रामनवमी शोभायात्रेच्या पार्श्वभुमीवर पालकमंत्र्यांकडून आढावा

 

रामनवमी शोभायात्रेच्या पार्श्वभुमीवर पालकमंत्र्यांकडून आढावा

चंद्रपूर, दि. 31 मार्च : आगामी काळात जिल्ह्यात मोठ्या प्रमाणात सर्वधर्मीय सण उत्सवाचे आयोजन होणार आहे. त्या अनुषंगाने आज (दि.31) राज्याचे आदिवासी विकास मंत्री तथा चंद्रपूर जिल्ह्याचे पालकमंत्री डॉ. अशोक उईके यांनी रामनवमी शोभायात्रेनिमित्त जिल्हा प्रशासन आणि आयोजन समितीचा आढावा घेतला.

जिल्हाधिकारी कार्यालयात आयोजित या बैठकीला जिल्हाधिकारी विनय गौडा जी.सी., मुख्य कार्यकारी अधिकारी विवेक जॉन्सन, जिल्हा पोलिस अधिक्षक मुम्मका सुदर्शन, महानगरपालिका आयुक्त विपीन पालीवाल, निवासी उपजिल्हाधिकारी दगडू कुंभार, अतिरिक्त पोलिस अधिक्षक रिना जनबंधू, उपविभागीय अधिकारी संजय पवार, तहसीलदार विजय पवार, आयोजन समितीचे अध्यक्ष योगेश भंडारी, उपाध्यक्ष डॉ. अशोक जिवतोडे, शैलेश बागला आदी उपस्थित होते.

रामनवमी शोभायात्रेनिमित्त आयोजन समिती आणि जिल्हा प्रशासनामध्ये समन्वय रहावा, या उद्देशाने आजची आढावा बैठक आयोजित करण्यात आली आहे, असे सांगून पालकमंत्री डॉ. उईके म्हणाले, रामनवमी हा उत्सव सर्व भाविकांच्या श्रध्देचा आणि भावनेचा विषय आहे. त्यामुळे जिल्हा प्रशासनाचे यासाठी संपूर्ण सहकार्य राहील. अतिशय उत्साहात आणि आनंदात रामनवमी साजरी करावी. रॅलीची वेळ वाढवून मिळण्याबाबत विचार-विमर्श करून आणि नियमानुसार निर्णय घेण्यात येईल. शासन – प्रशासनाच्या नियमांचे कुठेही उल्लंघन होणार नाही, याची दक्षता सर्वांनी घेणे आवश्यक आहे, असेही ते म्हणाले.

जिल्हाधिकारी श्री. गौडा म्हणाले, जिल्ह्यात साज-या होणा-या सर्वधर्मीय सणांबाबत नुकतीच जिल्हास्तरीय शांतता समितीची बैठक घेण्यात आली. चंद्रपूर जिल्हा हा शांतताप्रिय जिल्हा म्हणून ओळखला जातो. जिल्ह्याचा हाच लौकिक कायम राहण्यासाठी सर्व संबंधित यंत्रणेला आणि शांतता समितीच्या सदस्यांना सुचना देण्यात आल्या आहेत, असे त्यांनी सांगितले.

मनपा आयुक्त विपीन पालिवाल म्हणाले, शहरातील रस्त्यांची कामे युध्दस्तरावर सुरू असून शोभायात्रेपर्यंत रस्ता वाहतुकीसाठी मजबुत करून दिला जाईल. तसेच फॉगिंग मशीनने रस्त्यावरील धूळ खाली बसण्यासाठी पाण्याचे फवारे मारण्यात येईल. सोबतच रस्त्याची स्वच्छता आदी कामे मपनाने हाती घेतली आहेत.

यावेळी आयोजन समितीच्या सदस्यांनी देखील सुचना केल्या. बैठकीला विश्वास माधशेट्टीवार, रोडमल गहलोत, डॉ.गोपाल मुंधडा, अजय वैरागडे, जीतेन्द्र जोगड़, रविन्द्र गुरुनुले, अमित विश्वास, आशिष मुंधडा, प्रवीण खोब्रागडे, सुहास दानी, विजय डोमलवार, लखनसिंग चंदेल, विवेक होकम आदी उपस्थित होते.

००००००

कोळसा पुनर्वसीत गावाला महसुली दर्जा देण्यासंदर्भात हरकती व सुचना 4 एप्रिलपर्यंत आमंत्रित

               कोळसा पुनर्वसीत गावाला महसुली दर्जा देण्यासंदर्भात हरकती व                                               सुचना 4 एप्रिलपर्यंत आमंत्रित

चंद्रपूर, दि. 28 मार्च : मौजा नवीन कोळसा पुनर्वसीत गावाला महसुली दर्जा देण्याबाबत 19 मार्च 2025 रोजी प्रारुप अधिसुचना प्रसिध्द करण्यात आली आहे. याबाबत कोणाच्या हरकती व सुचना असेल तर त्या 4 एप्रिल 2025 पर्यंत सादर करता येतील.

