी अधिकारी विवेक जॉन्सन, निवासी उपजिल्हाधिकारी दगडू कुंभार, उपमुख्य कार्यकारी अधिकारी गिरीश धायगुडे यांच्या उपस्थितीत आज (दि. 27) घोषित करण्यात आला.

 

लकी ड्रॉ द्वारे काढण्यात आलेल्या या स्पर्धेचे प्रथम क्रमांकाचे बक्षीस (बुलेट मोटारसायकल) ब्रम्हपूरी तालुक्यातील शंकर धर्मा भर्रे यांना, द्वितीय क्रमांकाचे बक्षीस (15 ग्रॅम सोन्याचे नाणे) सिंदेवाही तालुक्यातील सोनल श्यामराव गभने व तृतीय क्रमांकाचे बक्षीस (मोबाईल फोन) चिमुर तालुक्यातील गितेश मदनकर यांना घोषित करण्यात आले.

जिल्ह्यातील मतदारांमध्ये मतदानाप्रती जनजागृती होऊन मतदानाचा टक्का वाढविण्यासाठी जिल्हा प्रशासनाने स्वीप उपक्रमांतर्गत सायकल रॅली, निबंध स्पर्धा, प्रश्नमंजुषा, टॅगलाईन, रिल्स तयार करणे, सेल्फी अपलोड करणे इ. स्पर्धा आयोजित केल्या होत्या.

००००००

दत्तक प्रक्रियेकरीता संपर्क करा

 

दत्तक प्रक्रियेकरीता संपर्क करा

Ø महिला व बालविकास कार्यालयाचे आवाहन

चंद्रपूर, दि. 25 : ज्यांना नैसर्गिक पालकत्वापासून वंचित राहावे लागते, अशा नागरिकांसाठी आता शासनाने सुवर्ण संधी उपलब्ध करून दिली आहे. पालकत्व मिळण्याकरीता तीन प्रकारे पालक बनण्याची संधी उपलब्ध करून देण्यात आली असून अधिक माहितीकरीता जिल्हा महिला व बालविकास अधिकारी कार्यालय अंतर्गत जिल्हा बाल संरक्षण कक्षाला भेट देण्याचे आवाहन करण्यात आले आहे. अशी आहे प्रक्रिया.

1) अनाथ बालक दत्तक घेणे  : यामध्ये अनाथ, परित्याग केलेले आणि सोडून दिलेल्या  बालकांचा समावेश होतो. अशा बालकाचे संरक्षण, जिल्हा बाल संरक्षण कक्ष आणि चाइल्ड हेल्पलाईनच्या माध्यमातून केले जाते. अशा बालकाचे संरक्षण, पालन पोषणकरिता किलबिल दत्तक योजना संस्था कार्यरत असून बालकल्याण समिती, चंद्रपूर, यांच्या आदेशाने दाखल करण्यात येते. यानंतर सदर बालकांना, बालकल्याण समिती चंद्रपूर द्वारे दत्तक मुक्त केले जाते. दत्तक इच्छुक पालक CARA (Central Adoption Resource Authority)  cara.wcd.gov.in या संकेत स्थळावर जाऊन पोर्टलवर नोंदणी करून बालक दत्तक घेऊ शकतात.

2) नात्याअंतर्गत (रक्तातील नाती )/सावत्र दत्तक : बाल न्याय बालकांची काळजी आणि संरक्षण अधिनियम 2015  चे कलम  2(52)  नुसार दत्तक जाणाऱ्या मुलाचे काका- काकू, मामा- मामी, मावसा -मावशी, आजी – आजोबा (आईकडील / वडीलांकडील) हे नात्यांतर्गत दत्तक  घेण्यास पात्र असतात. सावत्र दत्तक यामध्ये पती/ पत्नीमध्ये घटस्फोट झाल्यास, तसेच पती /पत्नी यापैकी एकाचे  मृत्यू झाल्यास, सदर व्यक्ती दुसरे  लग्न  करत असल्यास व त्याचे मुल/ मुली असतील, त्या मुलांना लग्न झालेल्या व्यक्तीचे नाव जोडण्याकरीता सावत्र दत्तक केल्या जाते. अशा दत्तक इच्छुक पालकांनी CARA (Central Adoption Resource Authority)  यांचे cara.wcd.gov.in या संकेत स्थळावर जाऊन cara पोर्टलवर नोंदणी करून बालक दत्तक घेऊ शकतात.

