शासकीय धोरणांना प्रसारमाध्यमांनी व्यापक प्रसिद्धी द्यावी - संचालक डॉ. गणेश मुळे

 शासकीय धोरणांना प्रसारमाध्यमांनी व्यापक प्रसिद्धी द्यावी - संचालक डॉ. गणेश मुळे

Ø माहिती कार्यालयात पत्रकारांशी संवाद

चंद्रपूर, दि. 21 : महाराष्ट्र सरकारने राज्याच्या भविष्यातील विकासाचा रोडमॅप तयार केला असून विविध विभागांसाठी पहिल्या 100 दिवसांचा आराखडा तयार केला आहे. तसेच नागरिकांना जलदगतीने आणि वेळेत शासकीय योजनांचा लाभ मिळण्यासाठी शासकीय विभागांनी सात कलमी कृती कार्यक्रमाची प्रभावी अंमलबजावणी करावी, अशा सुचना देण्यात आल्या आहेत. राज्य सरकारतर्फे राबविण्यात येणारी ही शासकीय ध्येयधोरणे तळागाळातील नागरिकांपर्यंत पोहचविण्यासाठी प्रसारमाध्यम हे प्रभावी शस्त्र आहे. त्यामुळे या धोरणांना प्रसारमाध्यमांनी व्यापक प्रसिध्दी द्यावी, असे आवाहन माहिती व जनसंपर्क महासंचालनालय, नागपूर – अमरावती विभागाचे संचालक डॉ. गणेश मुळे यांनी केले.

जिल्हा माहिती कार्यालय, चंद्रपूर येथे पत्रकारांशी संवाद साधतांना ते बोलत होते. संचालक डॉ. मुळे म्हणाले, राज्य सरकारने अनेक विकासकामे हाती घेतली आहेत. सामान्य लोकांना शासनाच्या सेवा वेळेत आणि तत्परतेने मिळाव्यात, यासाठी देखील पाऊले उचलली आहेत. या योजना शेवटच्या घटकांपर्यंत पोहचविणे आवश्यक आहे. यासाठी प्रसारमाध्यमांची भुमिका महत्वाची आहे. पहिल्या 100 दिवसांत नागपूर विभागातसुध्दा माहिती व जनसंपर्क महासंचालनालयातर्फे आराखडा तयार करण्यात आला आहे. यात विदर्भातील संपूर्ण 11 जिल्ह्यांची माहिती एका क्लिकवर उपलब्ध होणार आहे. कृत्रिम बुध्दिमत्तेचा (आर्टिफिशल इंटलिजन्स) वापर करून अधिक जलद गतीने नागरिकांपर्यंत पोहचण्याचा आमचा मानस आहे. त्यासाठी प्रसारमाध्यमात कार्यरत असणा-या पत्रकारांसाठी आर्टिशिल इंटलिजन्सचे प्रशिक्षणसुध्दा घेण्यात येईल, असे त्यांनी सांगितले.

यावेळी जिल्हा माहिती अधिकारी राजेश येसनकर, पत्रकार रविंद्र जुनारकर, संजय रामगिरवार, प्रमोद उंदिरवाडे, अरुणकुमार सहाय, हरविंदरसिंग धुन्ना, यशवंत दाचेवार, मुरलीमनोहर व्यास, कल्पना पलीकुंडवार, सुनील तिवारी, अनिल देठे, राजेश सोलापन, डॉ. आरती दाचेवार, वैभव पलीकुंडवार, रवी नागपुरे आदी उपस्थित होते.

जिल्हाधिका-यांशी चर्चा : तत्पुर्वी संचालक डॉ. गणेश मुळे यांनी जिल्हाधिकारी विनय गौडा जी.सी. यांची भेट घेतली. शासनाने दिलेल्या निर्देशानुसार पहिल्या 100 दिवसांच्या आराखड्याच्या अंमलबजावणीकरीता माहिती व जनसंपर्क महासंचालनालय कटिबध्द असून सर्व जिल्ह्यांची माहिती आता एका क्लिकवर उपलब्ध होईल, याबाबत जिल्हा‍धिका-यांना अवगत केले.

००००००

आदिवासी युवक-युवतीं व महिलांना रोजगार व स्वयंरोजगाराचे मार्गदर्शन

 

आदिवासी युवक-युवतीं व महिलांना रोजगार व स्वयंरोजगाराचे मार्गदर्शन

चंद्रपूर, दि. 20 : एकात्मिक आदिवासी विकास प्रकल्प कार्यालय, चंद्रपूर अंतर्गत 10 तालुक्यातील सुशिक्षित, होतकरु बेरोजगार, युवक-युवती व महिलांना रोजगार तसेच स्वयंरोजगारासाठी शासनाच्या विविध योजना, योजनेच्या अटी व शर्ती तसेच तांत्रिक बाबींवर तज्ञांमार्फत मार्गदर्शन करण्यात आले. जिल्हा उद्योग केंद्र व जिल्हा अग्रणी बँक यांच्या संयुक्त विद्यमाने सदर मार्गदर्शन मेळाव्याचे आयोजन करण्यात आले होते.

