महात्मा फुले मागासवर्ग विकास महामंडळाच्या योजनांसाठी अर्ज करण्याचे आवाहन

महात्मा फुले मागासवर्ग विकास महामंडळाच्या योजनांसाठी अर्ज करण्याचे आवाहन

चंद्रपूर, दि. 21 : महात्मा फुले मागासवर्ग विकास महामंडळ मर्या. चंद्रपूर मार्फत अनुसूचित जातीतील लोकांना स्वयंरोजगारासाठी अर्थसहाय्य उपलब्ध करून दिले जाते. चालू आर्थिक वर्ष 2025-26 करिता मुख्यालयाकडून अनुदान कर्ज योजनेअंतर्गत 80, बीज भांडवल कर्ज योजनेअंतर्गत 80, थेट कर्ज योजनेअंतर्गत 38 असे एकूण 198 लाभार्थ्यांना कर्ज व अनुदान वाटप करण्याचे उद्दिष्ट प्राप्त झाले आहे. या योजनांचा लाभ घेण्याचे आवाहन करण्यात आले आहे.

अनुदान योजना : प्रकल्प मर्यादा 50 हजार रुपये पर्यंत, सदर योजनेत 25 हजार रुपयांपर्यंत कर्ज बँकेतर्फे दिले जाते व 25 हजार रुपये अनुदान महामंडळामार्फत देण्यात येते. बँक कर्जावर बँकेच्या नियमाप्रमाणे व्याज आकारण्यात येते. कर्जाची परतफेड सर्वसाधारणपणे 3 वर्षात करावयाची आहे.

बीज भांडवल योजना : प्रकल्प मर्यादा 5 लक्ष रुपयापर्यंत, प्रकल्प मर्यादेच्या 20 टक्के बीज भांडवल कर्ज महामंडळामार्फत 4 टक्क्यांनी व्याजदराने देण्यात येते. सदर राशीमध्ये महामंडळाच्या अनुदानाचा समावेश आहे. 75 टक्के पर्यंत कर्ज बँकेमार्फत दिले जाते व सदर कर्जावर बँकेच्या नियमाप्रमाणे व्याजदर आकारण्यात येतो. महामंडळाचे व बँकेच्या कर्जाची परतफेड एकाच वेळेस ठरवून दिलेल्या समान मासिक हप्त्यानुसार 3 ते 5 वर्षात करावी लागते व 5 टक्के लाभार्थ्यांचा सहभाग असतो

थेट कर्ज योजना : प्रकल्प मर्यादा 1 लाख रुपये पर्यंत, प्रकल्प मर्यादेच्या 85 हजार रुपये कर्ज महामंडळामार्फत 4 टक्के व्याजदराने देण्यात येते. सदर राशीमध्ये 10 हजार रुपये महामंडळाच्या अनुदानाचा समावेश आहे. कर्जाची परतफेड एकाच वेळेस ठरवून दिलेल्या समान मासिक हप्त्यानुसार 3 वर्षात करावी लागते व 5 टक्के लाभार्थ्यांचा सहभाग असतो

वरील दिलेल्या योजनांच्या अर्ज भरण्याकरिता महामंडळाच्या mahadisha.mpbcdc.in या पोर्टल वर जाऊन अर्ज भरावे= अधिक माहिती करिता महात्मा फुले मागासवर्ग विकास महामंडळ कार्यालय, डॉ.बाबासाहेब आंबेडकर सामाजिक न्याय भवन, चंद्रपूर येथे तसेच 07172-253549 या क्रमांकावर संपर्क करावा, असे आवाहन जिल्हा व्यवस्थापक यांनी केले आहे.

००००००