चंद्रपूर जिल्हयातील सर्व पंचायत समितीच्या इमारतीला आधुनिक स्वरूप देणार : ना. मुनगंटीवार

* पंचायत समितीच्या नव्या इमारतीचे लोकार्पण

     * फर्निचरसाठी एक कोटी रुपये अतिरिक्त देणार

 चंद्रपूर दि. 28 जून- चंद्रपूर जिल्ह्यातील सर्व पंचायत समिती अत्याधुनिक स्वरूपाच्या व्हाव्यात, यासाठी आपला प्रयत्न सुरू आहे. वरोरामध्ये निर्माण झालेल्या नव्या इमारतीच्या आधुनिकीकरणासाठी आवश्यक असणारे फर्निचर उपलब्ध केले जाईल. मात्र या सुविधा भेटत असताना पंचायत समितीच्या इमारती म्हणजे गरीबांना हात देणाऱ्या यंत्रणा झाल्या पाहिजे, असे आवाहन राज्याचे वित्त, नियोजन व वने मंत्री तथा पालकमंत्री सुधीर मुनगंटीवार यांनी काल येथे केले.

गुरुवारी रात्री उशिरा पंचायत समितीच्या नव्या इमारतीचे लोकार्पण करताना त्यांनी या ठिकाणी उपस्थित असणाऱ्या नागरिकांची व पदाधिकाऱ्यांशी संवाद साधला. वरोरा पंचायत समितीच्या वास्तुला दिग्गज सभापतींचा वारसा लाभला आहे. अशा जुन्या जाणत्या सर्व सभापतींचा सत्कार देखील यावेळी सुधीर मुनगंटीवार यांनी केला. वरोरा पंचायत समिती मार्फत लोकशाही व्यवस्थेत गरीबाच्या समस्या सुटण्याची आदर्श वहिवाट निर्माण व्हावी, अशी अपेक्षा यावेळी जुन्याजाणत्या सगळ्या पदाधिकाऱ्यांसोबत चर्चा करताना मुनगंटीवार यांनी व्यक्त केली. वरोरा भद्रावती क्षेत्रासाठी मोठ्या प्रमाणात विकासकामे केली जात आहे. वरोरा नगरपालिकेला 17 कोटी रुपयांचा निधी दिला आहे. यापुढेही आवश्यकतेनुसार निधी उपलब्ध केल्या जाईल, असे त्यांनी सांगितले. या कार्यक्रमाला वनविकास महामंडळाचे अध्यक्ष चंदनसिंग चंदेल, माजी मंत्री संजय देवतळे, जिल्हा परिषद चंद्रपूरचे मुख्य कार्यकारी अधिकारी जितेंद्र पापळकर, सभापती ब्रिजभूषण पाझारे, सभापती अर्चना जीवतोडे, वरोरा नगरपरिषदेचे नगराध्यक्ष एहतेशाम अली, वरोरा पंचायत समितीच्या सभापती रोहिणी देवतळे, अतिरिक्त मुख्य कार्यकारी अधिकारी  चंद्रकांत वाघमारे,  जिल्हा परिषदेचे कार्यकारी  अभियंता  नरेंद्र बुरांडे यांच्यासह अनेक मान्यवर उपस्थित होते.

पंचायत समिती वरोरा येथील नवीन प्रशासकीय इमारतीचे बांधकाम ‘ 2515 इतर ग्रामीण विकास कार्यक्रम अंतर्गत ’ महाराष्ट्र शासनाच्या ग्रामविकास व जलसंधारण विभागामार्फत करण्यात आले आहे. 1 कोटी 65 लाख हजार रकमेच्या या इमारतीचे बांधकाम दोन माळयामध्ये करण्यात आले आहे.  या ठिकाणी सभापती, उपसभापती यांचे कक्ष आहेत. याशिवाय सामान्य प्रशासन, पंचायत व शिक्षण विभागाच्या कार्यालयाचा  देखील  समावेश आहे. पहिल्या मजल्यावर बैठकीकरिता एक मोठे सभागृह या इमारतीचे  वैशिष्ट्य  आहे. याशिवाय वेगवेगळ्या 12 खोल्या असून यामध्ये संवर्ग विकास अधिकारी कक्ष, सहाय्यक गट  विकास अधिकारी कक्ष, पशुसंवर्धन, आरोग्य, कृषी,  पाणी पुरवठा विभागाच्या कार्यालयाचा अंतर्भाव आहे. पंचायत समिती अंतर्गत असलेल्या एकूण नऊ विभागाची कार्यालये या इमारतीमध्ये राहणार आहे. या इमारतीमध्ये आवश्यक असणाऱ्या फर्निचरसाठी लागणारा  एक कोटीचा खर्च पालक मंत्री ना.सुधीर मुनगंटीवार यांनी मंजूर करण्याचे  आश्वासन  यावेळी  दिले. पावसामुळे उशीर झालेल्याया कार्यक्रमात रात्री उशिरा मोठ्या संख्येने जुने पदाधिकारी उपस्थित होते. त्या सर्वांशी  ना.सुधीर मुनगंटीवार  यांनी परस्पर  संवाद साधला.

                                                                           0000