31 ऑक्टोंबर रोजी सिंदेवाही येथे धान महोत्सव 2018

चंद्रपूर, दि.30 ऑक्टोबर – अकोला येथील डॉ. पंजाबराव देशमुख कृषि विद्यापीठ स्थापनेला 20 ऑक्टोंबर 2018 रोजी 50 वर्षपूर्ण झाले आहे. त्या निमित्त विद्यापीठाच्या सुवर्ण महोत्सवाचे औचित्य साधून विभागीय कृषि संशोधन केंद्र, सिंदेवाही येथे दिनांक 31 ऑक्टोबर 2018 रोजी सकाळी 11 वाजता विभागीय कृषि संशोधन केंद्र, सिंदेवाही, कृषि विभाग व आत्मा यांच्या संयुक्त विद्यमाने ‘धान महोत्सवाचे’ आयोजन करण्यात आले आहे.

               सदर महोत्सवाअंतर्गत कृषि मेळावा, कृषि प्रदर्शनी व चर्चासत्र आयोजित करण्यात आले आहे. या धान महोत्सव कार्यक्रमाचा शुभारंभ राज्याचे वित्त, नियोजन व वनेमंत्री तथा पालकमंत्री ना.सुधीर मुनगंटीवार यांच्या हस्ते संपन्न होणार असून या कार्यक्रमाचे प्रमुख अतिथी म्हणून राज्याचे सामाजिक न्याय आणि विशेष सहाय्य मंत्री ना.राजकुमार बडोले, जिल्हा परिषद अध्यक्ष देवराव भोंगळे, खासदार अशोक नेते हे उपस्थित राहणार आहे. तर कार्यक्रमाच्या अध्यक्षस्थानी डॉ.पंजाबराव देशमुख कृषि विद्यापीठाचे कुलगुरु डॉ. विलास भाले असणार आहे.  त्याचप्रमाणे आमदार  विजय वडेट्टीवार, आमदार किर्तीकुमार भांगडिया, सिंदेवाही पंचायत समिती सभापती मधुकर मडावी, कार्यकारी परिषद सदस्य जयन्नुद्दीन जव्हेरी,  स्नेहाताई हरडे, नागपूरचे विभागीय कृषि सहसंचालक रविंद्र भोसले, गडमौशीचे सरपंच सचिन नाडमवार हे विशेष अतिथी म्हणून उपस्थित राहणार आहेत.

               या कृषि विद्यापिठाने मागील पाच दशकात  शेतकरी  भिमूख आणि शेतकरी समृध्द होण्यासाठी सर्वोत्तम कार्य  करीत आहे. त्याचाच एक भाग म्हणून मुख्यत्वेकरून बिजात्पादन कार्यात विभागीय कृषि संशोधन केंद्र, सिंदेवाही संशोधन केंद्राने लक्षणीय कामगीरी बजावून आपले अस्तित्व सिध्द केले आहे. सदर कार्यक्रमामध्ये धान पिकांचे रासायनिक व जैविक तण नियंत्रण, धान पिकांचे एकात्मिक कीड व्यवस्थापन, धान पिकाविषयक जैविक खते, बुरशीनाशके व किटकनाशके, भाजीपाला व फळपीक लागवड, पूर्व विदर्भातील कडधान्य पिके लागवड तंत्रज्ञान (लाखोळी, हरभरा, वाल, तूर), पूर्व विदर्भातील गळीत धान्य पिके लागवड तंत्रज्ञान (जवस, मोहरी, उन्हाळी भूईमूग), शाश्वत धान उत्पादन तंत्रज्ञान इत्यादी विषयांवर विद्यापीठातील विविध विभाग प्रमुख यांचे या कार्यक्रमात मौलिक मार्गदर्शन लाभणार आहे.

               तरी पूर्व विदर्भ विभागातील सर्व शेतकरी व महिला शेतकरी यांनी मोठ्या संख्येने कार्यक्रमास उपस्थित राहून मान्यवरांच्या मार्गदर्शनाचा लाभ घ्यावा असे आवाहन संशोधन संचालक डॉ.व्ही.के.खर्चे, संचालक विस्तार शिक्षण डॉ.डी.एम.मानकर, कुलसचिव डॉ.प्रकाश  कडू, सहयोगी संशोधन संचालक डॉ.प्रशांत शेंडे, कार्यक्रम समन्वयक डॉ.विनोद नागदेवते यांनी केले आहे.                                                                                        0000