 3)  प्रतिपालकत्व दत्तक घेणे : काळजी आणि संरक्षणाची गरज असणारी बालके बालकल्याण समिती चंद्रपुर यांच्या आदेशान्वये बालगृहात दाखल होतात. अशा बालकांना त्यांचे पालक बालकांचे पालन पोषण करण्यास असमर्थ ठरविले जाते. किंवा बालकांना 6 महिन्यापासून  भेटायला आले नाही, अशा बालकांना बाल कल्याण समिती द्वारे प्रतिपालकत्व तत्वावर पालन पोषण करण्यास असमर्थ ठरविले जाते. किंवा इच्छुक पालकांना बालकांच्या सर्वांगीण विकासासाठी व  कुटुंबाचे प्रेम मिळण्यासाठी दत्तक देण्यास येते. यासाठी इच्छुक पालकांनी https://fcdcommpune.com/admin  या संकेत स्थळावर जाऊन नोंदणी करावी.

यानंतर जिल्हाधिकारी यांच्या अध्यक्षतेखाली गठीत समिती SFCAC (Sponcership and Fostercare ApprovalCommittee) द्वारे पात्र ठरविल्यानंतर बालकल्याण समिती मार्फत बालकाचा ताबा देान वर्षकरीता पालन पोषण करण्यासाठी पात्र कुटुंबाकडे देण्यात येतो. बालकाचे नाव / आडनाव बदलण्याचा अधिकार पात्र कुटुंबाला राहत नाही व दोन वर्षानंतर बालक जर त्या कुटुंबात रुळले तर अशा बालकाला दत्तक घेण्याची प्रक्रिया पालक  कोर्टामार्फत करु शकतो.

दत्तक प्रक्रिया जाणून घेणे व दत्तक प्रक्रियेकरिता नोंदणी विषयी जाणून घेण्याकरीता जिल्हा महिला व बालविकास अधिकारी  कार्यालय अंतर्गत जिल्हा बाल संरक्षण कक्षाला  भेट देण्याचे आवाहन जिल्हा महिला व बालाविकास अधिकारी दीपक बानाईत आणि जिल्हा  बाल संरक्षण अधिकारी अजय साखरकर यांनी केले आहे.

००००

एकलव्य मॉडेल रेसिडेंशिअल स्कूल प्रवेशाकरीता स्पर्धा परीक्षेचे आयोजन

 

एकलव्य मॉडेल रेसिडेंशिअल स्कूल प्रवेशाकरीता स्पर्धा परीक्षेचे आयोजन

Ø 25 जानेवारीपर्यंत अर्ज सादर करण्याचे आवाहन

चंद्रपूर, दि. 25 : सन 2025-26 या शैक्षणिक  वर्षात  एकलव्य मॉडेल रेसिडेंशिअल स्कुल, देवाडा मध्ये इयत्ता 6 वी, 7 वी व 9 वी च्या वर्गातील अनुशेष भरून काढण्याकरीता सद्यस्थितीत 5 वी, तसेच इयत्ता 6 वी ते 8 वी मध्ये शिक्षण घेत असलेल्या व पालकांचे उत्पन्न 6 लक्ष रुपयांपेक्षा कमी असलेल्या अनुसुचित जमातीचे / आदिम जमातीच्या विद्यार्थ्यांसाठी 23 फेब्रुवारी 2024 रोजी सकाळी 11 ते 1 या वेळेत तसेच इयत्ता 6 वी, इयत्ता 7 वी व 9 वी च्या विद्यार्थ्यांकरीता 11 ते  2 या वेळेत एकात्मिक आदिवासी विकास प्रकल्पातील एकलव्य मॉडेल रेसिडिेंशिअल स्कूल, देवाडा ता. राजुरा येथे स्पर्धा परिक्षेचे आयोजन करण्यात येणार आहे.