यावेळी एकात्मिक आदिवासी विकास प्रकल्प कार्यालयाचे प्रकल्प अधिकारी विकास राचेलवार, जिल्हा उद्योग केंद्राचे जनरल मॅनेजर ऋतुराज सुर्या, जिल्हा अग्रणी बँकेचे व्यवस्थापक राजु नंदनवार, पंजाब नॅशनल बँकेचे मुख्य प्रबंधक कुमारील आदित्य, बँक ऑफ महाराष्ट्रचे जिल्हा समन्वयक पंकज भैसारे, स्टेट बँक ऑफ इंडियाचे उपप्रबंधक विवेक येसेकर, इंडस्ट्रियल इंस्पेक्टर शालु घरत आदींची उपस्थिती होती.

 प्रकल्प अधिकारी विकास राचेलवार यांच्या मार्गदर्शनात प्रथमच स्वयंरोजगारांना मार्गदर्शन करण्यासाठी बँक प्रमुख व उद्योग केंद्रांना एकाच व्यासपीठावर आणत आदिवासी स्वयंरोजगारांना उद्योग उभारणीसाठी असणाऱ्या विविध संधीची माहिती देण्यात आली. यावेळी राचेलवार म्हणाले, मार्गदर्शन शिबिरातून आदिवासी समाजातील युवक-युवती व महिलांना विविध स्वयंरोजगाराच्या संधी उपलब्ध करून दिल्या जात आहे. उद्योग उभारणीतून स्वयंरोजगार निर्माण करण्याची प्रक्रिया एकांगी न राहता जिल्हा उद्योग केंद्र व जिल्हा अग्रणी बँक यांच्या सहभागातून सदर प्रक्रिया अधिक प्रभावी व सुलभ पार पाडावी हा मुख्य हेतू आहे. आदिवासी सुशिक्षित बेरोजगार, तरुण-तरुणींना छोटे-मोठे उद्योग उभारतांना शासनस्तरावर राबविण्यात येत असलेल्या विविध योजनांची माहिती व्हावी तसेच योजनांचा लाभ मिळण्यासाठी अवलंबविण्याची विहित पद्धती, योजनेसाठीची कागदपत्रे, तसेच सर्वतोपरी पाठपुरावा करण्यासाठी प्रकल्प कार्यालय स्वयंरोजगार, उद्योजक, जिल्हा उद्योग केंद्र व बँकांमध्ये मध्यस्थ राहील, असेही ते म्हणाले.

 जिल्हा उद्योग केंद्राचे जनरल मॅनेजर ऋतुराज सुर्या यांनी युवक-युवतींच्या स्वयंरोजगारास पुरक वातावरण तयार करून त्याद्वारे ग्रामीण तसेच शहरी क्षेत्रात सुक्ष्म, लघु उपक्रमाद्वारे व्यापक रोजगाराच्या संधी निर्माण होण्यासाठी मुख्यमंत्री रोजगार निर्मिती कार्यक्रम राबविला जात आहे. यासाठी योजनेचा अटी, शैक्षणिक पात्रता, आवश्यक कागदपत्रे, प्रकल्प किंमत व अनुदान याबाबत सविस्तर मार्गदर्शन केले.

जिल्हा अग्रणी बँकेचे व्यवस्थापक राजू नंदनवार यांनी एखादा प्रकल्प उभारतांना आवश्यक कागदपत्रे, अटी च शर्तीची पूर्तता केल्यानंतर बँकेद्वारे विनाविलंब कर्ज सुविधा उपलब्ध करून देण्यात येते. याबाबत स्वयंरोजगार उभारणी कार्यक्षेत्रातील बँकांना सर्वतोपरी मदत करणे, याबाबत सूचना प्रदान करण्यात आलेल्या आहे. बँकेद्वारे विविध प्रशिक्षण कार्यक्रम राबविण्यात येत आहे. याचा फायदा नव स्वयंरोजगारांना होत आहे. यावेळी उपस्थितांच्या अडचणी व शंकांचे प्रश्नोत्तराच्या माध्यमातून निरसन करण्यात आले.

००००००

एकलव्य रेसिडेंशियल स्कुल प्रवेशासाठी 23 फेब्रुवारी रोजी प्रवेशपूर्व परीक्षा

एकलव्य रेसिडेंशियल स्कुल प्रवेशासाठी 23 फेब्रुवारी रोजी प्रवेशपूर्व परीक्षा

Ø पात्र व इच्छुक विद्यार्थ्यांनी 5 फेब्रुवारीपर्यंत अर्ज सादर करावे

            चंद्रपूर, दि. 20: राष्ट्रीय आदिवासी छात्र शिक्षा समितीच्या मार्गदर्शक सुचनेनुसार सन 2025-26 या शैक्षणिक वर्षासाठी महाराष्ट्रातील एकलव्य मॉडेल रेसिडेंशियल स्कुलची प्रवेश प्रक्रिया राबविण्यात येत आहे. त्या अंतर्गत दि. 23 फेब्रुवारी 2025 रोजी एकलव्य मॉडेल रेसिडेंशियल स्कुल, देवाडा (ता. राजुरा) येथे प्रवेश पुर्व परीक्षा घेण्यात येणार आहे.

            या परीक्षेद्वारे इयत्ता 6 वीत 2220 नवीन तर इयत्ता 7 वी ते 9 वीच्या 1049 रिक्त जागांवर विद्यार्थ्यांना प्रवेश दिला जाणार आहे. पात्र व इच्छुक विद्यार्थ्यांनी 5 फेब्रुवारी 2025 पर्यंत प्रकल्प अधिकारी, एकात्मिक आदिवासी विकास प्रकल्प, चंद्रपूर कार्यालयात अर्ज सादर करावा.

