कोलारी येथील जि.प. शाळेत ‘हिंद दी चादर’ कार्यक्रम

 

कोलारी येथील जि.प. शाळेत ‘हिंद दी चादर’ कार्यक्रम

गुरु तेग बहादुर साहिबजी यांच्या शहिदी समागम वर्षानिमित्त विविध उपक्रमांचे आयोजन

चंद्रपूर, दि. 29 : महाराष्ट्र शासनाच्या अल्पसंख्याक विकास विभागामार्फत ‘हिंद-की-चादर’ श्री गुरु तेग बहादुर साहिब जी यांच्या 350 व्या शहिदी समागम वर्षानिमित्त राज्यभर विविध शैक्षणिक आणि जनजागृतीपर कार्यक्रम आयोजित करण्यात येत आहे. या संदर्भातील शासन निर्णयाच्या अनुषंगाने शिक्षण विभागाने सर्व विभागीय शिक्षण उपसंचालक, जिल्हा परिषद शिक्षणाधिकारी, नगरपालिका/महानगरपालिका शिक्षण विभाग तसेच सर्व शाळा-महाविद्यालयांना आवश्यक कार्यवाही करण्याचे निर्देश दिले आहेत.

शालेय विद्यार्थ्यांना धर्मस्वातंत्र्य, मानवी मूल्ये, सहिष्णुता, देशहितासाठीचा त्याग, ही गुरू तेग बहादूर साहिब जी यांनी दिलेली प्रेरणा समजावून सांगणे हा या कार्यक्रमाचा मुख्य उद्देश आहे. श्री गुरु तेग बहादूर साहेब जी 350 वी  शहिदी समागम शताब्दी वर्षानिमित्त पंचायत समिती चिमूर अंतर्गत जिल्हा परिषद उच्च प्राथमिक शाळा, कोलारी येथे ‘हिंद दी चादर’ कार्यक्रम घेण्यात आला.

शिक्षणाधिकारी (प्राथ.) अश्विनी सोनवणे (केळकर) यांच्या सूचनेनुसार, चिमूर पंचायत समितीचे गटशिक्षणाधिकारी विशाल बोधाने यांच्या  मार्गदर्शनात व शिक्षण विस्तार अधिकारी स्वप्निल खांडेकर यांच्या संकल्पनेतून  शाळेच्या विद्यार्थ्यांनी गुरु तेग बहादूर यांचे छायाचित्र, गुरुपरंपरेवर आधारित चित्रकला स्पर्धा, कविता गायन स्पर्धा व प्रार्थना घेण्यात आली. हे सर्व उपक्रम यशस्वीरित्या पार पाडण्यासाठी  शाळेच्या मुख्याध्यापिका वनश्री चौधरी, सहाय्यक शिक्षिका संध्या गोंडाने, सहाय्यक शिक्षक आशिष उपासे तसेच शाळा व्यवस्थापन समिती यांनी सहकार्य केले.

राज्यातील सर्व शैक्षणिक संस्थांमध्ये पुढील उपक्रम राबविण्यात येणार आहेत. यात 1. गुरू तेग बहादूर साहिब जी यांच्या जीवनकार्य व बलिदानावर विशेष प्रबोधन सत्र, 2. निबंध, चित्रकला, वक्तृत्व, प्रश्नमंजुषा इत्यादी स्पर्धा, 3. वाचन प्रेरणा उपक्रम, ग्रंथ प्रदर्शने व माहितीपर साहित्याचे वाचन, 4.धर्मनिरपेक्षता, मानवता, बंधुता आणि राष्ट्रीय एकात्मता यांवरील व्याख्यानमाला, 5. शालेय सभांमध्ये माहितीपर कार्यक्रम व विद्यार्थ्यांसाठी विशेष मार्गदर्शन याचा समावेश आहे.

००००००