महाराष्ट्र जमीन महसुल अधिनियम 1966 (सन 1966 चा महाराष्ट्र अधिनियम क्रमांक 41) यांच्या कलम 4 पोटकलम (1) च्या परंतुकाखाली राज्य शासनाने दिलेल्या अधिकारानुसार जिल्हाधिकारी विनय गौडा जी. सी. यांनी मुल तालुक्यातील नवीन कोळसा हे गाव महसुली गाव म्हणून घोषित करण्याकरीता प्रारुप अधिसुचना 19 मार्च रोजी प्रसिध्द केली आहे. याबाबत काही हरकती व सुचना असल्यास त्या 4 एप्रिलपर्यंत सादर कराव्यात, असे जिल्हाधिकारी विनय गौडा यांच्या प्रारुप अधिसुचनेत नमुद आहे.

मुल तालुक्यात 1 गाव वाढल्यामुळे मूल तालुक्यातील गावांची संख्या 113 झाली असून चंद्रपूर तालुक्यातून 1 गाव कमी झाल्यामुळे चंद्रपूर तालुक्यात आता 101 गावे राहतील.

०००००

उपरवाही येथील शाळेला जिल्हाधिका-यांची भेट

 

उपरवाही येथील शाळेला जिल्हाधिका-यांची भेट

Ø विद्यार्थ्यांसोबतही संवाद

चंद्रपूर, दि. 28 मार्च : 100 दिवस कृती आराखडयाअंतर्गत जिल्हास्तरीय अधिकाऱ्यांनी  आठवडयातून किमान दोन दिवस  क्षेत्रीय भेटी दरम्यान केंद्र व राज्य शासनाच्या प्रकल्पांना भेटी देऊन कामाच्या प्रगतीची पाहणी करावी, अशा राज्य शासनाच्या सुचना आहेत. त्या अनुषंगाने जिल्हाधिकारी विनय गौडा जी.सी. यांनी कोरपना तालुक्यातील उपरवाही येथील जि.प.उच्च प्राथमिक शाळेला भेट दिली. तसेच विद्यार्थ्यांसोबत संवाद साधला.

 ‘मुख्यमंत्री माझी, शाळा सुंदर शाळा’ टप्पा-2 सन 2024-25  अंतर्गत जिल्हयात दुसरा क्रमांक मिळाला आहे. या शाळेत नाविन्यपूर्ण ‍विज्ञान व गणित प्रयोगशाळेतुन शिक्षण, इकोक्लब सदस्यामार्फत पर्यावरण जागृती व संरक्षण, मतदान जागृतीसाठी विद्यार्थ्यांचे पथकाद्वारे सादरीकरण, एक भारत श्रेष्ठ भारत अंतर्गत उपक्रम, बाल  वाचनालय नियमित वापर, सावित्रीबाई फुले बचत बँकेच्या माध्यमातुन आर्थिक देवाण घेवाण, विपुल भारत अंतर्गत माता-पालक गटाची स्थापना व गट कार्यरत, आशा व अंगणवाडी सेविका मार्फत किशोर वयीन मुलींना मार्गदर्शन,  निपुण महाराष्ट्र कृती कार्यक्रम राबविण्यात येतात.

यावेळी जिल्हाधिका-यांनी शाळेत सुरु असलेल्या  प्रशंसनीय उपक्रमाबाबत सविस्तर माहिती जाणून घेतली. तसेच विद्यार्थ्यांचे कौतुकसुध्दा केले. भेटी दरम्यान उपविभागीय अधिकारी रविंद्र माने, तहसीलदार पल्लवी आखाडे, संवर्ग विकास अधिकारी, गटशिक्षण अधिकारी  आदी उपस्थित होते.

०००००

अल्पसंख्यांक आयोगाच्या सदस्यांकडून योजनांचा आढावा

 

अल्पसंख्यांक आयोगाच्या सदस्यांकडून योजनांचा आढावा

चंद्रपूर, दि. 28 मार्च : जैन अल्पसंख्यांक आर्थिक विकास महामंडळाचे अध्यक्ष तथा राज्य अल्पसंख्यांक आयोगाचे सदस्य ललित गांधी यांनी अल्पसंख्यांकासाठी राबविण्यात येणा-या विविध योजनांचा जिल्हाधिकारी कार्यालयात आढावा घेतला.

यावेळी निवासी उपजिल्हाधिकारी दगडू कुंभार, जिल्हा नियोजन अधिकारी संजय कडू, महानगर पालिकेचे अतिरिक्त आयुक्त चंदन पाटील, अतिरिक्त मुख्य कार्यकारी अधिकारी मिना साळूंके, शिक्षणाधिकारी (माध्य.) राजेश पाताळे, अश्विनी सोनवणे (प्राथ.) आदी उपस्थित होते.

अल्पसंख्याक शाळांचा दर्जा सुधारण्यासाठी जिल्ह्यातील सर्व अल्पसंख्यांक शाळांची बैठक घ्यावी, असे सांगून ललित गांधी म्हणाले, सरकारतर्फे निधीची तरतूद करण्यात येते, मात्र शाळांचे प्रस्तावच प्राप्त होत नाही. निधीसाठी शाळांचे प्रस्ताव येणे आवश्यक आहे. यात जैन शाळांचासुध्दा समावेश असावा. भद्रावती येथे प्राचीन जैन तीर्थक्षेत्र आहे. चंद्रपूर शहरामध्ये मनपाने जैन कम्युनिटी सेंटरसाठी जागा उपलब्ध करून द्यावी. तसेच जिल्हाधिका-यांच्या अध्यक्षतेखाली अल्पसंख्यांक कल्याण समितीची स्थापना करावी.