तरी सदर प्रवेशपूर्व स्पर्धा परिक्षेकरिता विहित अर्जाचा नमुना एकात्मिक आदिवासी  विकास प्रकल्प, सिव्हिल लाईन, जिल्हा क्रिडा  संकुलाच्या मागे, चंद्रपूर येथे व या प्रकल्पांतर्गत कार्यरत असलेले सर्व शासकीय आश्रमशाळा व शासकीय आदिवासी मुला/ मुलींचे वसतीगृह येथून प्राप्त  करून घ्यावे. तसेच अद्यावत माहिती भरलेले विहित नमुन्यातील अर्ज आवश्यक कागदपत्रांच्या छायांकित प्रतिसोबत वरिलप्रमाणे नमुद ठिकाणी  25 जानेवारी  2025 पर्यंत सादर करावे. नमुद दिनांकानंतर अर्ज स्विकारले जाणार नाही, याची नोंद घेण्यात यावी, असे प्रकल्प अधिकारी विकास राचेलवार यांनी कळविले आहे.

००००००

मतमोजणीच्या पार्श्वभूमीवर न्यायालय ते डॉ. हेडगेवार आश्रय छात्रवासापर्यंत रस्ता बंद

 

मतमोजणीच्या पार्श्वभूमीवर न्यायालय ते डॉ. हेडगेवार आश्रय छात्रवासापर्यंत रस्ता बंद

Ø दोन्ही बाजूचे रस्ते नो पार्किंग व नोकर झोन म्हणून घोषित

चंद्रपूर, दि. 22 : महाराष्ट्र विधानसभा सार्वत्रिक निवडणुकीची मतमोजणी 23 नोव्हेंबर 2024 रोजी तहसील कार्यालय, चंद्रपूर येथे होणार आहे. मतमोजणी दरम्यान मोठ्या प्रमाणात नागरिकांची गर्दी होण्याची शक्यता असल्याने सुरक्षेच्या दृष्टिकोनातून चंद्रपूर शहरातील न्यायालयापासून ते डॉ. हेडगेवार आश्रय छात्रवासापर्यंत सर्व प्रकारची वाहतूक बंद ठेवण्यात येणार आहे. तसेच दोन्ही बाजूचे रस्ते नो पार्किंग व नो हॉकर्स झोन म्हणून घोषित करण्यात आले आहे.

मतमोजणी दरम्यान दिनांक 23 नोव्हेंबर 2024 रोजी सकाळी 4 वाजतापासून ते सायंकाळी 6 वाजेपर्यंत चंद्रपूर शहरातील न्यायालयाच्या मेन गेट पासून ते डॉ. हेडगेवार यांचे आश्रय छात्रावासपर्यंत सर्व वाहनांना सदर रस्ता वाहतुकीकरिता बंद करण्यात येत आहे. तसेच सदरचे दोन्ही रस्ते हे नो पार्किंग झोन व नो हॉकर्स झोन घोषित करण्यात आल्यामुळे या मार्गावर कोणत्याही नागरिकांनी आपले वाहन पार्किंग करू नये व हातठेले सुद्धा लावू नये.

मतमोजणीकरिता येणाऱ्या शासकीय अधिकारी व कर्मचारी यांच्या वाहनाकरिता खालीलप्रमाणे पार्किंग स्थळे घोषित करण्यात आली आहे.

1.     प्रशासकीय भवन पार्किंग (दुचाकी वाहनांकरिता)

2.     रेल्वे स्टेशन (चारचाकी वाहनांकरिता)

वरील आदेशाचे पालन करून प्रशासनाला सहकार्य करावे, असे आवाहन जिल्हा पोलीस अधीक्षक मुम्मका सुदर्शन यांनी केले आहे.

