मुल शहरात सिमेंट रस्ते आणि सांडपाणी व्यवस्थापनासाठी 5 लक्ष 28 लक्ष रुपये मंजूर
Ø पालकमंत्र्यांच्या प्रयत्नांना यश
चंद्रपूर, 3 : बल्लारपूर मतदार संघात येत असलेल्या मुल शहरातील अंतर्गत रस्ते मजबूत होणार असून सांडपाणी व्यवस्थापन अधिक सुरळीत होणार आहेत. याकरिता चंद्रपूर जिल्ह्याचे पालकमंत्री व राज्याचे वन, सांस्कृतिक व मत्स्यव्यवसाय मंत्री सुधीर मुनगंटीवार यांनी पुढाकार घेऊन व सतत पाठपुरावा केल्यामुळे 5 कोटी 28 लक्ष 16 हजार 661 रुपये मंजूर करवून घेतले आहेत. राज्याच्या नगर विकास विभागाकडे याबाबत श्री. मुनगंटीवार यांनी मागणी केली होती. त्यानुसार 1 फेब्रुवारी रोजी नगर विकास विभाग, मंत्रालयाकडून आदेश निर्गमित करण्यात आला आहे.
यासंदर्भात श्री मुनगंटीवार म्हणाले की, या विकासकामांच्‍या माध्‍यमातून मुल शहराच्या वैभवात अधिक भर घातली जाणार आहे. या आधीही मुल शहरात सिमेंट रस्‍त्‍यांचे बांधकाम, अंतर्गत रस्ते व नाल्‍यांचे बांधकाम, कर्मवीर मा.सा. कन्‍नमवार यांचे स्‍मारक व सभागृहाचे बांधकाम, पं. दिनदयाल उपाध्‍याय इको पार्कचे बांधकाम, आदिवासी मुलांचे व मुलींचे शासकीय वसतीगृह, माळी समाजाच्‍या विद्यार्थ्‍यांसाठी स्‍वतंत्र वसतीगृहाचे बांधकाम, डॉ. श्‍यामाप्रसाद मुखर्जी सार्वजनिक वाचनालय इमारतीचे बांधकाम, औद्योगिक प्रशिक्षण संस्‍थेत अतिरिक्‍त कार्यशाळेचे बांधकाम, क्रीडा संकुलाचे बांधकाम, जलतरण तलावाची निर्मिती, शहरात पंचायत समितीची अत्‍याधुनिक इमारत, तहसील कार्यालयाची अत्‍याधुनिक इमारत, शहरातील बसस्‍थानकाचे अत्‍याधुनिकीकरण व नुतनीकरण, शहरात 24 बाय 7 पाणी पुरवठा योजना अशी विकासकामांची मोठी मालिका आम्‍ही तयार केली आहे.
मुल शहराच्या सर्वांगीण विकासाला मी प्राधान्य देतोय. शहरातील पायाभूत सुविधा, नागरिकांच्या मूलभूत गरजा आणि शैक्षणिक, सांस्कृतिक वातावरण उत्तम असावे, यासाठी आवश्यक त्या सुविधा उपलब्ध करून देण्यासाठी यापुढेही विविध विभागातून निधी उपलब्ध करून दिला जाईल, असे पालकमंत्री सुधीर मुनगंटीवार म्हणाले.
००००००
No comments:
Post a Comment