            दुर्गम आदिवासी भागातील मुलांना शैक्षणिक प्रवाहात आणण्यासाठी नागपूर कार्यक्षेत्रातील महाराष्ट्र ट्रायबल पब्लीक स्कुल सोसायटी (नाशिक) मार्फत सीबीएसई बोर्डाच्या 10 एकलव्य निवासी शाळा चालवल्या जातात. याठिकाणी विद्यार्थ्यांना मोफत शिक्षण, निवास, भोजन, गणवेश आदि सुविधा उपलब्ध करुन दिल्या जातात.

            सन 2025-26 या शैक्षणिक वर्षासाठी इयत्ता 7 वी ते 9 वी करिता रिक्त जागांचा अनुशेष भरण्यात येणार आहे. तर प्रत्येक एकलव्य स्कुलमध्ये इयत्ता 6 वी साठी 30 मुले व 30 मुली अशी 60 प्रवेश क्षमता असणार आहे. या सर्व जागांवर प्रवेशपूर्व परीक्षेद्वारे विद्यार्थ्यांची निश्चिती केली जाणार आहे. दरम्यान एकलव्य मॉडेल रेसिडेंशियल स्कूलच्या इयत्ता 6 वीच्या 60 जागांवर विद्यार्थ्यांना प्रथम प्रवेशपूर्व परीक्षेच्या माध्यमातून प्रवेश दिला जाणार आहे. त्यात मुलांच्या 30 जागा तर मुलींच्या 30 जागांचा समावेश आहे. इयत्ता 7वी, 8वी व 9 वीच्या रिक्त जागा प्रवेशपूर्व परीक्षेद्वारे भरण्यात येणार आहे. विद्यार्थ्यांची निवड गुणानुक्रमे व प्राधान्यक्रमानुसार होणार आहे.

             तरी पात्र व इच्छुक विद्यार्थ्यांनी दिलेल्या मुदतीत संबंधित प्रकल्प अधिकारी यांच्याकडे अर्ज सादर करावा, असे आवाहन चंद्रपूर, एकात्मिक आदिवासी विकास प्रकल्प कार्यालयाचे प्रकल्प अधिकारी विकास राचेलवार यांनी केले आहे.

००००००

गाव विकास आराखडा तयार करण्याकरीता स्वामित्व योजना महत्वपुर्ण ठरेल - जिल्हाधिकारी विवेक जॉन्सन

 

गाव विकास आराखडा तयार करण्याकरीता स्वामित्व योजना महत्वपुर्ण ठरेल - जिल्हाधिकारी विवेक जॉन्सन

Ø स्वामित्व योजनेंतर्गत लाभार्थ्यांना सनद वाटप

चंद्रपूर, दि. 18:  भारताला स्वातंत्र्य मिळाल्यानंतर अनेक वर्षांपासून देशातील गाव, खेड्यातील लोकांकडे त्यांच्या जमिनीचा कायदेशीर पुरावा नव्हता. नागरिकांना कोणताही अधिकृत कागदपत्र व जमीन मालकीचा पुरावा नसल्यामुळे बँकेकडून जमिनीवर कर्ज मिळत नव्हते. स्वामित्व या महत्वपुर्ण योजनेद्वारे नागरिकांना आर्थिक स्वरुपाचा विकास साधता येणार आहे. गावांमधील जमिनी व सिमाकंनाच्या बाबतीत असलेले वाद मिटविण्यासाठी स्वामित्व योजना वन स्टॉन सोल्युशन आहे. त्यासोबतच, गाव विकास आराखडा तयार करण्याकरीता स्वामित्व योजना महत्वपुर्ण ठरेल, असे मत जिल्हाधिकारी विवेक जॉन्सन यांनी व्यक्त केले.

  नियोजन भवन सभागृह येथे स्वामित्व योजनेअंतर्गत लाभार्थ्यांना सनद वाटप कार्यक्रमाप्रसंगी ते बोलत होते. कार्यक्रमाला कार्यक्रमाला आमदार सर्वश्री सुधीर मुनगंटीवार, देवराव भोंगळे, सुधाकर अडबाले, प्रभारी जिल्हाधिकारी विवेक जॉन्सन, उपमुख्य कार्यकारी अधिकारी (पंचायत) मीना साळुंखे, जिल्हा अधीक्षक (भुमि अभिलेख) भूषण मोहिते, डॉ. मंगेश गुलवाडे, ग्रामसेवक, सरपंच तसेच ग्रामस्थांची उपस्थिती होती.

जिल्हाधिकारी विवेक जॉन्सन म्हणाले, संपूर्ण जिल्ह्यामध्ये तसेच तालुक्यातील 82 गावांमध्ये स्वामित्व योजनेअंतर्गत सनद वाटप कार्यक्रमाचे आयोजन करण्यात आले आहे. गावाचा विकास झाला तरच देशाचा विकास होईल, असे राष्ट्रपिता महात्मा गांधीजी म्हणायचे. गावाचा बहूआयामी विकास तसेच कायापालट करण्यासाठी कार्य हाती घेण्यात आले आहे. पूर्वी जमिन मालमत्तेचा कच्चा नकाशा मिळायचा. आता आधुनिक तंत्रज्ञानाचा वापर करून ड्रोन सर्वेक्षणाद्वारे गावठाण तसेच मालमत्तेचा अधिकृत नकाशा मिळत आहे. नागरिकांना अधिकृत कागदपत्र आणि जमीन मालकीचा पुरावा नसल्यामुळे बँकेकडून जमिनीवर कर्ज मिळत नव्हते. आता जमिनीचा अधिकृत पुरावा आणि जमिनीचा मालक शेतकरी असल्यामुळे त्या जमिनीवर शेतकऱ्याला कर्ज घेणे अधिक सोपे होणार आहे. याद्वारे नागरिकांना आर्थिक विकास साधता येणार आहे. त्यामुळे नागरिकांनी मालकी हक्काचे जतन करणारी सनद प्राप्त करुन घेण्याचे आवाहन जिल्हाधिकारी विवेक जॉन्सन यांनी केले.