००००००

मतमोजणीकरीता यंत्रणा सज्ज ! कर्मचा-यांचे प्रशिक्षण

 

मतमोजणीकरीता यंत्रणा सज्ज ! कर्मचा-यांचे प्रशिक्षण

Ø चंद्रपूरमध्ये सर्वाधिक 28 तर बल्लारपूरमध्ये 27 फे-या

चंद्रपूर, दि. 22 :  येत्या शनिवारी दि. 23 नोव्हेंबर रोजी जिल्ह्यातील सहाही विधानसभा मतदारसंघात मतमोजणी होणार आहे. या मतमोजणीकरीता जिल्हा प्रशासनासह संबंधित विधानसभा मतदारसंघातील संपूर्ण यंत्रणा सज्ज असून याबाबत कर्मचा-यांचे प्रशिक्षणसुध्दा घेण्यात आले.

महाराष्ट्र विधानसभा सार्वत्रिक निवडणुकीसाठी 20 नोव्हेंबर रोजी मतदान पार पडले. उद्या 23 नोव्हेंबर रोजी मतमोजणी होणार आहे. याकरीता संबंधित विधानसभा मतदारसंघात तयारी झाली आहे. यात चंद्रपूर मध्ये मतमोजणीचे सर्वाधिक 28 फे-या तर बल्लारपूरमध्ये 27 फे-या होणार आहेत.

            विधानसभानिहाय टेबल आणि राऊंडची संख्या : 70 – राजुरा विधानसभा मतदारसंघात मतमोजणीकरीता एकूण 14 ईव्हीएम टेबल, 25 फे-या आणि  10 पोस्टल बॅलेट टेबल राहणार आहे.  71 – चंद्रपूर विधानसभा मतदारसंघात मतमोजणी करीता 14 ईव्हीएम टेबल, 28 फे-या आणि  10 पोस्टल बॅलेट टेबल, 72 – बल्लारपूर विधानसभा मतदारसंघात मतमोजणी करीता 14 ईव्हीएम टेबल, 27 फे-या आणि  7 पोस्टल बॅलेट टेबल, 73 – ब्रम्हपुरी विधानसभा मतदारसंघात मतमोजणी करीता 14 ईव्हीएम टेबल, 23 फे-या आणि  10 पोस्टल बॅलेट टेबल, 74 – चिमूर विधानसभा मतदारसंघात मतमोजणी करीता 14 ईव्हीएम टेबल, 23 फे-या आणि  6 पोस्टल बॅलेट टेबल, तर 75 – वरोरा विधानसभा मतदारसंघात मतमोजणी करीता 14 ईव्हीएम टेबल, 25 फे-या आणि  10 पोस्टल बॅलेट टेबल राहणार आहेत.  

            या ठिकाणी होणार मतमोजणी : राजुरा विधानसभा मतदारसंघाची मतमोजणी प्रशासकीय इमारत, तहसील कार्यालय, राजुरा येथे,  चंद्रपूर विधानसभा मतदारसंघाची मतमोजणी तहसील कार्यालय, चंद्रपूर येथे, बल्लारपूर विधानसभा मतदारसंघाची मतमोजणी उपविभागीय अधिकारी कार्यालय, प्रशासकीय इमारत मुल येथे, ब्रम्हपूरी विधानसभा मतदारसंघाची मतमोजणी शासकीय तंत्रनिकेतन, नागभीड रोड, ब्रम्हपूरी येथे, चिमूर  विधानसभा मतदारसंघाची मतमोजणी राजीव गांधी सभागृह, उपविभागीय अधिकारी कार्यालय परिसर चिमूर येथे आणि वरोरा विधानसभा मतदारसंघाची मतमोजणी कृषी उत्पन्न बाजार समिती, गोडावून क्रमांक 2 मोहबाळा रोड वरोरा येथे होणार आहे.

कर्मचा-यांचे प्रशिक्षण : मतमोजणी संदर्भात तहसील कार्यालय, चंद्रपूर येथे उजळणी प्रशिक्षण घेण्यात आले. यावेळी चंद्रपूरचे निवडणूक निर्णय अधिकारी तथा उपविभागीय अधिकारी संजय पवार, सहायक निवडणूक अधिकारी तथा तहसीलदार विजय पवार, सीमा गजभिये व अधिकारी कर्मचारी उपस्थित होते. यावेळी नायब तहसीलदार सचिन खंडाळे यांनी सादरीकरणातून उपस्थितांना प्रशिक्षण दिले.

