25 सिंधी विस्थापितांना जमीन नियमानुकूलचे आदेश वाटप

 25 सिंधी विस्थापितांना जमीन नियमानुकूलचे आदेश वाटप

Ø विशेष अभय योजनेंतर्गत दिलासा

चंद्रपूर, दि. 28 : सिंधी वसाहतींमधील सिंधी विस्थापितांच्या निवासी व वाणिज्यिक जमिनींचे शर्तभंग नियमानुकूल करण्यासाठी आणि त्यांना फ्री-होल्ड (भोगवटादार वर्ग-1 / सत्ताप्रकार-अ) करण्यासाठी ‘विशेष अभय योजना-2025’ राबविण्यात येत आहे. या अंतर्गत चंद्रपूर तालुक्यातील 25 सिंधी विस्थापितांना जमीन नियमानुकूलचे आदेश वाटप छत्रपती शिवाजी महाराज महाराजस्व अभियानात करण्यात आले.

पश्चिम पाकिस्तानातून भारतात आलेल्या सिंधी विस्थापितांचे निर्वासित इसम (नुकसान भरपाई व पुनर्वसन) अधिनियम, 1954 व तदनुषंगिक नियमांनुसार पुनर्वसन करण्यात आले आहे. केंद्र शासनाने सदर कायद्याच्या कलम 34 नुसार आपले अधिकार सन 1971 पासून महाराष्ट्र शासनास प्रदान केले आहेत. 24 जानेवारी 1973 शासन अधिसुचनेनुसार राज्यात भरपाई संकोष मालमत्ता घोषित करण्यात आलेल्या आहेत. सदर भूखंडांच्या अधिकार अभिलेखात भोगवटादार वर्ग-2 अथवा ब/ब-1/ब-2 सत्ता प्रकार अशा नोंदी असल्याने व विस्थापितांकडे जुने पुरावे नसल्याने अडचणी येत होत्या. यावर मात करण्यासाठी महसूल व वन विभागाने शासन निर्णय 15 मे 2025 अन्वये ‘विशेष अभय योजना-2025’ लागू केली आहे.

 योजनेची प्रमुख वैशिष्ट्ये व सवलती : सद्यःस्थितीत निवासी वापरासाठी असलेल्या जमिनीकरिता 2.5 टक्के आणि वाणिज्यिक वापराच्या जमिनीकरिता 5 टक्के सवलतीचे अधिमूल्य आकारण्यात येत आहे.

ग्राह्य पुरावे : रेफ्युजी कार्ड, राष्ट्रीयत्व प्रमाणपत्र, घरपट्टी/पाणीपट्टी पावती, वीज बिल, ताबेपावती, मतदार ओळखपत्र, मालमत्ता पत्रक, 7/12 नोंदी इत्यादी पुरावे ग्राह्य धरले जातात.

सदर शासन निर्णयातील अटी व शर्तीनुसार चंद्रपूर तालुक्यामध्ये छत्रपती शिवाजी महाराज महाराजस्व अभियान' अंतर्गत प्राप्त अर्जाची छाननी व पुराव्यांची सखोल पडताळणी करून चंद्रपूर तालुक्यातील एकूण 25 पात्र सिंधी विस्थापित अतिक्रमणधारकांना जमिनीचे शर्तभंग नियमानुकूल करून फ्री-होल्ड करण्याचे आदेश प्रशासनाच्या वतीने वाटप करण्यात आले आहेत.

नागरिकांना आवाहन : ‘विशेष अभय योजना-2025’ ही 15 मे 2027 पर्यंत एक वर्षाच्या कालावधीसाठी लागू आहे. चंद्रपूर तालुक्यातील ज्या सिंधी विस्थापित नागरिकांनी/धारकांनी अद्याप आपले निवासी व वाणिज्यिक भूखंड नियमानुकूल व फ्री-होल्ड करून घेतलेले नाहीत, त्यांनी आवश्यक दस्तऐवजांसह तहसील कार्यालय, चंद्रपूर येथे त्वरित संपर्क साधून  या योजनेचा लाभ घ्यावा, असे आवाहन करण्यात येत आहे.

००००००