  आमदार सुधीर मुनगंटीवार म्हणाले, स्वामित्व योजनेअंतर्गत 50 हजार गावातील 58 लक्ष लोकांना स्वामित्व प्रमाणपत्र देण्याच्या कार्यक्रमाचे आयोजन करण्यात आले. स्वातंत्र्यानंतर महत्त्वाच्या विषयावर देशाचे पंतप्रधान यांनी मोठ्या प्रमाणात कार्यक्रमाचे आयोजन करुन प्रमाणपत्राच्या बाबतीत क्रांतिकारी निर्णय अंमलात आणला. चंद्रपूर जिल्हा कुठेही मागे नाही हे सिद्ध करत साधारणत: एकूण 1 लक्ष 47 हजार 684 इतकी मिळकतीची रक्कम आहे. स्वामीत्व प्रमाणपत्राच्या वाटपात जिल्ह्याने पुढाकार घेतला याबद्दल श्री मुनगंटीवार यांनी जिल्हा प्रशासनाचे कौतुक केले.  यावेळी आमदार सुधाकर अडबाले व आमदार देवराव भोंगळे यांनी मनोगत व्यक्त केले. यावेळी, पंतप्रधान नरेंद्र मोदीजींनी दूरदृश्य प्रणालीद्वारे 10 राज्ये आणि 2 केंद्रशासित प्रदेशांमधील 50 हजाराहून अधिक गावांमधील लाभार्थ्यांना स्वामित्व योजनेंतर्गत 65 लाखांहून अधिक प्रॉपर्टी कार्डचे वितरण केले.

स्वामित्व योजनेंतर्गत लाभार्थ्यांना सनद वाटप:

चंद्रपूर तालुक्यातील मौजा शेनगाव येथील लाभार्थी घुलाराम धांडे, नथ्थु चटकी, अमोल वैद्य, विकास वैद्य, नामदेव खारकर, भद्रावती तालुक्यातील मौजा चपराळा येथील महादेव लेडांगे, राजू वासुदेव ठाकरे, राजुरा तालुक्यातील मौजा तुलाणा येथील निळकंठ राऊत, पुरुषोत्तम अलोणे, वरोरा तालुक्यातील मौजा पांझुर्णी येथील कवडू हनुमंते, भारती पुसनाके आदि लाभार्थ्यांना सनद वाटप करण्यात आले.

तत्पुर्वी उपमुख्य कार्यकारी अधिकारी मीना साळुंखे यांनी उपस्थितांना स्वच्छता व नशामुक्तीची शपथ दिली.

0000000

सारथीमार्फत शेतकरी उत्पादक कंपन्यांसाठी मोफत प्रशिक्षण

 

सारथीमार्फत शेतकरी उत्पादक कंपन्यांसाठी मोफत प्रशिक्षण

Ø 3 ते 7 फेब्रुवारी या कालावधीत प्रशिक्षणाचे आयोजन

चंद्रपूर दि. 17 : छत्रपती शाहू महाराज संशोधन, प्रशिक्षण व मानव विकास संस्थेमार्फत (सारथी) शेतकरी कंपनीच्या गटातील संचालक, मुख्य कार्यकारी अधिकारी, प्रतिनिधिक सभासद यांच्यासाठी विनाशुल्क 5 दिवसीय निवासी क्षमताबांधणी प्रशिक्षण कार्यक्रमाचे आयोजन करण्यात आले आहे. सदर प्रशिक्षण 3 ते 7 फेब्रुवारी 2025 या कालावधीत नागपूर येथे आयोजित करण्यात येत आहे.

प्रशिक्षण पूर्ण केलेल्या शेतकरी उत्पादक कंपनींना पुढील दोन वर्षे नि:शुल्क मार्गदर्शन महाराष्ट्र सहकार विकास महामंडळामार्फत करण्यात येणार आहे. यामध्ये व्यावसायिक संधी उपलब्ध करून देणे, प्रकल्प अहवाल तयार करणे, निविष्ठा पुरवठा, बाजारपेठ जोडणी, इक्विटी ॲक्ट, प्रस्ताव, शेतकरी उत्पादक कंपनी निगडित योजना, बँक व वित्तीय संस्थांकडून निधी उपलब्धता, शेतकरी उत्पादक कंपनीशी निगडित शासकीय अधिकारी व इतर भागधारक यांच्यामध्ये समन्वय साधने आदी सेवा पुरविण्यात येणार आहे. यासाठी सारथीने या योजनेच्या अंमलबजावणीसाठी महाराष्ट्र सहकार विकास महामंडळ, पुणे यांच्याशी सहकार्य करार केलेला आहे.