येत्या 10 एप्रिल रोजी भगवान महावीर जयंती आहे. या दिवशी सर्व कत्तलखाने बंद ठेवण्याचे आदेश असतात. त्याची जिल्हा प्रशासनाने प्रभावी अंमलबजावणी करून संबंधित यंत्रणेला याबाबत निर्देश द्यावे. यावेळी त्यांनी प्रधानमंत्री रोजगार गॅरंटी योजना आणि मुख्यमंत्री रोजगार गॅरंटी योजनेत अल्पसंख्यांक समाजाच्या सद्यस्थितीबाबत माहिती जाणून घेतली.

सादरीकरणात जिल्हा नियेाजन अधिकारी संजय कडू यांनी प्रधानमंत्री जनविकास कार्यक्रम अंतर्गत संविधान भवन तयार करण्याबाबतची सद्यस्थिती, निंबाळा येथे नवीन उपकेंद्र बांधकाम करणे, डॉ. झाकिर हुसेन मदरसा आधुनिकीकरण योजना, अल्पसंख्यांक समाजातील उच्च शिक्षण घेणा-या मुलींकरीता वसतीगृहे, अल्पसंख्याक  बहुल नागरी क्षेत्र विकास कार्यक्रम आदींची माहिती दिली.

००००००

अग्निशमन दलातील जवानांना फायर प्रॉक्झिमिटी सुटचे वितरण

 

अग्निशमन दलातील जवानांना फायर प्रॉक्झिमिटी सुटचे वितरण

चंद्रपूर, दि. 28 मार्च : राज्य आपत्ती व्यवस्थापन प्राधिकरण व जिल्हा आपत्ती व्यवस्थापन प्राधिकरण यांच्या संयुक्त विद्यमानाने चंद्रपूर जिल्ह्यातील नगर परिषद व नगर पंचायत येथे कार्यरत असलेल्या अग्निशमन दलातील जवानांना जिल्हाधिकारी तथा जिल्हा आपत्ती व्यवस्थापन प्राधिकरणचे अध्यक्ष विनय गौडा जी.सी. यांच्या हस्ते फायर प्रॉक्झिमिटी सूट ( fire proximity suit ) चे वितरण करण्यात आले.

यावेळी निवासी उपजिल्हाधिकारी दगडू कुंभार, नगर प्रशासन अधिकारी डॉ. विद्या गायकवाड, जिल्हा आपत्ती व्यवस्थापन अधिकारी सलीम शेख, तसेच ब्रम्हपूरी, वरोरा, बल्लारपूर, राजुरा, भद्रावती, चिमूर येथील नगर परिषदांचे मुख्याधिकारी उपस्थित होते. यावेळी जिल्हाधिकारी यांनी अग्निशमन दलाच्या जवानांच्या कामाचे कौतुक केले व पुढील कार्यास शुभेच्छा दिल्या.

काय आहे फायर प्रॉक्झिमिटी सूट : हे अग्निशामक आणि इतर धोक्याच्या परिस्थितीत काम करणाऱ्या व्यक्तींना उच्च तापमानापासून आणि ज्वालांपासून संरक्षण करण्यासाठी डिझाइन केलेले विशेष सुरक्षा उपकरण आहे, ज्याला चांदीचा बंकर सूट असेही म्हणतात.

फायर प्रॉक्सिमिटी सूटचे उपयोग

अग्निशामकांना संरक्षण : अग्निशामक (firefighter) आग विझवण्याच्या कामात थेट ज्वालांच्या संपर्कात येतात, अशा स्थितीत त्यांना या सूटमुळे उष्णतेपासून आणि जाळणाऱ्या पदार्थांपासून संरक्षण मिळते.

धोकादायक परिस्थितीत काम करणाऱ्यांना संरक्षण : ज्वालामुखीशास्त्रज्ञ, औद्योगिक कामगार आणि इतर धोक्याच्या परिस्थितीत काम करणाऱ्यांना या सूटमुळे उष्णता आणि ज्वालांपासून संरक्षण मिळते.

विमान बचाव आणि अग्निशमन (ARFF) मध्ये वापर : विमान बचाव आणि अग्निशमन (ARFF) मध्ये, ≈500 °F (260 °C) पर्यंत वातावरणीय उष्णता संरक्षण प्रदान करण्यासाठी प्रॉक्सिमिटी सूट वापरले जातात.

आगीत अडकलेल्या लोकांना मदत : अग्निशामक या सूटचा वापर करून आगीत अडकलेल्या लोकांना सुरक्षितपणे बाहेर काढू शकतात.

हा सूट अग्निशमन जवानांना कोणत्याही फ्लेशओव्हरपासून अर्थात आगीच्या ज्वालांपासून वाचवेल. या सूटचे सर्व भाग युरोपीयन मानकांनुसार प्रमाणित करण्यात आले आहेत. सूटमध्ये जॅकेट, पॅन्ट हुड, हातमोजे, हेल्मेट आणि बूट यांचा समावेश आहे.

