मनुष्यबळाची त्रेमासिक माहिती नमुना ईआर-1 मध्ये विहित मुदतीत सादर करा

 

मनुष्यबळाची त्रेमासिक माहिती नमुना ईआर-1 मध्ये विहित मुदतीत सादर करा

Ø 31 जुलै माहिती सादर करण्याची अंतिम तारीख

चंद्रपूर, दि. 6 जुलै : चंद्रपूर जिल्हयातील सार्वजनिक तसेच खाजगी क्षेत्रातील सर्व आस्थापनांना, सेवायोजन कार्यालये (रिक्तपदे सक्तीने अधिसुचित करणे) कायदा, 1959 व नियम 1960 च्या कलम 5(1) अन्वये सर्व सार्वजनिक क्षेत्रातील  शासकीय, निमशासकीय, तसेच कलम 5(2)अन्वये खाजगी क्षेत्रातील कायद्यांतर्गत असणाऱ्या आस्थापणांना त्यांच्या आस्थापणेवर असणाऱ्या सर्व कर्मचाऱ्यांची  सांख्यिकी माहिती, प्रत्येक तिमाहीस, विषयांकित कायद्यातील तरतुदीनुसार विहीत नमुना ईआर-1 मध्ये नियमितपणे, महाराष्ट्र शासनाच्या कौशल्य विकास, रोजगार व उद्योजकता विभागाच्या www.rojgar.mahaswayam.gov.in या संकेतस्थळावरुन ऑनलाईन पध्दतीने सादर करणे बंधनकारक आहे. असे जिल्हा कौशल्य विकास, रोजगार व उद्योजकता मार्गदर्शन केंद्रांचे सहाय्यक आयुक्त भैय्याजी येरमे यांनी कळविले आहे.

त्यानुसार मार्च 2022 अखेर संपणाऱ्या तिमाहीची नमुना ई-आर-1 मधील त्रैमासिक सांख्यिकी माहिती संकलनाचे काम जिल्हा कौशल्य विकास, रोजगार व उद्योजकता मार्गदर्शन केंद्र, प्रशासकीय भवन,पहिला माळा, हॉल क्र.5/6  चंद्रपूर या कार्यालयाद्वारे ऑनलाईन पध्दतीने चालू असून, या सर्व आस्थापनांनाकडून 100 टक्के प्रतिसाद मिळणे अत्यंत आवश्यक आहे. या सर्व आस्थापनांना या कार्यालयाकडून यापूर्वीच युझरनेम व पासवर्ड देण्यात आलेले आहेत. त्याचा वापर करुन प्रत्येकाने या विभागाच्या www.rojgar.mahaswayam.gov.in या संकेतस्थळावर लॉगीन करावा व आपली अचूक माहिती ऑनलाईन पध्दतीने सादर करावी.  जून 2022 अखेरचे तिमाही विवरणपत्र सादर करण्याची अंतिम तारीख 31 जुलै 2022 ही आहे. याची सर्व आस्थापनांनी नोंद घ्यावी व हे तिमाही विवरणपत्र विहित मुदतीत ऑनलाईन पद्धतीने सादर करावे व कायद्याचे अनुपालन करून सहकार्य करावे.

प्रत्येक आस्थापनेने आपला नोंदणी (Employer Profile) तपशील देखील आवश्यक ती सर्व माहिती नोंदवून तात्काळ अद्ययावत करावा, यासंदर्भात कोणत्याही स्वरुपाचे सहकार्य अथवा  माहिती आवश्यक असल्यास ई-मेल आयडी chandrapurrojgar@gmail.com /asstdiremp.chandrapur@ese.maharashtra.gov.in यावर तसेच दुरध्वनी क्रमांक 07172-252295 वर आपला उद्योजक नोंदणी क्रमांक व इतर सर्व आवश्यक तपशीलासह संपर्क साधल्यास, आपणांस या कार्यालयाकडून सर्वतोपरी सहकार्य करण्यात येईल, असेही भैय्याजी येरमे यांनी  कळविले आहे.

००००००