००००००

मतमोजणी केंद्राच्या 100 मीटर परिसरात निर्बंध लागू

 

मतमोजणी केंद्राच्या 100 मीटर परिसरात निर्बंध लागू

Ø जिल्हा निवडणूक अधिका-यांनी केले आदेश निर्गमित

चंद्रपूर, दि. 21 :  येत्या शनिवारी दि. 23 नोव्हेंबर रोजी जिल्ह्यातील सहाही विधानसभा मतदारसंघात मतमोजणी होणार आहे. जिल्ह्यात लागू असलेल्या आदर्श आचारसंहितेचे यथायोग्य पालन  होण्याचे दृष्टीने तसेच आचारसंहिता अंमलात असेपर्यंतच्या कालावधीकरीता भारतीय नागरिक सुरक्षा संहिता, 2023 चे कलम 163 अन्वये निर्बंध लागू करण्यात आले असून मतमोजणी केंद्राच्या 100 मीटर परिसरात निर्बंध लागू करण्यात आले आहेत. सदर आदेश जिल्हा निवडणूक अधिकारी तथा जिल्हाधिकारी विनय गौडा जी.सी यांनी निर्गमित केले आहे.

             त्यामुळे मतमोजणी केंद्राच्या परीसरात 23 नोव्हेंबर 2024 रोजी सकाळी 6 वाजेपासून ते मतमोजणीची  प्रक्रिया पूर्ण होईपर्यंत  खालील बाबी करण्यास मनाई करण्यात आली आहे.

1. मतमोजणीची प्रक्रिया होत असलेल्या ठिकाणापासून बाहेरील 100 मीटर परीसरात सर्व प्रकारच्या वाहतुकीस प्रतिबंध असेल. तसेच मतमोजणी केंद्राचे बाहेरील 100 मीटर परीसरातील सर्व दुकाने /आस्थापना/व्यवसाय केंद्र बंद राहतील. 2. मतमेाजणी   केंद्राचे परीसरात मतमोजणी कामावर नेमणुक झालेल्या अधिकारी व कर्मचारी यांच्याकरीता वाहनतळाची व्यवस्था करण्यात आलेली असून, मतमोजणी करीता नियुक्ती झालेल्या अधिकरी व कर्मचारी यांची वाहने, पोलिस विभाग, विदयुत विभाग, अग्निशमन विभाग व सुरक्षा व्यवस्थेकरीता असलेली वाहने यांनाच प्रवेश राहील. इतर सर्व प्रकारच्या वाहनांस प्रतिबंध असेल.

3. भारत निवडणुक आयोगाचे वतीने वितरीत केलेल्या अधिकृत ओळखपत्राशिवाय इतर व्यक्तिंना मतमोजणी परिसरात प्रवेश प्रतिबंधीत असेल. मतमोजणीचे दिवशी  मतमोजणी  केंद्राच्या  बाहेरील 100 परीसरात  2 किंवा त्यापेक्षा अधिक व्यक्ती समुहास जमा होण्यास प्रतिबंध असेल.  उमेदवार व  पत्रकार यांना ठरवून दिलेल्या बैठक व्यवस्थेच्या ठिकाणी आवश्यकतेप्रमाणे संपर्क  साधण्यासाठी मोबाईल फोनचा वापर करता येईल, परंतू प्रत्यक्ष मतमोजणी कक्षात मोबाईल फोन वा कोणतेही  इलेक्ट्रॉनिक गॅजेट नेण्यास/ वापरण्यास प्रतिबंध असेल. मतमोजणी केंद्राच्या परिसरात सभोवताल 1 कि.मी.चे क्षेत्रात/  परीसरात ड्रोन वा ड्रोन सदृश्य  वस्तु उडविण्यास 23 नोव्हेंबर 2024 रोजी सकाळी 6  वाजतापासून मतमोजणीची संपूर्ण प्रक्रिया संपेपर्यंत  प्रतिबंध असेल, असे जिल्हाधिका-यांच्या आदेशात नमुद आहे.