००००००

29 मार्च रोजी मृद व जलसंधारण मंत्री संजय राठोड चंद्रपूर जिल्ह्याच्या दौ-यावर

 

  29 मार्च रोजी मृद व जलसंधारण मंत्री संजय राठोड

चंद्रपूर जिल्ह्याच्या दौ-यावर

चंद्रपूर, दि. 28 मार्च : राज्याचे मृद व जलसंधारण मंत्री तथा यवतमाळ जिल्ह्याचे पालकमंत्री संजय राठोड हे 29 मार्च 2025 रोजी चंद्रपूर जिल्ह्याच्या दौ-यावर येत आहेत. त्यांचा दौरा कार्यक्रम पुढीलप्रमाणे आहे.

29 मार्च रोजी सकाळी 11.45 वाजता पाटण, ता. जिवती येथे आगमन व शासकीय आश्रमशाळा येथे आयोजित जगदगुरू सेवालाल महाराज जिल्हास्तरीय जयंती व भव्य सत्कार सोहळ्याला उपस्थिती, दुपारी 2.15 वाजता चंद्रपूर हेलीपॅड येथे आगमन, दुपारी 2.30 वाजता जिल्हाधिकारी कार्यालय येथे मृद व जलसंधारण विभागाच्या आढावा बैठकीस उपस्थिती, दुपारी 3.15 वाजता शासकीय विश्रामगृह येथे पक्षाच्या पदाधिका-यांची बैठक, दुपारी 4 वाजता वणीकडे प्रयाण.

०००००

ग्रामीण स्वयं रोजगार प्रशिक्षण संस्थेतर्फे मोफत प्रशिक्षण

 ग्रामीण स्वयं रोजगार प्रशिक्षण संस्थेतर्फे मोफत प्रशिक्षण

           चंद्रपूर, दि. 28 मार्च : बॅंक ऑफ इंडिया ग्रामीण स्वयं रोजगार प्रशिक्षण संस्थेतर्फे बाबुपेठ येथील जुने डी.एड. कॉलेज जवळ 2 एप्रिल पासून 30 दिवसांकरीता ग्रामिण भागातील युवकांसाठी  घरगुती वायरिंग आणि उपकरणे हे निवासी मोफत प्रशिक्षण तसेच दि. 3 एप्रिल पासून 10 दिवसाकरिता मशरुमची शेती या निवासी मोफत प्रशिक्षणाचे आयोजन करण्यात येत आहे. सदर प्रशिक्षण घेणा-यांचे वय 18 ते 45 असावे.  तसेच या प्रशिक्षणामध्ये व्यवसायातील अनुभवी व्यक्तींना सुध्दा प्राधान्य देण्यात येईल.

प्रशिक्षणासाठी उमेदवारांनी  11 ते 5 वाजेपर्यंत बॅंक ऑफ इंडिया ग्रामीण स्वयं रोजगार प्रशिक्षण संस्था, चंद्रपूर येथील अनुप कासवटे (मो.क्र. 8421009602) आणि अक्षय लांजेकर (मो. क्र. 9021913751) यांच्याशी संपर्क करावा व आपले नाव नोंदणी करून प्रशिक्षणाचा लाभ घ्यावा, असे आवाहन आरसेटीचे संचालक यांनी केले आहे.

०००००

ॲग्रीगेटर व प्लॅटफॅार्म वर्कर नोंदणी

ॲग्रीगेटर व प्लॅटफॅार्म वर्कर नोंदणी

चंद्रपूर, दि. 28 मार्च :  कामगार आणि रोजगार मंत्रालयाने 26 ऑगस्ट 2021 रोजी देशातील असंघटीत /  स्थलांतरित कामगारांना युनिव्हर्सल अकाऊंट नंबर (UAN) देऊन त्यांची नोंदणी करण्यासाठी ई -श्रम पोर्टल सुरु केले आहे. यामुळे ई श्रम पोर्टलवर नोंदीत झालेल्या असंघटीत /स्थलांतरित कामगारांना विविध सामाजिक सुरक्षा योजना एकाच ठिकाणी मिळण्यास मदत होणार आहे.

         देशातील लाखो कर्मचारी प्लॅटफॅार्म अर्थव्यवस्थेत काम करत आहेत, ही बाब लक्षात घेऊन केंद्र सरकारच्या कामगार आणि रोजगार मंत्रालयाने ई- श्रम पोर्टलवर प्लॅटफॅार्म  कामगारांची व गिग कामगारांची नोंदणी करण्याचा निर्णय घेतलेला आहे व तशी नोंदणीची  सुविधा ई-श्रम पोर्टलवर उपलब्ध करण्यात आलेली आहे. प्लॅटफॅार्म कामगाराने ई- श्रम पोर्टलवर नोंदणी केल्यास त्यांचा विविध कल्याणकारी योजनेत समावेश होईल.               

ॲग्रीगेटर सेवांमध्ये राईड शेअरिंग सेवा, अन्न आणि किराणा माल वितरण  सेवा,  लॉजिस्टिक सेवा, वस्तु आणि /किंवा सेवांच्या घाऊक /किरकोळ विक्रीसाठी ई -मार्केट ठिकाण,  व्यावसायिक सेवा प्रदाता, आरोग्यसेवा,  प्रवास आणि आदरातिथ्य, सामग्री आणि मिडिया सेवा, इतर कोणतीही वस्तु आणि सेवा प्रदाता प्लॅटफॉर्म यांचा समावेश आहे.