शेतकरी उत्पादक कंपनीच्या माध्यमातून प्रशिक्षणासाठी ऑनलाईन अर्ज आवश्यक कागदपत्रांसह सादर करणे बंधनकारक आहे. विहित नमुन्यातील ऑनलाईन अर्ज https://sarthimaharashtra.gov.in आणि https://mahamcdc.com या संकेतस्थळावर उपलब्ध आहे. शेतकरी उत्पादक कंपनी, संचालक मंडळ व मुख्य कार्यकारी अधिकारी यांच्या प्रशिक्षणाची सुविधा नागपूर येथे सारथीच्या माध्यमातून करण्यात येत आहे. यासाठी विभागीय व्यवस्थापक महाराष्ट्र सहकार विकास महामंडळ,नागपूर विभागाचे डी. के. बेदरकर (9860869462) हे संपर्क अधिकारी आहेत. सदर प्रशिक्षण विनामूल्य असून त्यामध्ये प्रशिक्षण, निवास, भोजन, लेखन साहित्य व प्रमाणपत्र प्रशिक्षणार्थींना देण्यात येणार आहे.

सदर प्रशिक्षणाचा लाभ घेण्याचे आवाहन, सारथीचे विभागीय कार्यालय नागपूर येथील उपव्यवस्थापकीय संचालक तथा उपविभागीय अधिकारी सुरेश बगळे यांनी केले आहे.

०००००००

कार्यालयामध्ये अंतर्गत तक्रार समिती स्थापन असणे अनिवार्य

कार्यालयामध्ये अंतर्गत तक्रार समिती स्थापन असणे अनिवार्य

चंद्रपूर, दि. 17 : कामाच्या ठिकाणी महिलांचे लैंगिक छळापासून संरक्षण (प्रतिबंध, मनाई आणि निवारण) अधिनियम, 2013 व नियम 9 डिसेंबर 2013 अंतर्गत ज्या आस्थापनेवर दहा किंवा दहापेक्षा जास्त कर्मचारी कार्यरत आहे, अशा जिल्ह्यातील प्रत्येक कार्यालयामध्ये अंतर्गत तक्रार समितीची स्थापन असणे अनिवार्य आहे.

अंतर्गत तक्रार समितीमध्ये कार्यालयातील वरिष्ठ महिला अध्यक्ष असावी. महिलांच्या प्रश्नांशी  बांधील असलेल्या किंवा ज्यांना सामाजिक कार्याचा अनुभव व कायद्याचे ज्ञान आहे, अशा कर्मचाऱ्यांमधून किमान दोन सदस्य तसेच प्रशासकीय संघटना किंवा लैंगिक छळाशी संबंधित प्रश्नांशी परिचित असलेली व्यक्ती यामधील एक सदस्य असावा. समितीमध्ये किमान 50 टक्के सदस्य महिला राहतील व समितीचा कार्यकाळ हा तीन वर्षाचा राहील.

शासन स्तरावर अंतर्गत तक्रार समितीची ऑनलाईन अपडेट करण्याची कार्यवाही सुरू असून त्यासाठी प्रत्येक कार्यालयाने अंतर्गत तक्रार समितीची स्थापना केल्याची माहिती जिल्हा महिला व बालविकास अधिकारी कार्यालय, चंद्रपूर येथे सादर करणे आवश्यक आहे. सदर माहिती disttdwcdocha@gmail.com किंवा disttwcdo_cha@rediffmail.com यावर सादर करावी. तसेच ज्या कार्यालयात 10 पेक्षा कमी कर्मचारी कार्यरत आहेत, अशा कार्यालयातील कर्मचाऱ्यांनी स्थानिक तक्रार समिती व जिल्हा महिला व बालविकास अधिकारी, चंद्रपूर यांच्याकडे तक्रार नोंदवावी. सदर अंमलबजावणीत कोणीही कसूर केल्यास 50 हजार रुपयापर्यंत दंडात्मक कार्यवाहीची तरतूद कायद्यात नमूद आहे, असे जिल्हा महिला व बालविकास अधिकारी यांनी कळविले आहे.

०००००००

महाराष्ट्रातील 132 शासकीय औद्योगिक संस्थांना नवी ओळख

 महाराष्ट्रातील 132 शासकीय औद्योगिक संस्थांना नवी ओळख

Ø चंद्रपूर जिल्ह्यातील 9 शासकीय औद्योगिक संस्थांचे नामकरण

Ø  नामकरणास मान्यता देण्याबाबतचा शासन निर्णय जाहीर

मुंबई / चंद्रपूर, दि. 17 : कॅबिनेट मंत्री मंगल प्रभात लोढा यांच्या पुढाकारामुळे महाराष्ट्रातील 132 शासकीय औद्योगिक संस्थांचे नामकरण करण्यात आले आहे. प्रथम 14 शासकीय औद्योगिक संस्थांचे नामकरण करण्याचा निर्णय मंत्रिमंडळाद्वारे घेण्यात आला होता. महाराष्ट्रातील फक्त 2 औद्योगिक संस्था सोडल्या तर इतर औद्योगिक संस्थांना या आधी कोणत्याही प्रकारची नावे नव्हती. त्यांनतर कौशल्य विकास विभागाद्वारे महाराष्ट्रातील शासकीय औद्योगिक संस्थांसाठी नागरिकांकडून नावाबाबत सूचना मागवण्यात आल्या होत्या. त्याप्रमाणे राज्यातील 132 आयटीआयचे नामकरण करण्याचा निर्णय आज जाहीर करण्यात आला.