या ठिकाणी होणार मतमोजणी : 70- राजुरा विधानसभा मतदारसंघाची मतमोजणी प्रशासकीय इमारत, तहसील कार्यालय, राजुरा येथे,    71- चंद्रपूर विधानसभा मतदारसंघाची मतमोजणी तहसील कार्यालय, चंद्रपूर येथे, 72 - बल्लारपूर विधानसभा मतदारसंघाची मतमोजणी उपविभागीय अधिकारी कार्यालय, प्रशासकीय इमारत मुल येथे, 73 - ब्रम्हपूरी विधानसभा मतदारसंघाची मतमोजणी शासकीय तंत्रनिकेतन, नागभीड रोड, ब्रम्हपूरी येथे,  74- चिमूर  विधानसभा मतदारसंघाची मतमोजणी राजीव गांधी सभागृह, उपविभागीय अधिकारी कार्यालय परिसर चिमूर येथे आणि 75-वरोरा विधानसभा मतदारसंघाची मतमोजणी कृषी उत्पन्न बाजार समिती, गोडावून क्रमांक 2 मोहबाळा रोड वरोरा येथे होणार आहे.

 

००००००

निवृत्ती वेतनधारकांनी हयात असल्याचे प्रमाणपत्र सादर करावे

 

निवृत्ती वेतनधारकांनी हयात असल्याचे प्रमाणपत्र सादर करावे

चंद्रपूर, दि. 21 :   चंद्रपूर कोषागार अंतर्गत बँकेद्वारे निवृत्ती वेतनधारकांना 1 नोव्हेंबर 2024 रोजी हयात असल्याच्या प्रमाणपत्राची (Life Certificate) यादी संबंधित बँकेस माहे ऑक्टोबर अखेर पाठविण्यात आली आहे. सदर यादीवर निवृत्तीवेतन धारक/कुटुंब निवृत्तीवेतन धारकांनी मोबाईल क्रमांक, पॅन क्रमांक, आधार क्रमांक नमुद करून 30 नोव्हेंबर 2024 पूर्वी स्वत: उपस्थित होऊन स्वाक्षरी करावयाची आहे. जेणेकरून हयात असल्याच्या प्रमाणपत्राची यादी कोषागाराला वेळीच प्राप्त होईल व त्यांचे माहे डिसेंबर 2024 पासूनचे निवृत्तीवेतन बँकेकडे वेळीच पाठविता येईल.  तसेच जे निवृत्ती वेतनधारक मनिऑर्डरद्वारे निवृत्ती वेतन घेतात त्यांनी आपले हयात प्रमाणपत्र राजपत्रित अधिकाऱ्यांकडून प्रमाणित करून 30 नोव्हेंबर 2024 पर्यंत कोषागाराला पाठवावे.

 असा सादर करता येईल हयातीचा दाखला : आपले पेन्शन खाते  असलेल्या बँकेच्या शाखेत जाऊन बँक अधिकाऱ्याच्या समक्ष हयात दाखल्याच्या यादीतील आपल्या नावासमोर स्वाक्षरी करा. बँकेत जाऊ शकत नसल्यास जीवनप्रमाण या संकेतस्थळावर जाऊन ऑनलाईन पद्धतीने पुढीलप्रमाणे  हयात दाखला सादर करा.

1. https://jeevanpraman.gov.inया संकेतस्थळावर लॉगइन करा. 2. GENERAL LIFE CERTIFICATE वर क्लीक करा. 3 तुमचा आधार क्रमांक टाका. 4. तुमच्या मोबाईल नंबरवर आलेला ओटीपी टाका आणि तुमचा हयातीचा दाखला काही सेंकदात प्राप्त करा.