           वर नमूद क्षेत्रातील  एग्रीगेटर यांनी ई- श्रम पोर्टलवर (www.eshram.gov.in) नोंदणी  (OnBoard) करण्याच्या सूचना विकास आयुक्त (असंघटीत कामगार) यांनी दिल्या आहेत. चंद्रपूर जिल्हयात वर नमूद कार्यक्षेत्रात कार्यरत असलेल्या एग्रीगेटर यांनी ई-श्रम पोर्टलवर आपली नोंदणी 31 मार्च 2025 पूर्वी करावी,  असे आवाहन सहायक कामगार आयुक्त, चंद्रपूर यांनी केले आहे.

०००००

सर्वधर्मीय सण अतिशय आनंदाने साजरे करा जिल्हाधिकाऱ्यांचे नागरिकांना आवाहन

 

सर्वधर्मीय सण अतिशय आनंदाने साजरे करा जिल्हाधिकाऱ्यांचे नागरिकांना आवाहन

Ø जिल्हास्तरीय शांतता समितीची बैठक

चंद्रपूर, दि. 27 मार्च : चंद्रपूर हा शांतताप्रिय जिल्हा आहे. जिल्ह्याचा हा लौकिक कायम ठेवणे, ही आपल्या सर्वांची जबाबदारी आहे. आगामी काळात गुढीपाडवा, रमजान ईद, श्रीराम नवमी, महाकाली यात्रा, हनुमान जयंती, महावीर जयंती, डॉ. बाबासाहेब आंबेडकर जयंती, गुड फ्रायडे आदी सण साजरे होणार आहे. हे सर्व सण अतिशय आनंदाने आणि शांततेत साजरे करावे, असे आवाहन जिल्हाधिकारी विनय गौडा जी.सी. यांनी केले.

जिल्हा प्रशासन व पोलिस प्रशासनाच्या वतीने जिल्हास्तरीय शांतता समितीच्या बैठकीत ते बोलत होते. यावेळी जिल्हा पोलिस अधीक्षक मुम्मका सुदर्शन,  महानगरपालिका आयुक्त विपीन पालीवाल, अतिरिक्त पोलिस अधीक्षक रिना जनबंधू, सहाय्यक पोलिस अधीक्षक नियोमी साटम, निवासी उपजिल्हाधिकारी दगडू कुंभार आदी उपस्थित होते.

सर्वधर्मीय सण साजरे करताना प्रत्येकाने प्रशासनाच्या सूचनांचे पालन करावे, असे सांगून जिल्हाधिकारी श्री. गौडा म्हणाले, प्रत्येकाला आपले धार्मिक सण साजरे करण्याचा अधिकार भारतीय राज्यघटनेने दिला आहे. मात्र सण साजरे करताना इतरांना त्रास होऊ नये, याची काळजी सुद्धा घ्यावी. नागपूर घटनेच्या पार्श्वभूमीवर चंद्रपूर जिल्ह्यात कोणतीही अनुचित घटना होणार नाही, यासाठी सर्वांनी सतर्क रहावे. गल्ली, मोहल्ला, सोसायटी येथील सर्वांना शांततेचे महत्व समजून सांगावे. सोशल मीडियाचा वापर हा चांगला आणि वाईटसुद्धा होऊ शकतो. प्रत्येकाने जबाबदारीने सोशल मीडियाचा वापर करावा. आक्षेपार्ह पोस्ट टाकणारा हा कदाचित जिल्हा, राज्य किंवा देशाबाहेरचा सुद्धा राहू शकतो. मात्र अशा पोस्टमुळे आपल्या जिल्ह्यात काही दुष्परिणाम होणार नाही, याची सर्वांनी काळजी घ्यावी. आपापल्या ग्रुपमध्ये सर्वांनी सतर्क राहून प्रशासनाला सहकार्य करावे, असे आवाहन जिल्हाधिकारी विनय गौडा यांनी केले.

जिल्हा प्रशासनाचे नियम पाळा - पोलीस अधीक्षक सुदर्शन

पोलिस अधीक्षक श्री. सुदर्शन म्हणाले, चंद्रपूर जिल्हा हा शांततेसाठी ओळखला जातो. सर्वधर्मीय सण साजरे करताना येथील गुन्ह्यांची संख्या नगण्य आहे. नागपूरच्या घटनेवर जिल्हा पोलिस प्रशासन अतिशय अलर्ट असून जागोजागी बैठकांचे सत्र सुरू आहे. आपल्या परिसरात युवकांना सोशल मीडियाचे दुष्परिणाम समजून सांगावे. बऱ्याचशा पालकांना आपली मुलं सोशल मीडियावर काय करतात, याची कल्पना नसते. त्यामुळेच जिल्हा पोलिस प्रशासनाच्या वतीने विविध जनजागृती  उपक्रम सुरू आहे. जिल्हा प्रशासनाचे नियम सर्वांनी पाळावेत  व प्रशासनाला सहकार्य करावे. कोणीही कायदा हातात घेऊ नये, असे आवाहन जिल्हा पोलिस अधीक्षक श्री. सुदर्शन यांनी केले.

