वरोरा येथे दिव्यांग मतदार जनजागृती रॅली

चंद्रपूर, दि. १2 ऑक्टोबर- चंद्रपूर जिल्हा परिषद समाज कल्याण विभागातर्फे दिव्यांग मतदार जनजागृती रॅलीचे आयोजन ११ ऑक्टोबर २०१९ रोजी वरोरा येथील तहसील कार्यालय ते आंबेडकर चौकापर्यंत करण्यात आले होते.

रॅलीत आनंदवनातील संधिनिकेतन अपंगांची कर्मशाळा, आनंद मूकबधिर विद्यालय, आनंद अंध विद्यालय,  येथील दिव्यांग विद्यार्थ्यांनी तसेच अनुदानित वसतिगृहातील  विद्यार्थ्यांनीसहभाग नोंदविला. सुमारे 500 च्या संख्येने उपस्थित विद्यार्थ्यांनी वरोरा येथील नागरिकांना सुदृढ लोकशाही करीता शत प्रतिशत मतदान किती आवश्यक आहे हे पटवून दिले.  तसेच निवडणूक आयोग यांचे निर्देशानुसार दिव्यांग व्यक्तीकरिता मतदान केंद्रावर उपलब्ध सोयी सुविधाबाबत जागृतीपर पथनाट्य आनंदवनातील दिव्यांग विद्यार्थांनी सादर केले व उपस्थितांची मने जिंकली

 सदर रॅलीचे आयोजन जिल्हा समाज कल्याण अधिकारी सुनील जाधव, तहसिलदार सचिन गोसावी, वरोरा व मुख्याधिकारी श्री. बल्लाळ, मुख्याध्यापक सोपान हंगे, श्री. बांगडकर, व्यवस्थापकीय अधीक्षक रवींद्र नालगीनटवार यांची प्रमुख उपस्थिती होती. या रॅलीची सांगता आंबेडकर चौकात झाली. उपस्थित दिव्यांग बांधवांना मार्गदर्शन करण्यात आले. या  कार्यक्रमाकरीता सर्व शाळेचे मुख्याध्यापक, व्यवस्थापकीय अधीक्षक, सर्व शिक्षक व सर्व कर्मचारी यांनी विशेष मेहनत घेतली.

00000