तुमच्या जवळच्या  जिल्हा कोषागार कार्यालय किंवा उपकोषागाराला भेट द्या. हयात दाखल्यावर  बँक अधिकारी किंवा राजपत्रीत अधिकाऱ्याच्या समक्ष स्वाक्षरी करून जिल्हा कोषागार कार्यालयात सादर करा. काही कारणानिमित्त परदेशात असल्यास तेथील भारतीय राजदुतामार्फत हयातीचा दाखला संबंधित जिल्हा कोषागार कार्यालयात सादर करा.  हयात प्रमाणपत्र 5 डिसेंबर 2024  पर्यंत कोषागारास  प्राप्त न झाल्यास त्यांचे माहे डिसेंबर 2024 पासुनचे निवृत्तीवेतन बॅंकेकडे पाठविले जाणार नाही, याची कृपया नोंद घ्यावी, असे जिल्हा कोषागार अधिकारी सुहास पवार यांनी कळविले आहे.

००००००

सायंकाळी 5 वाजेपर्यंत जिल्ह्यात सरासरी 64.48 टक्के मतदान

 

सायंकाळी 5 वाजेपर्यंत जिल्ह्यात सरासरी 64.48 टक्के मतदान

Ø अंतिम आकडेवारी उशिरा येण्याची शक्यता

चंद्रपूर, दि. 20 : महाराष्ट्र विधानसभा सार्वत्रिक निवडणुकीसाठी आज (दि.20) चंद्रपूर जिल्ह्यातील सहाही विधानसभा मतदारसंघात सायंकाळी 5 वाजेपर्यंत सरासरी 64.48 टक्के मतदान झाले. मतदानाची वेळ सायंकाळी 6 वाजेपर्यंत असल्यामुळे अंतिम आकडेवारी उशिरा येण्याची शक्यता आहे.

70 – राजुरा विधानसभा मतदारसंघात सायंकाळी 5 वाजेपर्यंत 1 लक्ष 7 हजार 344 पुरुष मतदार, 1 लक्ष 6 हजार 12 स्त्री मतदार व 2 इतर मतदार अशा एकूण 2 लक्ष 13 हजार 358 मतदारांनी (65.59 टक्के) मतदानाचा हक्क बजावला.

71 – चंद्रपूर विधानसभा मतदारसंघात 1 लक्ष 2 हजार 296 पुरुष मतदार, 98 हजार 4 स्त्री मतदार अशा एकूण 2 लक्ष 300 मतदारांनी (53.57 टक्के) मतदान केले.

72 – बल्लारपूर विधानसभा मतदारसंघात 98 हजार 179 पुरुष मतदार, 99 हजार 989 स्त्री मतदार व 3 इतर मतदार अशा एकूण 1 लक्ष 98 हजार 171 मतदारांनी (63.44 टक्के) मतदान केले.

73 – ब्रम्हपुरी विधानसभा मतदारसंघात 97 हजार 592 पुरुष मतदार, 1 लक्ष 3 हजार 573 स्त्री मतदार अशा एकूण 2 लक्ष 1 हजार 165 मतदारांनी (72.97 टक्के) मतदान केले.

74 – चिमूर विधानसभा मतदारसंघात 1 लक्ष 2 हजार 431 पुरुष मतदार, 1 लक्ष 7 हजार 697 स्त्री अशा एकूण 2 लक्ष 10 हजार 128 मतदारांनी (74.82 टक्के) मतदान केले.

तर 75 – वरोरा विधानसभा मतदारसंघात 84 हजार 825 पुरुष मतदार, 84 हजार 991 स्त्री मतदार व 1 इतर मतदार अशा एकूण 1 लक्ष 69 हजार 817 मतदारांनी (60.21 टक्के) सायंकाळी 5 वाजेपर्यंत मतदानाचा हक्क बजावला.

जिल्ह्यातील सहाही विधानसभा मतदारसंघात एकूण 5 लक्ष 92 हजार 667 पुरुष मतदारांनी, 6 लक्ष 266 स्त्री मतदारांनी आणि 6 इतर मतदारांनी अशा एकूण 11 लक्ष 92 हजार 939 मतदारांनी सायंकाळी 5 वाजेपर्यंत मतदान केले. जिल्ह्याची मतदानाची सरासरी टक्केवारी 64.48 आहे.

०००००