मनपा आयुक्त विपीन पालीवाल म्हणाले, सदस्यांच्या सूचनेनुसार सर्वधर्मीय सणांमध्ये पाणीपुरवठा नियमित होणार आहे. रामनवमीच्या दिवशी शहरातील संडे मार्केट बंद राहील. तसेच महाकाली यात्रेपूर्वी शहरातील  रस्ते चांगले होणार असून रस्त्यांची कामे युद्धपातळीवर सुरू आहे, असे त्यांनी सांगितले.

अशा आहेत नागरिकांच्या सूचना -  सणानिमित्त शहरातील पाणीपुरवठा नियमित व्हावा, सण साजरे करताना इतर धर्मीयांच्या भावना दुखावू नये याची सर्वांनी काळजी घ्यावी, सोशल मीडियावरील अफवांवर विश्वास ठेवू नये, आक्षेपार्ह पोस्टवर नियंत्रण ठेवावे, शहरातील रस्त्यांची कामे त्वरित पूर्ण करावी, अवैध धंद्यांना आळा घालावा, मिरवणुकीचे आयोजन करणाऱ्या प्रमुख प्रतिनिधींची जिल्हा प्रशासनाने बैठक घ्यावी.

 

कार्यक्रमाचे प्रास्ताविक उपविभागीय पोलीस अधिकारी सुधाकर यादव यांनी केले. आभार पोलिस निरीक्षक योगेश पारधी यांनी मानले. बैठकीला उपविभागीय पोलिस अधिकारी, पोलिस निरीक्षक, पोलिस पाटील, दक्षता समितीचे सदस्य व जिल्हास्तरीय शांतता समितीचे सदस्य उपस्थित होते.

००००००

जिल्हाधिकाऱ्यांकडून जिवती तालुक्यातील विकास कामांची पाहणी

जिल्हाधिकाऱ्यांकडून जिवती तालुक्यातील विकास कामांची पाहणी

चंद्रपूर, दि. 27 मार्च :   100 दिवस कृती आराखडया अंतर्गत जिल्हास्तरीय अधिकारी यांनी आठवड्यातून किमान दोन दिवस  क्षेत्रीय भेटी दरम्यान केंद्र व राज्य शासनाच्या प्रकल्पांना भेटी देवून कामाच्या प्रगतिची पाहणी करावी, अशा राज्य शासनाच्या सुचना आहेत. त्या अनुषंगाने  जिल्हाधिकारी  विनय गौडा जी.सी. यांनी जिवती तालुक्यातील मौजा पिट्टीगुडा येथील नॅडेप बंधारा खोलीकरण प्रकल्पाची पाहणी केली,  पिट्टीगुडा येथील ऑक्सीजन पार्क येथे  जिल्हाधिकाऱ्यांच्या हस्ते वृक्षारोपण करून  उपस्थित नागरिकांशी संवाद साधला. तसेच नागरिकांनी सांगितलेल्या   समस्यांची तात्काळ दखल घेवून त्यांचे निराकरण करण्याच्या सुचना संबंधित यंत्रणेला दिल्या.

यावेळी राजुऱ्याचे उपविभागीय अधिकारी  रविंद्र माने, तहसिलदार रुपाली मोगरकर, सहा. गटविकास अधिकारी  दोडके, पिट्टीगुडयाचे सरपंच बाबुराव काशिराम पवार व गावातील नागरिक उपस्थित होते.

तसेच यावेळी जिल्हाधिकारी यांनी जिवती तालुक्यातील 365 दिवस चालणारी जि.प. उच्च प्राथमिक शाळा, पालडोह येथे भेट देवून  विद्यार्थ्यांच्या शैक्षणिक प्रगतीचा आढावा घेतला. शाळेचे  मुख्याध्यापक श्री. परतेकी यांच्या कामाची प्रशंसा केली. शाळकरी विद्यार्थ्यांनी दिव्यांका हिने जिल्हाधिकारी यांची मुलाखत घेतली. यावेळी जिल्हाधिकारी यांनी मौजा शेणगाव येथिल आदर्श शाळा बांधकामाची पाहणी केली. पाहणीदरम्यान शाळेचे बांधकाम एक वर्षात पूर्ण करणेबाबत अधिकाऱ्यांना सुचना दिल्या.

००००००

भारत निर्वाचन आयोगतर्फे प्रथमच एका लाखापेक्षा जास्त मतदान केंद्रस्तरीय अधिकाऱ्यांसाठी प्रशिक्षण सुरू

 भारत निर्वाचन आयोगतर्फे प्रथमच एका लाखापेक्षा जास्त मतदान केंद्रस्तरीय अधिकाऱ्यांसाठी  प्रशिक्षण सुरू

Ø  बिहार, पश्चिम बंगाल आणि आसाम येथील मतदान केंद्रस्तरीय अधिकाऱ्यांची पहिली तुकडी IIIDEM मध्ये दोन दिवसीय प्रशिक्षण कार्यक्रमात सहभागी

Ø  तळागाळातील क्षेत्रीय स्तरावर कार्यरत असलेल्या निवडणूक अधिकाऱ्यांसाठी सातत्यपूर्ण, व्यावहारिक आणि परिस्थितीनुसार आधारित प्रशिक्षण

Ø प्रशिक्षित मतदान केंद्रस्तरीय अधिकाऱ्यांना विधानसभा मतदारसंघ स्तरावर मास्टर ट्रेनर म्हणून नियुक्त केले जाईल.