राज्यातील अकोला, अमरावती, कोल्हापूर, गडचिरोली, गोंदिया, चंद्रपूर, छत्रपती संभाजीनगर, जळगाव, जालना, धाराशिव, धुळे, नंदुरबार, नागपूर, नांदेड, नाशिक, परभणी, बीड, बुलढाणा, भंडारा, मुंबई उपनगर, यवतमाळ, रत्नागिरी, रायगड, लातूर, वर्धा, वाशिम, सांगली, सातारा, सोलापूर आणि हिंगोली जिल्ह्यातील शासकीय औद्योगिक संस्थांना नवीन ओळख मिळाली.

चंद्रपूर जिल्ह्यातील 9 शासकीय औद्योगिक संस्थांचे नामकरण : चंद्रपूर जिल्ह्यातील ब्रम्हपुरी शासकीय औद्योगिक प्रशिक्षण संस्थेस स्व. यशवंत बाजारे शासकीय औद्योगिक प्रशिक्षण संस्था असे नामकरण, मुल शासकीय औद्योगिक प्रशिक्षण संस्थेस मा.सा. कन्नमवार, सिदेंवाही शासकीय औद्योगिक प्रशिक्षण संस्थेस रामभाऊ बोंडाळे, गोंडपिपरी शासकीय औद्योगिक प्रशिक्षण (आदिवासी) संस्थेस नल-नील शासकीय औद्योगिक प्रशिक्षण संस्था, राजुरा शासकीय औद्योगिक प्रशिक्षण (आदिवासी) संस्थेस लाला लजपतराय, चंद्रपूर शासकीय औद्योगिक प्रशिक्षण संस्थेस ऋषी अगस्त्य, नागभिड शासकीय औद्योगिक प्रशिक्षण संस्थेस आचार्य प्रफुल्लचंद्र रे, सावली शासकीय औद्योगिक प्रशिक्षण संस्थेस क्रांतिकारी खुदीराम बोस, वरोरा शासकीय औद्योगिक प्रशिक्षण संस्थेस गजानन पेंढारकर शासकीय औद्योगिक प्रशिक्षण संस्था, वरोरा असे नामकरण करण्यात आले आहे. त्यामुळे चंद्रपूर जिल्ह्यातील 9 शासकीय औद्योगिक संस्थांना नवीन ओळख मिळाली आहे.

००००००

शबरी आदिवासी वित्त व विकास महामंडळाच्या कर्ज योजनेचा लाभ घ्यावा

 

शबरी आदिवासी वित्त व विकास महामंडळाच्या कर्ज योजनेचा लाभ घ्यावा

चंद्रपूर, दि. 17 : शबरी आदिवासी वित्त व विकास महामंडळाच्या, चंद्रपूर शाखा कार्यालयामार्फत रोजगार व स्वयंरोजगार करण्याच्या मूळ उद्देशाने अनुसूचित जमाती प्रवर्गातील वय 18 ते 45 दरम्यान असणारे स्त्री-पुरुष व बचत गटांना दीर्घ मुदतीवर अल्प व्याजदराने कर्जाचे वितरण केल्या जाते. त्याअनुषंगाने या कार्यालयाकडे सन 2024-25 या आर्थिक वर्षाकरिता राष्ट्रीय अनुसूचित जमाती वित्त व विकास महामंडळ मर्यादित, नवी दिल्ली (NSTFDC) पुरस्कृत मुदत कर्ज योजनेचे लक्षांक/ उद्दिष्ट प्राप्त झाले आहे. लक्षांक मर्यादित वेळेत पूर्ण करावयाचा असल्याने जिल्ह्यातील  स्त्री-पुरुष व बचत गटांकडून ऑनलाईन पद्धतीने अर्ज मागविण्यात येत आहे.

महिला सबलीकरण योजना, कृषी आणि संलग्न व्यवसाय तसेच लहान उद्योग धंद्यांकरिता रुपये 2 लक्ष, लघुउद्योग व्यवसाय तसेच ऑटो रिक्षा/मालवाहू रिक्षाकरिता 3 लक्ष, वाहन व्यवसायाकरिता (प्रवासी किंवा मालवाहू) 10 लक्ष, हॉटेल/ढाबा, ऑटो वर्कशॉप/स्पेअर पार्ट/गॅरेज आदी व्यवसायाकरिता रुपये 5 लक्ष कर्ज योजनेचा लाभ देण्यात येणार आहे. संपूर्ण चंद्रपूर जिल्ह्याकरिता 54 लक्षांक प्राप्त असून जिल्ह्यातील स्त्री-पुरुष व बचत गटांनी अर्ज करावे, असे आवाहन शाखा व्यवस्थापक आर. एस. भदाणे यांनी केले आहे.

००००००

नझूल भुखंडधारकांनी अभय योजना विशेष शिबिराचा लाभ घ्यावा

 

नझूल भुखंडधारकांनी अभय योजना विशेष शिबिराचा लाभ घ्यावा

Ø 21 व 22 जानेवारी रोजी शिबीराचे आयोजन

चंद्रपूर, दि. 17 : निवासी प्रयोजनार्थ, भाडेतत्वावर दिलेल्या नझूल जमिनीबाबत शासनाच्या वतीने ‘विशेष अभय योजना 2024-25’ राबविण्यात येत आहे. नझूल भुखंडधारकातील सत्ताप्रकार ‘ब’ मधून ‘अ’ व लिज नुतनीकरण करण्यासाठी चंद्रपूर तहसिल कार्यालयामार्फत विशेष शिबिराचे आयोजन करण्यात आले आहे.

