बल्लारपूरच्या रोजगार महामेळाव्याला युवकांचा उदंड प्रतिसाद ; 25 हजारावर नोंदणी

·        मुलाखत व भेटीसाठी उच्च तंत्रज्ञानाचा वापर

·        नोंदणी करणाऱ्या प्रत्येकाला एसएमएस जाणार

·        कधी यायचे, किती वाजता यायचे, कुठे जायचे याची मिळेल सूचना

·        फक्त नोंदणीकृत विद्यार्थ्यांनाच महामेळाव्यात प्रवेश

चंद्रपूर दि. 24 नोव्हेंबर: ऑनलाइन नोंदणी,एसएमएसद्वारे युवकांना सूचना, प्रिंट आउटवरच कोणी,कुठे जायचे याची होणारी नोंद ,खानपानाची आतमध्ये केलेली व्यवस्था आणि उमेदवारांच्या मुलाखतीचे  वेळेनुसार केलेले काटेकोर नियोजन, असे 28व 29तारखेच्या बल्लारपूर येथील रोजगार महामेळाव्याचे हायटेक स्वरूप आहे.यासाठी वापरण्यात आलेले ॲप प्रतिसादामुळे भारतात इव्हेंटसाठी वापरले जात असलेले दुसऱ्या क्रमांकाचे ॲप झाले आहे. चौथ्या दिवशी 25 हजार सुशिक्षित बेरोजगारांनी यावर आपली नोंदणी केली आहे. राज्याचे अर्थ, नियोजन व वनमंत्री तथा चंद्रपूर जिल्ह्याचे पालकमंत्री ना.सुधीर मुनगंटीवार यांच्या पुढाकाराने होणारा हा मेळावा महाराष्ट्रातील एक हायटेक महा मेळावा म्हणूनही पुढे आला आहे. 21 ते 24 ऑक्टोबर या चार दिवसात 25 हजार युवकांनीwww.yeschandrapur.com/register.aspx या वेबसाईटवर जाऊन नोंदणी केली आहे.

 त्यामुळे आयोजनाच्या क्रमवारीत भारतातील सर्वाधिक व्हिजिटर्स असणारे हे क्रमांक दोनचे ॲप झाले आहे. विशेष म्हणजे 28 व 29 च्या या मेळाव्यामध्ये प्रत्येक नोंदणीकृत विद्यार्थ्याला त्याच्या मुलाखतीची वेळ,मुलाखतीचे स्थळ, दालन क्रमांक, गेट क्रमांक याबाबतची माहिती एसएमएसद्वारे दिली जाणार आहे. बल्लारपूर येथील इन्स्टिट्यूट ऑफ टेक्नॉलॉजी बामणी येथे हा मेळावा होत आहे. या ठिकाणी एकाच वेळी गर्दी होऊ नये, यासाठी ज्या मुलांनी नोंदणी केली आहे. त्या मुलांना येणाऱ्या एसएमएसकडे त्यांनी लक्ष ठेवावे,असे आयोजकांनी कळविले आहे.

                 बामणी परिसरात असणाऱ्या वेगवेगळ्या दालनांमध्ये विद्यार्थ्याच्या इंटरव्यू होणार आहेत. याशिवाय त्यांना प्रवेश देखील त्यांनी आणलेल्या प्रिंटआऊट वर किंवा त्यांच्याकडे स्मार्टफोनवर आलेल्या मेसेज वर देण्यात येणार आहे.या मुलांसोबत येणाऱ्या कोणत्याही पालकाला, शिक्षकाला किंवा सहाय्यक मित्राला प्रवेश दिला जाणार नाही. येणाऱ्या सगळ्या युवकांसाठी खानपानाची व्यवस्था आत मध्ये करण्यात आली आहे. तथापि प्रत्येक विद्यार्थ्याने त्याने ज्या क्षेत्रात नोंद केली आहे, त्यासाठी इंटरव्यू देण्यासाठी आपले मूळ दस्तावेज त्याच्या आवश्यक झेरॉक्स प्रती आणि आपल्या बायोडाटाच्या पाच प्रती सोबत आणणे गरजेचे आहे. स्वतःच्या झेरॉक्स प्रती विद्यार्थ्यांनी सोबत घेऊन याव्यात अशी विनंती आयोजकांनी केली आहे. मोजक्या वेळेमध्ये मोठ्या प्रमाणात सर्वांना संधी देण्यासाठी विद्यार्थ्यांनी कार्यक्रम स्थळी पोहोचताना ही काळजी घेण्याची विनंती करण्यात आली आहे.

                या ठिकाणचा प्रवेश हा ऑनलाइन असल्यामुळे येणाऱ्या तज्ञ मान्यवरांच्या भाषणासाठी देखील आत मध्ये प्रवेश घेतलेल्या युवकांनाच संधी मिळणार आहे.या ठिकाणी 50 विख्यात कंपनी येणार असून वेगवेगळ्या क्षेत्रातील सुशिक्षित बेरोजगार यांची निवड केली जाणार आहे. त्यामुळे या ठिकाणच्या सर्व सुचनांचे व्यवस्थित पालन करण्याबाबतचे आवाहन आयोजकांनी केले आहे.

            या मेळाव्यामध्ये मिशन सेवा, मिशन स्वयंरोजगार, मिशन कौशल्य विकास, मिशन फोरेन सर्विसेस, मिशन उन्नत शेती, मिशन सोशल वर्क, आदी विषयांवर ज्येष्ठ तज्ज्ञ मार्गदर्शन करणार आहेत. चंद्रपूर जिल्हा प्रशासन, बल्लारपूर नगरपालिका, राज्य शासनाचे विविध विभाग, जिल्हा कौशल्य विकास रोजगार व उद्योजकता मार्गदर्शन केंद्र, डॉ. श्यामाप्रसाद मुखर्जी सार्वजनिक वाचनालय चंद्रपूर, आमदार अनिल सोले अध्यक्ष असणारी फॉर्च्यून फाउंडेशन संस्था, या योजनांमध्ये सक्रिय असून सर्व युवकांचे व्यवस्थित समुपदेशन होईल व बल्लारपूरच्या भूमीतून त्यांच्या करिअरला नवी सुरुवात होईल यासाठी प्रयत्न करीत असल्याचे आयोजकांनी स्पष्ट केले आहे.

0000000