मुंबई, दि. 27 :  मुख्य निवडणूक आयुक्त ज्ञानेश कुमार यांनी आज निवडणूक आयुक्त डॉ. विवेक जोशी यांच्या उपस्थितीत नवी दिल्ली येथील भारतीय आंतरराष्ट्रीय लोकशाही व निवडणूक व्यवस्थापन संस्था (IIIDEM) येथे प्रथमच होणाऱ्या मतदान केंद्रस्तरीय अधिकारी (BLO) यांच्या प्रशिक्षण कार्यक्रमाचे उद्घाटन केले. येत्या काही वर्षांत अशा प्रशिक्षण कार्यक्रमांद्वारे दर 10 मतदान केंद्रांसाठी एक मतदान केंद्रस्तरीय अधिकारी या प्रमाणात एकूण 1 लाखाहून अधिक मतदान केंद्रस्तरीय अधिका-यांना प्रशिक्षित केले जाईल. हे प्रशिक्षित मतदान केंद्रस्तरीय अधिकारी – जे 100 कोटी मतदार आणि आयोग यांच्यातील प्रथम व सर्वांत महत्त्वाचा दुवा आहेत – विधानसभा मतदारसंघस्तरावरील मास्टर प्रशिक्षक (ALMT) यांचा गट तयार करून देशभरातील मतदान केंद्रस्तरीय अधिका-यांचे नेटवर्क मजबूत करतील.

या क्षमता बांधणीचा प्रशिक्षण कार्यक्रम टप्प्याटप्प्याने सुरु राहील. प्रथम टप्प्यात निवडणूक होणाऱ्या राज्यांवर भर दिला जाईल. सध्या बिहार, पश्चिम बंगाल आणि आसाम येथील 109 मतदान केंद्रस्तरीय अधिकारी तसेच बिहार, पश्चिम बंगाल, आसाम, केरळ, पुद्दुचेरी आणि तामिळनाडू येथील 24 मतदार नोंदणी अधिकारी आणि 13 जिल्हा निवडणूक अधिकारी हे या दोन दिवसीय निवासी प्रशिक्षण कार्यक्रमात सहभागी झालेले आहेत.

या प्रशिक्षणाचा मुख्य उद्देश मतदान केंद्रस्तरीय अधिकारी यांना लोक प्रतिनिधित्व अधिनियम 1950, मतदार नोंदणी नियम 1960 आणि भारत निवडणूक आयोगाने वेळोवेळी जारी केलेल्या मार्गदर्शक तत्त्वांनुसार त्यांच्या जबाबदाऱ्या समजावून सांगणे आणि मतदार यादी त्रुटीविरहित ठेवण्याच्या प्रक्रियेबद्दल मार्गदर्शन करणे हा आहे. तसेच, या प्रशिक्षणामध्ये मतदान केंद्रस्तरीय अधिकारी यांना त्यांच्या कार्यासाठी उपयुक्त आयटी प्रणालींची माहिती दिली जाईल.

मतदान केंद्रस्तरीय अधिकारी हे राज्य सरकारी कर्मचारी असतात, ज्यांची नियुक्ती मतदार  नोंदणी अधिकारी (ERO) द्वारे जिल्हा निवडणूक अधिकाऱ्यांच्या (DEO) मंजुरीनंतर केली जाते. मतदार यादी त्रुटीविरहित ठेवण्यास मतदार  नोंदणी अधिकारी आणि मतदान केंद्रस्तरीय अधिकारी यांची भूमिका महत्त्वाची असल्याचे सांगून मुख्य निवडणूक आयुक्त श्री. ज्ञानेश कुमार यांनी राज्य सरकारांनी मतदार  नोंदणी अधिकारी म्हणून SDM स्तरावरील किंवा समकक्ष अधिकाऱ्यांची नियुक्ती करावी आणि मतदान केंद्राच्या कार्यक्षेत्रात राहणाऱ्या अधिकाऱ्यांना मतदान केंद्रस्तरीय अधिकारी म्हणून नियुक्त करण्यावर विचार करावा, असे सांगितले.

मुख्य निवडणूक आयुक्तांनी असेही सांगितले की, भारतीय संविधानाच्या अनुच्छेद 326 आणि लोक प्रतिनिधित्व अधिनियम 1950 च्या कलम 20 नुसार, 18 वर्षे पूर्ण झालेले आणि संबंधित मतदान केंद्राच्या क्षेत्राचे सामान्य रहिवासी असतील असे भारतीय  नागरिक हे मतदार होऊ शकतात.

तसेच, मुख्य निवडणूक अधिकारी, जिल्हा निवडणूक अधिकारी आणि मतदार नोंदणी अधिकाऱ्यांना त्यांच्या क्षेत्रातील मतदार याद्यांचे अद्यतन करण्यासाठी सर्वपक्षीय बैठकांचे आयोजन करण्याच्या सूचना दिलेल्या आहेत.