सदर शिबीर दि. 21 व 22 जानेवारी 2025 रोजी झोन क्र. 1 मधील संजय गांधी मार्केट, सिव्हील लाईन, चंद्रपूर, झोन क्र.2 मधील चंद्रपूर शहर महानगरपालिका(सात मजली इमारत), आणि झोन क्र.3 मधील बंगाली कॅम्प, चंद्रपूर शहर महानगरपालिका, चंद्रपूर या ठिकाणी शिबीर पार पडणार आहे. या शिबिरामध्ये सत्ताप्रकार ‘ब’ धारणाधिकार असलेले नझूल भुखंडधारक यांना लागणारी कागदपत्रे व धारणाधिकार बदलण्याची प्रक्रिया याबद्दल अभय  योजना 2024-25 अतंर्गत विशेष मार्गदर्शन करण्यात येणार आहे.

तरी, सर्व नझूल भुखंडधारकांनी अभय योजना विशेष शिबिराचा लाभ घ्यावा, असे आवाहन तहसील कार्यालयाकडून करण्यात येत आहे.

०००००००

जिल्ह्यातील युवकांना इस्राईलमध्ये रोजगाराच्या संधी

 जिल्ह्यातील युवकांना इस्राईलमध्ये रोजगाराच्या संधी

चंद्रपूर, दि. 17 : कौशल्य‍, रोजगार, उद्योजकता व नाविण्यता विभागांतर्गत महाराष्ट्र इंटरनॅशनलच्या सहाय्याने जिल्ह्यातील बेरोजगार युवकांना इस्राईलमध्ये जागतिक स्तरावर रोजगाराच्या संधी उपलब्ध करुन देण्यात येत आहे.

इस्राईलमधील होमबेस केअरगिवर या पदासाठी 10 वी उत्तीर्ण व हेल्थ सेक्टरमधील 990 तासांचा शासन मान्यताप्राप्त कोर्स केलेले, जीडीए, ए.एन.एम, जी.एन.एम. बी.एससी नर्सिंग, फिजीओथेरपी आदी शिक्षण असणारे, 25 ते 45 वर्ष वयोगटातील उमेदवार प्राप्त आहेत. सदर पदाकरीता महिलांना प्राधान्य राहील. उमेदवारांना इंग्रजीमध्ये संभाषण करता येणे आवश्यक आहे. सदर पदाकरीता 1 लाख 30 हजार मासिक मानधन असणार आहे.

https://maharashtrainternational.com या संकेतस्थळावर अधिक माहिती उपलब्ध असून युवकांनी सदर संकेतस्थळावर नोंदणी करुन जागतिक स्तरावर उपलब्ध रोजगार संधीचा लाभ घ्यावा, असे आवाहन कौशल्य विकास, रोजगार व उद्योजकता मार्गदर्शन केंद्राचे सहायक आयुक्त भैय्याजी येरमे यांनी केले आहे.

००००००

20 जानेवारी रोजी महिला लोकशाही दिन

 

20 जानेवारी रोजी महिला लोकशाही दिन

चंद्रपूर, दि. 17 : प्रत्येक महिन्याच्या तिसऱ्या सोमवारी जिल्हा स्तरावर व चवथ्या सोमवारी तालुका स्तरावर महिला लोकशाही दिन आयोजित करण्यात येतो. जानेवारी महिन्याचा तिसरा सोमवार 20 जानेवारी 2025 रोजी असल्यामुळे या दिवशी सकाळी 11 वाजता निवासी उपजिल्हाधिकारी यांच्या दालनात महिला लोकशाही दिनाचे आयोजन करण्यात आले आहे.

महिला लोकशाही दिनी न्यायप्रविष्ठ प्रकरणे, सेवाविषयक, आस्थापना बाबी विषयक व विहित अर्जात नसलेली प्रकरणे स्वीकारण्यात येणार नाही. तरी ज्या महिलांचे वरील बाबी सोडून तक्रार/निवेदन वैयक्तिक स्वरुपात असेल, अशा तक्रारी महिला लोकशाही दिनाच्या 15 दिवसांपूर्वी जिल्हा महिला व बालविकास अधिकारी, चंद्रपूर यांच्या कार्यालयात दोन प्रतीत अर्ज सादर करणे बंधनकारक आहे. जिल्हास्तरीय महिला लोकशाही दिनास प्राप्त तक्रार संबंधित विभागाला पाठवून अर्जाचा निपटारा करण्यात येईल, असे जिल्हा महिला व बालविकास अधिकारी दीपक बानाईत यांनी कळविले आहे.

००००००

खाशाबा जाधव यांचा जन्मदिन राज्य क्रीडा दिन म्हणून साजरा

 खाशाबा जाधव यांचा जन्मदिन राज्य क्रीडा दिन म्हणून साजरा

Ø  जिल्हा क्रीडा अधिकारी कार्यालयामार्फत विविध स्पर्धा व उपक्रमाचे आयोजन

चंद्रपूर, दि. 17 : जिल्हा क्रीडा अधिकारी कार्यालयाच्या वतीने स्व. खाशाबा जाधव राज्य क्रीडा दिनानिमित्त विविध स्पर्धा व उपक्रमाचे आयोजन जिल्हा क्रीडा संकुल, चंद्रपूर येथे करण्यात आले होते. यावेळी खाशाबा जाधव यांच्या जयंतीनिमित्त चंद्रपूर शहरात खेळाडूंची भव्य रॅली काढण्यात आली. तालुका क्रीडा अधिकारी जयश्री देवकर व बार्टीच्या संचालिका अलका मोटघरे यांनी हिरवी झेंडी दाखवून रॅलीचा शुभारंभ केला. जिल्हा क्रीडा अधिकारी अविनाश पुंड यांनी रॅलीतील उपस्थित खेळाडूंना संबोधित केले.

यावेळी व्हॉलीबॉल, बॉक्सिंग, ॲथलेटिक्स, स्केटिंग, कुस्ती, रस्सीखेच, बॅडमिंटन, बास्केटबॉल, कबड्डी, खो-खो आणि जलतरण यासारख्या विविध खेळांमध्ये खेळाडूंनी उत्स्फूर्त सहभाग घेतला. जिल्ह्यातील सर्व शाळा, महाविद्यालये, क्रीडा मंडळामध्ये विविध उपक्रमाद्वारे राज्य क्रीडा दिन जल्लोषात साजरा करण्यात आला. जिल्हा क्रीडा अधिकारी कार्यालयाकडून विविध क्रीडा स्थळांना भेटी देण्यात आल्या. यावेळी उत्कृष्ट खेळाडूंशी ऑनलाईन संवाद देखील साधण्यात आला.

त्यासोबतच, खाशाबा जाधव यांच्या जीवनावर प्रकाश टाकणारा विशेष कार्यक्रम, परिसंवाद, चर्चासत्र व व्याख्यानाचा कार्यक्रमाचे आयोजन करण्यात आले. याप्रसंगी आहारतज्ञ श्रीमती लीना यांनी संतुलित आहाराबद्दल मार्गदर्शन केले. क्रीडा संस्कृती लोकांमध्ये रुजविण्यासाठी तसेच जिल्ह्यामध्ये भौतिक सुविधा उपलब्ध करण्यासाठी क्रीडा विभागाकडून प्रयत्न केले जात आहे, असे जिल्हा क्रीडा अधिकारी यांनी खेळाडूंना सांगितले. तसेच तालुका क्रीडा अधिकारी जयश्री देवकर यांनी खेलेंगे तो खिलेंगे हा मंत्र दिला.

राष्ट्रीय क्रीडा स्पर्धांमध्ये पदक प्राप्त, व्हॉलीबॉल खेळाडू, तसेच महाराष्ट्राचे प्रतिनिधी मॅनेजर म्हणून लखनऊ येथे राष्ट्रीय वयोगट 17 करिता गेलेले रामू नागापूरे यांचा गौरव करण्यात आला. कार्यक्रमाचे प्रास्ताविक क्रीडा अधिकारी मनोज पंधराम यांनी केले. संचालन क्रीडा अधिकारी मोरेश्वर गायकवाड तर आभार क्रीडा मार्गदर्शक संदीप उईके यांनी मानले.

००००००

दुचाकी वाहनांकरिता नवीन क्रमांकाची मालिका लवकरच होणार सुरू

 दुचाकी वाहनांकरिता नवीन क्रमांकाची मालिका लवकरच होणार सुरू

चंद्रपूर, दि. 17 : प्रादेशिक परिवहन कार्यालयातील परिवहनेत्तर संवर्गातील दुचाकी वाहनांसाठी एमएच 34 सीएन-0001 ते एमएच सीएन-9999 ही नवीन नोंदणी क्रमांकाची मालिका लवकरच सुरू करण्यात येणार आहे. ज्या वाहनधारकांना आकर्षक किंवा पसंतीचा नोंदणी क्रमांक हवा असेल त्यांनी 21 जानेवारी 2025 पर्यंत दुपारी 4 वाजेपर्यंत प्रादेशिक परिवहन कार्यालयात अर्ज सादर करावा.

तसेच पसंतीच्या क्रमांकाच्या अर्जासोबत क्रमांकानुसार विहित केलेले शासकीय शुल्क (DD उपप्रादेशिक परिवहन अधिकारी, चंद्रपूर यांचे नावे) विहीत शुल्काच्या रकमेचा भरणा मालिका सुरू झाल्यावर करून आकर्षक व पसंतीचे नोंदणी क्रमांक प्राप्त करून घ्यावेत. अशा आकर्षक क्रमांकासाठी शुल्क भरल्यावर वाहनाचे कागदपत्र तात्काळ सादर करणे अर्जदारास अनिवार्य राहील.

प्राप्त झालेले अर्ज 21 जानेवारी रोजी दुपारी 4 वाजेपर्यंत स्वीकारण्यात येऊन त्याच दिवशी अर्जाची छाननी करण्यात येणार आहे. एकाच क्रमांकासाठी अनेक अर्ज प्राप्त झाल्यास, कार्यालयात एकापेक्षा जास्त अर्ज आले आहेत का याबाबत चौकशी करावी. एकापेक्षा जास्त अर्ज आलेल्या क्रमांकाच्या बाबतीत वाढीव शुल्काचा धनाकर्ष (DD) स्वतंत्र बंद लिफाफ्यातून सादर करणे बंधनकारक राहील. सायकांळी 4.30 वाजता बंद लिफाफे उघडण्यात येईल. जास्त रकमेचे धनादेश सादर केलेल्या अर्जदारास सदर क्रमांक देण्यात येईल व उर्वरित धनादेश परत करण्यात येतील. सदर मालिका चालू असतांना वाहन 4.0 प्रणाली कार्यान्वयीत झाल्यानंतर बंद करण्यात येईल, याची नोंद घेण्याचे तसेच पसंतीचा क्रमांक घेण्यास अर्ज करण्याचे आवाहन प्रादेशिक परिवहन अधिकारी किरण मोरे यांनी केले आहे.

००००००