याशिवाय, मतदान केंद्रस्तरीय अधिकारी किंवा मतदार नोंदणी अधिकारी यांच्या विरोधात कोणतीही तक्रार प्राप्त झाल्यास कठोर कारवाई केली जाईल, असा इशारा देत, मतदान केंद्रस्तरीय अधिकारी यांना घरोघरी जाऊन मतदारांशी संवाद साधताना सौम्य आणि सभ्य वर्तन ठेवण्यास सांगितले.

मुख्य निवडणूक आयुक्तांनी स्पष्ट केले की, भारतीय निवडणूक आयोग नेहमीच भारताच्या 100 कोटी मतदारांसोबत राहील, असे भारत निवडणूक आयोगाकडून एका प्रसिद्धी पत्रकाद्वारे कळविले आहे.

००००००

राज्यस्तरीय समितीमध्ये चंद्रपूर जिल्हाधिकाऱ्यांचा समावेश

 

राज्यस्तरीय समितीमध्ये चंद्रपूर जिल्हाधिकाऱ्यांचा समावेश

Ø महसूल अधिकाऱ्यांची कार्यविषयक नियमपुस्तिका

चंद्रपूर, दि. 25 मार्च : महाराष्ट्र जमीन महसूल संहिता 1966 अंतर्गत जिल्हाधिकारी, प्रांत अधिकारी व तहसीलदार यांच्या कार्याविषयक नियमपुस्तिका तयार करण्याकरिता विभागीय आयुक्त कोकण यांच्या अध्यक्षतेखाली समिती गठित करण्यात आली आहे. या समितीमध्ये सदस्य म्हणून चंद्रपूरचे जिल्हाधिकारी विनय गौडा जी.सी. यांचा समावेश करण्यात आला आहे.

यापूर्वी 18 फेब्रुवारी 2025 रोजीच्या शासन निर्णयानुसार गठीत समितीमध्ये यवतमाळ जिल्हाधिकारी ऐवजी अहिल्यानगर जिल्हाधिकारी असा बदल करण्यात आला असून चंद्रपूर आणि नांदेड जिल्हाधिका-यांचा नव्याने समावेश करण्यात आला आहे. याबाबतचे सुधारीत शुध्दीपत्रक आज 25 मार्च 2025 रोजी निर्गमित करण्यात आले. महाराष्ट्र जमीन महसूल संहिता 1966 अंतर्गत जिल्हाधिकारी, प्रांत अधिकारी, तहसीलदार यांची कार्यविषयक नियमपुस्तिका तयार करण्याबाबत गठीत समितीचे अध्यक्ष हे कोकण विभागाचे विभागीय आयुक्त असून सदस्य सचिव म्हणून कोकण विभागाचे उप आयुक्त (महसूल) हे आहेत. इतर सदस्यांमध्ये जिल्हाधिकारी चंद्रपूर, अहिल्यानगर, जालना, जळगाव, नांदेड यांचा समावेश आहे.

गठीत करण्यात आलेल्या समितीने महाराष्ट्र जमीन महसूल संहिता 1966 व त्या अनुषंगिक महसूल विषयक योजना / धोरणे इत्यादींचा अभ्यास करून शासनास तीन महिन्यात शिफारस करण्याचा निर्णय घेण्यात आला आहे.

००००००

दिव्यांग व 65 वर्षांवरील नागरिकांना मिळणार सहायक उपकरण

 

दिव्यांग व 65 वर्षांवरील नागरिकांना मिळणार सहायक उपकरण

Ø 27, 28 व 29 मार्च रोजी प्राथमिक तपासणी शिबीर

चंद्रपूर, दि. 25 मार्च : भारतीय कृत्रिम अंग निर्माण निगम (एलिम्को) यांच्या माध्यमातून वरोरा व राजुरा येथे दिव्यांग व 65 वर्षांवरील व्यक्तिंचे प्राथमिक तपासणी शिबिर आयोजित करण्यात आले आहे. सीएमपीडीआय यांच्या सामाजिक दायित्व निधीमधून दिव्यांग व 65 वर्षावरील वृद्ध व्यक्तींसाठी लागणारे सहाय्यक उपकरण वितरण करण्याकरिता 27 व 28 मार्च 2025 रोजी महारोगी सेवा समिती परिसर, आनंदवन, ता. वरोरा येथे तर 29 मार्च रोजी महात्मा ज्योतिबा फुले विद्यालय व ज्यु. कॉलेज राजुरा येथे सकाळी 11 ते ‍दुपारी 4 या वेळेत प्राथमिक तपासणी शिबीर होणार आहे. सदर शिबिरामध्ये जिल्ह्यातील दिव्यांग व 65 वर्षावरील वृद्ध व्यक्तिंनी नमुद कागदपत्रे घेवून सहभागी व्हावे.

लागणारे आवश्यक कागदपत्रे खालीलप्रमाणे आहेत : 1.  किमान 40 टक्के किंवा त्यापेक्षा जास्त टक्के असलेले यु.डी.आय.डी. दिव्यांग प्रमाणपत्र. 2.  आधार कार्ड (जन्म तारीख नोंद असलेले) 3.  उत्पन्न दाखला (सरपंच/ तलाठी/ तहसिलदार यांनी दिलेला) 4.  राशन कार्ड 5.  मोबाईल क्रमांक

००००००